ကရင်နီပြည်နဲ့ ရှမ်းပြည်နယ်စပ်မှာရှိတဲ့ မိုးဗြဲမြို့က နေအိမ်တွေကို စစ်ကောင်စီတပ်က မီးလောင်ဗုံးတွေ အသုံးပြုတိုက်ခိုက်တာ​ကြောင့် အခု မတ်လ ၂ ပတ်တာကာလအတွင်း နေအိမ် ၁၅ လုံး ထိခိုက်ပျက်စီးခဲ့ရတယ်လို့ ကရင်နီအမျိုးသားများကာကွယ်ရေးတပ် KNDF က မတ် ၁၆ ရက်  ဒီနေ့ ထုတ်ပြန်ပါတယ်။

စစ်ရေးပစ်မှတ် မဟုတ်တဲ့ ပြည်သူ့နေအိမ်တွေကို စစ်ကောင်စီတပ်က လက်နက်ကြီးတွေနဲ့လည်း နေ့တိုင်းပစ်ခတ်နေပြီး မီးလောင်ဗုံးတွေ၊ ဒရုန်းတွေနဲ့လည်း ပစ်ခတ်ဖျက်ဆီးနေတယ်လို့ သိရပါတယ်။

ကရင်နီပြည် ကြားကာလအုပ်ချုပ်ရေးကောင်စီ IEC ရဲ့အတွင်းရေးမှူး ဦးဗညားက “ဒါက ကျတယ်၊ ပေါက်ကွဲတယ်၊ ပြီးရင် ချက်ချင်းမီးမတောက်သည့်တိုင်အောင် အစတွေ သွားထိတဲ့နေရာမှာ အုတ်ဆိုလည်းအုတ်ကို မီးတဖြည်းဖြည်း စွဲလောင်တာမျိုး၊ ရေနဲ့ပက်လည်း မငြိမ်းတာမျိုးကို တွေ့ရတာပေါ့” လို့ ပြောပါတယ်။

လက်နက်ကြီးနဲ့ပစ်ခတ်ရာမှာလည်း မီးလောင်စေတဲ့ ဗုံးသီးတွေကို အသုံးပြုနေပြီး ဖယ်ခုံတပ်၊ လွိုင်ကော်အမြောက်တပ်တွေကနေလည်း မိုးဗြဲမြို့ကို လက်နက်ကြီးနဲ့ ပစ်ခတ်နေတဲ့အပြင် ဒရုန်းနဲ့ ဗုံးကြဲတာ၊ မီးလောင်ဗုံး သုံးတာတွေကိုလည်း နေ့ရက်တိုင်း မြင်တွေ့နေရတယ်လို့ ဆိုပါတယ်။

စစ်ကောင်စီတပ်က မိုးဗြဲမြို့ကို ပြန်ပြီးထိန်းချုပ်နိုင်ဖို့အတွက် လူအင်အား၊ လက်နက်အင်အား၊ လေကြောင်းအားတွေကို အလွန်အကျွံသုံးပြီး ထိုးစစ်ဆင်တိုက်ခိုက်နေတာကြောင့် တော်လှန်ရေး အင်အားစုတွေနဲ့ ထိတွေ့တိုက်ပွဲတွေ ဆက်တိုက်ပြင်းထန်နေပါတယ်။

ပြီးခဲ့တဲ့ ၂၀၂၄ ခုနှစ် နိုဝင်ဘာလလောက်ကစလို့ စစ်ကောင်စီတပ်က ထိုးစစ်ဆင်တိုက်ခိုက်နေပြီး မိုးဗြဲမြို့ဟာ စစ်ရေးအရ နှစ်ဖက်စလုံးအတွက် အရေးပါတဲ့မြို့ဖြစ်တာကြောင့် ထိတွေ့တိုက်ပွဲတွေ ဒီနေ့အချိန်အထိ ပြင်းထန်နေတယ်လို့ သိရပါတယ်။

၂၀၂၅ ခုနှစ် နှစ်အစကနေ ခုလက်ရှိအချိန်အထိ မိုးဗြဲမှာ ပြည်သူ့နေအိမ် အလုံး ၁၀၀ ထက်မနည်း ထိခိုက်ပျက်စီးခဲ့ရပြီး ဘာသာရေးအဆောက်အအုံ ၄ ခုနဲ့ စာသင်ကျောင်း ၄ ကျောင်းတို့ ပျက်စီးခဲ့ရတယ်လို့ KNDF ရဲ့ ထုတ်ပြန်ချက်တွေအရ သိရပါတယ်။