အားကိုးအားထားပြုစရာ ကာကွယ်ရေးဦးစီးချုပ် ဆိုသူကလည်း တော်လှန်ရေးတပ်ဖွဲ့များ နေပြည်တော် တံခါးဝ ရောက်လာသည်နှင့် လေယာဉ်ပေါ် တက်ပြေးရန် အဆင်သင့် ပြင်ဆင်နေချိန်တွင် ရင်ဆိုင်တိုက်ပွဲများတွင် ၎င်း၏ သစ္စာခံများကတော့ အသေခံ တိုက်ခိုက်ပေးနေကြဆဲပင် ဖြစ်သည်။

မင်းအောင်လှိုင်သည် တရုတ်မှ ၎င်းတို့ ပြုတ်ကျသွားသည်အထိ အဖြစ်မခံဟု စိတ်ထဲတွင် စွဲမှတ် ယုံကြည်နေသူ ဖြစ်သည်။ ထို့အတွက်လည်း ကျိုးနွံစွာ ၎င်းတို့ပြောသမျှ လိုက်လုပ်ပြီး နိုင်ငံတဝက်ကိုပင် အုပ်ချုပ်နိုင်စွမ်း မရှိသည်ကို ကမ္ဘာသိ ဖြစ်ပါလျက် သန်းခေါင်စာရင်း ကောက် လူဦးရေ ဘယ်ရွေ့ဘယ်မျှ ရှိ‌နေပါသည်ဟု လိမ်ညာရဲသူ ဖြစ်သည်။

ပြီးခဲ့သည့်နှစ် မတ်လ ၁၈ ရက်နေ့ ရုရှားမီဒီယာနှင့် အင်တာဗျူးတွင် မင်းအောင်လှိုင် ပြောခဲ့သည် တခုက ရယ်စရာအကောင်းဆုံး ဟာသအဖြစ် တင်ကျန်သွားခဲ့သည်။ ၎င်းအား သားသမီးများအား မည်သို့ ဆုံးမသွန်သင်ခဲ့ပါသလဲ ဟူသော အမေးကို ဖြေရာတွင် အလုပ်ကြိုးစားလုပ်ကိုင်ပြီး ရိုးသားမှုရှိရန် သင်ကြားပေးခဲ့သည် ပြောသွားခဲ့ခြင်းပင် ဖြစ်သည်။

သားသမီးများကတော့ ၎င်းတို့အား ရိုးသားမှုရှိရန် ပြောဆို ဆုံးမနေသည့် ဖခင်သည် ရရှိနေသည့် အစိုးရဝန်ထမ်းလစာနှင့် ရန်ကုန်၊ နေပြည်တော်နှင့် ပြင်ဦးလွင် တို့တွင် နန်းတော်တမျှ ခမ်းနားသော အိမ်ကြီးအိမ်ကောင်းများ အဘယ်ကြောင့် ပိုင်ဆိုင်နေရသနည်းဟု အတွေးများ ဝင်လာကြပြီး အ‌ကြောင်းရင်းကို သဘောပေါက်လာသည်နှင့်အမျှ တိုင်းပြည်အား ဖခင်ပေးသည့် အမွေအနှစ် ဆိုကာ ထင်တိုင်းကြဲလာခဲ့ကြသည်။

နောက်ထပ် ပြက်လုံးတခုကား စက်တင်ဘာ ၂၇ ရက် ကမ္ဘာ့ခရီးသွား‌လာရေးနေ့တွင် ကမ္ဘာလှည့် ခရီးသွားလုပ်ငန်းများ တိုးတက်ဖွံ့ဖြိုးလာစေရန် နိုင်ငံတဝန်း လုံခြုံစိတ်ချစွာ သွားလာနိုင်စွမ်း ရှိကြောင်း သတင်းမှန်များ ထုတ်ပြန်ပေးရန် ဝန်ကြီး၊ ဝန်ကလေးများကို ညွှန်ကြားခဲ့ခြင်းပင် ဖြစ်သည်။

၎င်း ထိုသို့မပြောမီ နှစ်လအလို ဇူလိုင်လအတွင်း ကမ္ဘာကျော် ငပလီကမ်းခြေအား အာရက္ခတပ်တော်မှ အပြီးအပိုင် သိမ်းပိုက်ခဲ့ပြီး ဖြစ်နေသည်။

မင်းအောင်လှိုင်သည် ထိုသို့ ပြက်လုံးဆန်ဆန် ဟာဒယရွှင်ဆေးများဖြင့် တိုင်းပြည်သည် ပုံမှန် ဖြစ်နေပါသည်ဟု ကမ္ဘာကို လှည့်ဖြားရန် မရမက ပြောဆိုလာခြင်း ဖြစ်သည်။

နိုင်ငံခြားသားများ မဆိုထားဘိ ပြည်တွင်းနေသူများပင် တနေရာမှ တနေရာသို့ ဘုရားစာရွတ်၍ သွားနေရသည့် အ‌နေအထားမျိုး ဖြစ်နေသည်။

၎င်းကဲ့သို့ပင် ဆက်သွယ်ရေးနှင့် ပို့ဆောင်ရေးဝန်ကြီးအဖြစ် ချောင်ထိုးခံထားရသော မြထွန်းဦး သည်လည်း ထူးမခြားနားပင် နိုင်ငံအတွင်း ကမ္ဘာလှည့်ခရီးသွားများ အကြိုက်နေရာများသည် လုံခြုံစိတ်ချရကြောင်း သတင်းမှန်များ ဖြန့်ဖြူးပြီး ဆွဲဆောင်ကြရန် ဗုဒ္ဓဟူးနေ့တွင် ပြုလုပ်သော ခရီးသွားလာရေး ဗဟိုလုပ်ငန်းကော်မတီ အစည်းအဝေးတွင် ပြောဆိုသွားပြန်သည်။

၎င်းတို့အားလုံး စိတ်ထဲ ဖြစ်စေချင်သည် မှန်သမျှ အပြင်တွင်လည်း တကယ်ဖြစ်နေသည်ဟု စွဲထင်နေသော စိတ္တဇဝေဒနာရှင်များဟု မဆိုက အခြားမည်သို့များ ပြော၍ ရနိုင်ပေဦးမည်နည်း။ ထိုသို့သော လူမျိုးများက တိုင်းပြည်ကို သားစဉ်မြေးဆက် အုပ်ချုပ်သွားရန် လုံးပန်းနေခြင်းကပင် ၅၄ သန်းသော ပြည်သူများ၏ အနာဂတ်အတွက် လွန်စွာ ကြောက်မက်ဖွယ်ကောင်းသော အန္တရာယ်ကြီး ကျရောက်လာ‌နေခြင်းပင် ဖြစ်သည်။

၎င်းတို့ကဲ့သို့ ရူးသွပ်ခြင်း မရှိရှာသည့် အမေရိကန်အစိုးရသည် နောက်တနေ့မှာပင် ၎င်းတို့၏ နိုင်ငံသားများအား မြန်မာပြည်သို့ ခရီးမသွားရန် အလန့်တကြား သတိပေးလာခဲ့သည်။

ထို့အပြင် အမေရိကန်မှ ၎င်း၏သား ပါဝင်ပတ်သက်နေသော Mytel တယ်လီကွန်း ကုမ္ပဏီအား နာမည်ပျက်စာရင်းသွင်းကာ ဒဏ်ခတ် ပိတ်ဆို့လိုက်ပြန်သည်။

ပြီးခဲ့သည် မတ်လ တော်လှန်ရေးနေ့တွင် ရခိုင်၊ ကချင်နှင့် ရှမ်းမြောက်‌ဒေသများရှိ ဆုံးရှုံးသွားသော နယ်မြေများကို ပြန်လည်သိမ်းယူရန် ထိုးစစ်များ ဆင်နွှဲတော့မည်ဟု ကြိမ်းဝါးခဲ့သော်ငြားလည်း ရက်သတ္တပတ် အနည်းငယ်အတွင်းမှာပင် လားရှိုးနှင့်အတူ အရှေ့မြောက်တိုင်း စစ်ဌာနချုပ်ကိုပါ လက်လွှတ်ခဲ့ရသည်။

၎င်းပြောသည့် ထိုးစစ်များက မည်ကာမတ္တမျှသာ ထွက်ပေါ်လာခဲ့သည်။ တိုင်းပြည် ပုံမှန်ဖြစ်ရန် ကြိုးပမ်းမှုမှန်သမျှကို အခိုင်အမာ ထောက်ခံကြောင်း တရုတ်ထံမှ ကတိကဝတ်များ ရခဲ့ပြီး‌နောက် လေကြောင်းမှ ဗုံးကြဲတိုက်ခိုက်မှုများ အရှိန်မြှင့်လာ‌သော်လည်း ရှုံးပြီးရင်းသာ ရှုံးလာနေပြီး အမ်းရှိ အနောက်ပိုင်းတိုင်း စစ်ဌာနချုပ်ကိုပါ ထပ်မံလက်လွှတ်ခဲ့ရသည်။

ဗျူဟာမြောက် ပြန်လည်စုစည်းနေသည် ဆိုသော်လည်း လက်တွေ့တွင် ဗုံးကြဲတိုက်ခိုက်မှုများသာ တိုး၍လာနေပြီး ဗုဒ္ဓဟူးနေ့တွင် ရမ်းဗြဲကျွန်းရှိ ကျောက်နီမော်ရွာကို လာရောက် ဗုံးကြဲခဲ့သဖြင့် ကျေးရွာသူ ကျေးရွာသား၊ အမျိုးသမီးနှင့် ကလေးများ အပါအဝင် ၄၀ ခန့် သေဆုံးခဲ့သည်ဆိုသော အေပီ သတင်းကို ကမ္ဘာတဝန်း သတင်းစာများက ကူးယူ ဖော်ပြခဲ့ကြသည်။

ကချင်လွတ်လပ်ရေးတပ်မတော်သည်လည်း နိုင်ငံမြောက်ပိုင်းတွင် အောင်ပွဲအလီလီ ရရှိလာခဲ့ရာ ဗုဒ္ဓဟူးနေ့ နံနက်တွင် မံစီရှိ ခမရ ၃၁၉၊ ၆၀၁ နှင့် အမြောက်တပ်ရင်း ၅၂၃ တို့ကို သိမ်းယူနိုင်ခဲ့မှုနှင့် အတူ မြို့ကို အလုံးစုံ ထိန်းချုပ်နိုင်ခဲ့သည်။

ခရိုင်မြို့တမြို့ဖြစ်သည့် ဗန်းမော်မြို့တွင်း တိုက်ပွဲများ ဖြစ်နေပြီး စစ်တပ်က လေကြောင်းမှ လက်နက်နှင့် ရိက္ခာများ ချပေးနေရသည့်အဖြစ် ရောက်လာသည်။

ချင်းပြည်နယ်တခုလုံးအားလည်း လက်လွှတ်ရဖို့ တဲတဲလေးသာ ကျန်တော့သည်ဟု မြေပြင် သတင်းများက ဆိုသည်။

ဤသည်က တော်လှန်ရေးနေ့တွင် ကြိမ်းဝါးခဲ့ပြီးနောက် ထွက်ပေါ်လာသော ၎င်း၏ စွမ်းဆောင်ရည်များသာ ဖြစ်သည်။

မင်းအောင်လှိုင်ဘက်တွင် လူအင်အား၊ လက်နက်အင်အားများ အစစအရာရာ သာလွန်နေပြီး လေကြောင်းမှလည်း အသာစီးရနေသည့်ကြားမှ နေ့စဉ်ရက်ဆက်ဆိုသလို အရေးနိမ့်နေသည်ကို ကြည့်ပြီး ပုံမှန်စိတ် ရှိသူများဆိုက ကာကွယ်ရေးဦးစီးချုပ် ဆိုသူ၏ အရည်အချင်းအပေါ် မဖြစ်မနေ မေးခွန်းထုတ်လာရတော့မည်သာ ဖြစ်သည်။

နိုင်ငံအုပ်ချုပ်‌ရေးပိုင်း ကြည့်ပြန်လျှင်လည်း အိမ်နီးချင်းတိုင်းပြည်များ မီးထိန်ထိန်လင်းနေချိန်တွင် တပြည်လုံးအား ဖယောင်းတိုင်ဖြင့် နေနိုင်ရန်အထိ စွမ်းဆောင်ရည် ထပ်မံ မြင့်တက်လာခဲ့သည်။

နောက်ထပ်ရရှိသော သတင်းအရ ၂၀၂၄ ဖေဖော်ဝါရီလအတွင်း နယူးယောက်ရှိ ဖက်ဒရယ် တရားရုံးတွင် မြန်မာရှိ လက်နက်ထုတ်လုပ်နိုင်သည့် အဆင့်ရှိ ယူရေနီယံနှင့် ပလူတိုနီယံများကို အီရန်သို့ တရားမဝင် ရောင်းချရန် စွဲဆိုခံထားရသည့် ဂျပန် ယာကူဇာဂိုဏ်းခေါင်းဆောင် တာကီရှိ အီဘီဆာဝါသည် ၎င်းတွင် အပြစ်ရှိကြောင်း တရားဝင် ဝန်ခံလိုက်ပြီ ဖြစ်သည်ဟု သိရသည်။

ထို့အတွက် မြန်မာစစ်ခေါင်းဆောင်များအား အမေရိကန်သည် မျက်ခြည်မပြတ် စောင့်ကြည့်လာ‌တော့မည် ဖြစ်သည်။

ပြည်သူတို့၏ ခုခံ တွန်းလှန်စစ် မုချ အောင်ရမည်!!!

လှစိုးဝေ

ကိုးကား - AP/Irrawaddy/CBS