မြန်မာ-ထိုင်းနယ်စပ် ကရင်အမျိုးသားအစည်းအရုံး (KNU) တပ်မဟာ ၇ နယ်မြေ၊ လှိုင်းဘွဲမြို့နယ်အတွင်းက စစ်ကောင်စီရဲ့ ခလယ်ဒေးတပ်စခန်းကို KNLA ပူးပေါင်းတပ်က မတ် ၂၅ ရက် ညနေ ၆ နာရီကျော်မှာ အပြီးသတ် သိမ်းပိုက်လိုက်တယ်လို့ သိရပါတယ်။
မြန်မာ-ထိုင်းနယ်စပ်က စစ်ကောင်စီရဲ့ ခလယ်ဒေးစခန်းသိမ်းတိုက်ပွဲအတွင်း စစ်ကောင်စီက လေကြောင်းကနေ ပေါင် ၅၀၀ ဗုံး ၁၆ လုံး ကြဲချတိုက်ခိုက်ခဲ့တယ်လို့ KNU ဗဟိုကော်မတီဝင် ပဒိုစောသမိန်ထွန်းက ပြောပါတယ်။
အဆိုပါစခန်းအတွင်းကနေ ဆိုင်ကယ် ၅ စီးအပါအဝင် လက်နက်ခဲယမ်းအများအပြား သိမ်းဆည်းရရှိခဲ့ပြီး စစ်ကောင်စီတပ်သားတွေလည်း ထွက်ပြေးသွားတယ်လို့ စစ်ရေးသတင်းရင်းမြစ်က ပြောပါတယ်။
ခလယ်ဒေးစခန်းဟာ မြန်မာ-ထိုင်းနယ်စပ် သောင်ရင်းမြစ်နဲ့ ၁ မိုင်သာကွာဝေးတာကြောင့် ထိုင်းနိုင်ငံဘက်မှလည်း လုံခြုံရေး တင်းကျပ်ထားတယ်လို့ ဆိုပါတယ်။
လက်ရှိမှာလည်း စစ်ကောင်စီရဲ့ ခလယ်ဒေးတပ်စခန်း သိမ်းတိုက်ပွဲအတွင်း စစ်ကောင်စီက လေကြောင်း ဂျက်ဖိုက်တာအပြင် Y21 လေယာဉ်နဲ့ပါ ဗုံးကြဲတိုက်ခိုက်ခဲ့တာကြောင့် ဒေသခံ ၁၅၀ ကျော်ဟာ ထိုင်းနိုင်ငံ၊ ထာ့ဆောင်ယန်မြို့နယ်၊ မဲ့ဆောင်ကျေးရွာကို ထွက်ပြေးတိမ်းရှောင်ပြီး ယာယီခိုလှုံနေရပါတယ်။
