
ငလျင်ဒဏ်ခံနေရတဲ့ဒေသက ပြည်သူတွေကို သွားရောက်ကူညီဖို့အတွက် MNDAA ကိုးကန့်တပ်က စစ်ကောင်စီနဲ့ ညှိနှိုင်းပေမဲ့ စစ်ကောင်စီက လက်မခံဘူးလို့ MNDAA သတင်းအရင်းမြစ်တွေဆီက သိရပါတယ်။
အထူးဒေသ ၁ အတွင်းရှိ MNDAA တပ်ဖွဲ့တွေနဲ့ ကူညီကယ်ဆယ်ရေးအဖွဲ့ဟာ ငလျင်ဒဏ်သင့်နေရာတွေအထိ သွားရောက်ကာ ကယ်ဆယ်ရေးလုပ်ငန်းတွေနဲ့ လိုအပ်တာတွေ လုပ်ဆောင်ဖို့ MNDAA က စစ်ကောင်စီနဲ့ ညှိနှိုင်းခဲ့ပေမဲ့ စစ်ကောင်စီက လက်မခံခဲ့တာကြောင့် သွားရောက်နိုင်မှာ မဟုတ်တော့ဘဲ တခြားနည်းလမ်းတွေနဲ့ ကူညီဖို့သာ ပြင်ဆင်နေတယ်လို့ လားရှိုးမြို့ MNDAA သတင်းရင်းမြစ်တယောက်က ပြောပါတယ်။
“သူတို့ကတော့ စစ်ရေးအရ စိုးရိမ်ပြီး ဝင်ခွင့်မပေးဘူး။ MNDAA တပ်ဖွဲ့ဝင်တွေ မပါဘဲ အရပ်ဘက်အဖွဲ့တွေတော့ ဝင်ခွင့်ပေးသင့်တယ်။ အခုချိန်မှာ စစ်ရေး၊ နိုင်ငံရေးထက် သဘာဝဘေးကို ဦးစားပေးဖို့အတွက် လူကြီးတွေက စစ်ကောင်စီနဲ့ ညှိနှိုင်းခဲ့တာ။ ဝင်ခွင့်မပေးတော့လည်း တတ်နိုင်တဲ့ နည်းလမ်းတွေနဲ့ ကူညီပေးသွားမှာပါ” လို့ ပြောပါတယ်။
လက်ရှိမှာ ငလျင်ဒဏ်သင့်ဒေသက ပြည်သူတွေအနေနဲ့ မိမိတို့နေထိုင်ရာ ဒေသက ဆေးရုံတွေမှာ ဆေးကုသဖို့ အခက်အခဲရှိမယ်ဆိုရင် အထူးဒေသ ၁ လားရှိုးမြို့ကို ရောက်အောင်လာခဲ့ဖို့နဲ့ ရောက်ရှိလာပါက ဆေးကုသစရိတ် အခမဲ့နဲ့ ကုသပေးဖို့ ပြင်ဆင်ထားတယ်လို့ MNDAA က ကြေညာထားပါတယ်။
ဒါ့အပြင် အထူးဒေသ ၁ လားရှိုးမြို့မှာ ငလျင်ဒဏ်သင့်ဒေသတွေက ပြည်သူတွေကို ကူညီဖို့အတွက် လားရှိုးမြို့မှာရှိတဲ့ MNDAA တပ်ဖွဲ့ဝင်တွေက ကိုယ်ပိုင်ငွေကြေးတွေကို လှူဒါန်းနေပြီး လားရှိုးဒေသခံတွေကလည်း ဖျော်ဖြေရေးတွေပြုလုပ်ကာ အလှူငွေတွေ ကောက်ခံပေးနေတယ်လို့ လားရှိုးမြို့ခံတွေဆီက သိရပါတယ်။
စစ်ကောင်စီဟာ အိန္ဒိယ၊ မလေးရှား၊ စင်္ကာပူ၊ ထိုင်း၊ တရုတ် စတဲ့နိုင်ငံတွေက ကယ်ဆယ်ရေးလုပ်မယ့် သူတွေကို ဝင်ခွင့်ပေးထားပေမဲ့ ထိုင်ဝမ်နိုင်ငံက ကူညီမယ့်သူတွေကိုတော့ ဝင်ခွင့်လက်မခံတာမျိုးတွေလည်း ရှိနေပါတယ်။
MNDAA အနေနဲ့ ငလျင်လှုပ်ခတ်ပြီးတဲ့နောက် အထူးဒေသ ၁ လားရှိုးမှာ သင်္ကြန်ကျင်းပဖို့ ပြုလုပ်ထားပေမဲ့ လူသားချင်းစာနာထောက်ထားမှုအရ သင်္ကြန်ပွဲနဲ့ တခြားပွဲလမ်းသဘင်တွေ မလုပ်တော့ဖို့အတွက် တားမြစ်ထားပါတယ်။
မတ် ၃၀ ရက်၊ နေ့လယ် ၃ နာရီအထိ DVB Data အဖွဲ့က ကောက်ယူရရှိတဲ့ စာရင်းအရ မြန်မာနိုင်ငံမှာ အင်အားပြင်းငလျင်ဒဏ်ကြောင့် သေဆုံးသူဦးရေ စုစုပေါင်း ၂၆၀၁ ယောက် ရှိလာပြီ ဖြစ်ပါတယ်။