အခုနှစ် ဇန်နဝါရီလ တလအတွင်းမှာပဲ စစ်မှုထမ်းဥပဒေကြောင့် နှစ်ပတ်အတွင်း မန္တလေးမြို့မှာ လူငယ် ၁၂၂ ဦး ဖမ်းဆီးခံခဲ့ရတယ်လို့ မန္တလေးသပိတ်အင်အားစုက ထုတ်ပြန်ပါတယ်။
၂၀၂၅ ခုနှစ် ဇန်နဝါရီ ၁ ရက်နေ့မှာ စစ်ကောင်စီက ဒီမိုကရေစီနှုန်းတွေနဲ့ ကိုက်ညီမှုမရှိတဲ့ ဆိုက်ဘာ လုံခြုံရေးဥပဒေကို ပြဋ္ဌာန်းလိုက်ပြီးနောက် ဖမ်းဆီးမှုတွေ ပိုဖြစ်လာတယ်လို့ ဆိုပါတယ်။
လူငယ်တွေကို ပစ်မှတ်ထားပြီး ဖုန်းတွေကို စစ်ဆေးကာ မတရားဖမ်းဆီးတာ၊ ငွေတောင်းခံတာတွေကို နေ့စဉ်ရက်ဆက်ဆိုသလို ကျူးလွန်နေတယ်လို့ မန္တလေးသပိတ် အင်အားစုရဲ့ ထုတ်ပြန်ချက်မှာ ပါရှိပါတယ်။
ဒါ့အပြင် စစ်မှုထမ်းဥပဒေကြောင့်လည်း လူငယ်တွေဟာ နေ့ညမရွေး ဖမ်းဆီးခံနေရပြီး အခြေခံလူတန်းစားလူငယ်တွေကို ပိုပြီးပစ်မှတ်ထားတယ်လို့ ဆိုပါတယ်။
ဒါကြောင့် ဒေသခံလူထုတရပ်လုံးအနေနဲ့ အကြမ်းဖက်စစ်ကောင်စီရဲ့ ဟန်ပြရွေးကောက်ပွဲကို အသက်သွင်းလာခဲ့ရင် လူထုဆန္ဒသဘောထားတွေကို ထင်ဟပ်စေမယ့် ရရာနည်းလမ်းတွေနဲ့ ဆန့်ကျင်တွန်းလှန်သွားကြဖို့ အရေးကြီး လိုအပ်ပါတယ်လို့ မန္တလေးသပိတ်အင်အားစုက တိုက်တွန်းပြောဆိုထားပါတယ်။
ကေခိုင်
