ထိုင်းမြောက်ပိုင်း ချင်းမိုင်ခရိုင် ဆန်ဆိုင်းမြို့နယ်ထဲမှာ ပြီးခဲ့တဲ့ ဖေဖော်ဝါရီ ၁၄ ရက် (ချစ်သူများနေ့ ) က မြန်မာကျောင်းသားလူငယ် ၁ ယောက် ဓားထိုးခံရပြီး သေဆုံးသွားခဲ့ပါတယ်။‌

အသက် ၂၀ နှစ်ရွယ် စိုင်းလောဝ်း ခေါ်  နာ့သ်တဆစ် ဆိုသူ ရှမ်းလူငယ်မှာ ချင်းမိုင်မြို့ ဖာယပ်တက်နိုလိုဂျီကောလိပ်က ဒုတိယနှစ်ကျောင်းသားဖြစ်ပြီး ပြီးခဲ့တဲ့ ချစ်သူများနေ့က သူ ငယ်ချင်းတွေနဲ့ စားသောက်ဆိုင်မှာ သောက်စားပျော်ပါးစဉ် လူငယ်ချင်းခိုက်ရန်ဖြစ်ပွားပြီး ဓားထိုးခံရတာလို့  ချင်းမိုင်နာရေးကူညီမှုအဖွဲ့မှ စိုင်းတိုင်းထိန်က DVB ကို ပြောပါတယ်။ 

“အဲဒီညက သူငယ်ချင်းတွေနဲ့အတူ မယ်ကျို့ရဲစခန်းနောက်မှာရှိတဲ့ စားသောက်ဆိုင်မှာ သွားစားသောက်ကြတယ်။ သူတို့ရှေ့မှာရှိတဲ့ စားပွဲက မိန်းကလေးတယောက်ရောက်လာပြီး သူနဲ့ ဖန်ခွက်ချင်းလာတိုက်တယ်၊ သူ့ရည်းစားရှေ့မှာ အရွဲ့တိုက်ပြတယ်ပြောတာပဲ၊ ကောင်မလေး ရည်းစားကလည်း ပြဿနာလာရှာတယ်။  သူက အဲဒီကောင်မလေးနဲ့ မသိတဲ့အကြောင်း ရှင်းပြ တယ်။ တဘက်က အပြင်မှာသွားရှင်းမယ်ဆိုပြီး ခေါ်ထုတ်သွားတာ။  အပြင်ရောက်တော့ စကား ကောင်းကောင်း မပြောရသေးဘူး၊ ဓားနဲ့ထိုးတယ်။ သူ့သူငယ်ချင်းတွေကလည်း အဲလိုဖြစ်မယ်မထင်ထားတော့ ဝင်တားဖို့ အချိန်မရလိုက်ဘူး။ ဝမ်းဗိုက်မှာထိတယ်၊ ဆေးရုံရောက်ပြီး မကြာဘူး၊ နောက်တနေ့ကူးတော့ ဆုံးသွားတယ်။ သွေးကြောအကြီးပေါက်သွားတယ်တဲ့။”

ဓားနဲ့ထိုးတဲ့လူငယ်မှာ စိုင်းလောဝ်းနဲ့ ယခင်က မသိကျွမ်းခဲ့၊ ရန်ငြိုးရန်စမရှိခဲ့ကြောင်း၊ သူဟာ အသက် ၂၁ နှစ်ရှိ  နိုင်းဆကလင်းကျိုင်နူ ဆိုသူဖြစ်ပြီး အဲဒီညက ထွက်ပြေးသွားတယ်၊ နောက်တနေ့ ဖေဖော်ဝါရီ ၁၅ ရက်မှာ ရဲစခန်းမှာ လာရောက်အဖမ်းခံပြီး အာမခံငွေ ဘတ် ၁ သိန်းခွဲ နဲ့ အပြင်ကနေ အမှုရင်ဆိုင်မယ်။ အဆိုပါလူငယ်မှာ ယခင်ကလည်း ခိုက်ရန်ဖြစ်ပွားမှုတွေ မကြာခဏ ရှိခဲ့တယ်လို့ ဆိုပါတယ်။ 

သေဆုံးသူ စိုင်းလောဝ်းရဲ့ မိဘတွေဟာ ရှမ်းပြည်မြောက်ပိုင်း ကျောက်မဲခရိုင် မိုင်းငေါ့မြို့က ဖြစ်ပြီး ချင်းမိုင်မှာ ရွှေ့ပြောင်းလုပ်သားတွေအနေနဲ့ အလုပ်လာလုပ်နေတာပါ။ သူတို့လို မပင် ပန်းစေချင်လို့ သားကို ကောလိပ်ရောက်သည်ထိ ကြိုးစားထောက်ပံ့ခဲ့တယ်၊ ကျောင်းပြီးဖို့ ၂ နှစ် အလိုမှာ ခုလိုအဖြစ်ဆိုးနဲ့ ကြုံရတော့ ဖြေမဆည်နိုင်အောင်ဖြစ်နေကြတယ်လို့  ဆိုပါတယ်။ 

စိုင်းလောဝ်းရဲ့ အလောင်းကို ဖေဖော်ဝါရီ ၁၇ ရက်က မီးသင်္ဂြိုဟ်ခဲ့ပြီး ဓားထိုးတဲ့တရားခံနဲ့ သူ့မိခင်က လာရောက်တောင်းပန်တယ်၊ လျော်ကြေးငွေ ဘတ် ၁ သိန်းခွဲနဲ့ အမှုကြေအေးပေးဖို့ လာပြောတယ်၊  ဆွေမျိုးမိဘတွေကတော့ တရားဥပဒေကပေးတဲ့အပြစ်ကို ခံယူစေချင်တယ်လို့ ပြောသွားပါတယ်။