တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ်၊ ဝန်တောင်ကျေးရွာအနီးမှာ ရေတပ်စစ်သင်္ဘောအုပ်စုနဲ့ နှစ်ဖက်အပြန်အလှန် ပစ်ခတ်မှုဖြစ်ခဲ့တယ်လို့ ကျွန်းစုမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။
မတ် ၁၃ ရက် ည ၇ နာရီအချိန်ဝန်းကျင်လောက်မှာ ဝန်တောင်ကျေးရွာဘက် ထွက်လာတဲ့ ပြည်သူ့ကာကွယ်ရေးတပ် စက်လှေ ၃ စီးနဲ့ ရှော်တော်မော်ကျေးရွာဘက်မှလာတဲ့ ပျူစောထီးတွေ အပါအဝင် စစ်ကောင်စီတပ်သား အင်အား ၆၀ ခန့် လိုက်ပါလာတဲ့ စစ်သင်္ဘောအုပ်စုတို့ ထိတွေ့ပစ်ခတ်မှုဖြစ်ခဲ့တယ်လို့ ကျွန်းစုပကဖအဖွဲ့ တာဝန်ခံတယောက်က ပြောပါတယ်။
“သူတို့ဘက်က စစ်ကြောင်းထိုးတာ မဟုတ်ဘူး၊ ကျနော်တို့ ကာကွယ်ရေးအဖွဲ့တွေ ပေါက်ဝင်မလာအောင် လာကာတာ ထင်တယ်။ ကြိုရောက်နေကြတော့ ကျနော်တို့ဘက်က လျှပ်တပြက် ဝင်လုပ်တာပါ။ ကင်းလှည့်နေတာမျိုးမဟုတ်ဘဲ ကျနော်တို့ လှုပ်ရှားနေတာကို သတင်းရလို့ မပေါက်ဝင်အောင် ကြိုပြီးလာကာတဲ့သဘောမျိုးပေါ့။”
စစ်ကောင်စီဘက်က ရေတပ် ၁၁၄ စစ်သင်္ဘောအပါအဝင် သင်္ဘော ၂ စီး၊ သားပေါက်လှေ ၂ စီးနဲ့ မိုင်းတွေကျေးရွာမှ ပျူစောထီးပိုင်တဲ့ ဖိုင်ဘာလှေငယ် ၃ စီးတို့ပါဝင်ပြီး ထိတွေ့ပစ်ခတ်မှုအတွင်း ပြည်သူ့ကာကွယ်ရေးတပ်ဘက်က ထိခိုက်ဒဏ်ရာရတာမရှိဘဲ စစ်ကောင်စီဘက်က အခြေအနေကိုတော့ မသိရဘူးလို့ ဆိုပါတယ်။
လက်ရှိမှာ တိုက်ပွဲဖြစ်တဲ့ ဝန်တောင်ကျေးရွာဘက်ကို စစ်တပ်က အင်အား ၈ ယောက်ခန့်ပါ ၁၁၄ စစ်သင်္ဘောငယ် ၁ စီး၊ ရှော်တောမော်ကျေးရွာဘက်မှာ အင်အား ၃၀ ဝန်းကျင်ပါတဲ့ ၅၆၆ စစ်သင်္ဘောကြီး ၁ စီးနဲ့ ကင်းလှည့်လှုပ်ရှားသွားလာနေတယ်လို့ ကျွန်းစုမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။
