စစ်ကိုင်းတိုင်း၊ ဝက်လက်မြို့နယ်မှာ ဇန်နဝါရီ ၅ ရက်​က စစ်ကောင်စီစစ်ကြောင်းနဲ့ တော်လှန်ရေးတပ်ဖွဲ့တွေ ဖြစ်ပွားခဲ့တဲ့ တိုက်ပွဲအတွင်း စစ်ကောင်စီဘက်က ၇၀ ကျော်သေဆုံးပြီး ၆ ယောက် အရှင်ဖမ်းမိကာ လက်နက် ၄၀ ကျော် သိမ်းဆည်းရရှိခဲ့တယ်လို့ ရွှေဘိုခရိုင် အမှတ် ၁၅ တပ်ရင်းက ပြောပါတယ်။

ဝက်လက်အရှေ့ဘက်ခြမ်းကို ထွက်လာတဲ့ စစ်ကြောင်းနဲ့ ကမှတ်ထိရွာနဲ့ မင်းကုန်းရွာ ၂ ရွာကြားမှာ တိုက်ပွဲဖြစ်ခဲ့ပြီး ၇၀ ကျော်သေကာ ၆ ယောက် အရှင်ဖမ်းမိခဲ့ပြီး လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ ဆိုပါတယ်။

တိုက်ခိုက်ခံရတဲ့ စစ်​ကောင်စီစစ်ကြောင်းဟာ ထိခိုက်သေဆုံးမှုများတဲ့အတွက် စစ်ကြောင်းတကြောင်းလုံး ပျက်စီးသွားခဲ့တယ်လို့လည်း ဆိုပါတယ်။

ရွှေဘိုခရိုင် အမှတ် ၁၅ တပ်ရင်းက တပ်ရင်းမှူး ဗိုလ်ကောက်ရိုးက “သူတို့ဘက်က အင်အား ၈၀ နီးပါးပါတဲ့ ရွှေဘို လကရ ၈ ထဲကနေ ထွက်လာကြတာ။ ဝက်လက်ဘက်ကို ရိက္ခာပို့သွားမယ့် ထောက်ပံ့နဲ့ ပို့ဆောင်ဆက်သွယ်ရေးတပ်တွေက ဖြစ်တယ်။ မနက် ၇ နာရီလောက်ကနေ ညနေ ၄ နာရီလောက်အထိ တနေကုန်နီးပါး တိုက်ပွဲဖြစ်ခဲ့တယ်။ သူတို့ဘက်က အလောင်းတွေတွေ့ရတဲ့ အရေအတွက်က ၇၁ လောင်းရှိတယ်။ အခုလို ထိထိရောက်ရောက် ဆောင်ရွက်နိုင်ခဲ့တာက ၁၀၂၇ စစ်ဆင်ရေး ဒုတိယလှိုင်းမှာ လက်နက်တွေရလာလို့ ဖြစ်တယ်” လို့ ပြောပါတယ်။

တိုက်ပွဲအတွင်း တော်လှန်ရေးတပ်ဖွဲ့တွေဘက်က ရဲဘော် ၂ ယောက် ကျဆုံးခဲ့သလို ရဲဘော် ၂ ယောက် ဒဏ်ရာရရှိခဲ့​ကာ MA3 သေနတ် ၁ လက်လည်း ပျက်စီးဆုံးရှုံးခဲ့ပါတယ်။

စစ်ကောင်စီဘက်ကလည်း ဂျက်ဖိုက်တာနဲ့ လေကြောင်းပစ်ကူ ၅ ကြိမ်ထက်မနည်း ပြုလုပ်သွားခဲ့တယ်လို့ ဒေသခံတော်လှန်ရေးတပ်ဖွဲ့က ပြောပါတယ်။

အဲဒီတိုက်ပွဲကနေ ၆၀ မမ ပြောင်းတို ၁ လက်၊ RPG 7 ၁ လက်၊ MA15 (ငါးကြင်းမြီး) ၁ လက်၊ MA4 ၂ လက်၊ MA3 ၄ လက်၊ MA1 ၁၀ လက်၊ G3 ၁၇ လက်၊ M79 ၁ လက်၊ MA13 ၅ လက်၊ MA11 ၁ လက်၊ BA93 ၁ လက်၊ 5.56 ကျည် ၁,၁၆၄ တောင့်၊ G3 ကျည် ၁,၆၇၈ တောင့်၊ ၉မမ ကျည် ၃၆၅ တောင့်၊ ကာဘိုင်ကျည် ၃၉၇ တောင့်၊ အီနာဂါကျည် ၁၄ တောင့်၊ ငါးကြင်းမြီး ကျည်ကပ် ၁ ခု၊ နာနတ်သီးဗုံး ၃ လုံး၊ သံပုရာသီးဗုံး ၁ လုံး၊ အီနာဂါဗုံးသီး ၁၀ လုံး၊ ၆၀ မမ ဗုံးသီး ၆ လုံး၊ RPG 7 ဒုံးသီး ၇ လုံး၊ RPG ကျည် ၇ ခု၊ နင်းမိုင်း ၅ လုံး၊ MA ကျည်အိမ် ၄၂ ခု၊ G3 ကျည်အိမ် ၃၈ ခု၊ MA13 ကျည်အိမ် ၁၁ ခု၊ Jammer အကြီး ၁ ခုနဲ့ ကျည်ကာဦးထုပ် ၁၀ လုံးတို့ သိမ်းဆည်းရရှိခဲ့တယ်လို့လည်း အမှတ် ၁ စစ်ဒေသက သတင်းထုတ်ပြန်ပါတယ်။

အဆိုပါတိုက်ခိုက်မှုကို ရွှေဘိုခရိုင် အမှတ် ၁၅ တပ်ရင်း၊ အမှတ် ၂၃ တပ်ရင်း၊ အမှတ် ၂ ခရိုင်ကွပ်ကဲရေး ရွှေဘိုခရိုင် တပ်ရင်း ၁၊ တပ်ရင်း၂၊ မြို့နယ် ပကဖနဲ့ ဝက်လက်တိုက်နယ် ၂ အဖွဲ့တို့ ပူးပေါင်းတိုက်ခိုက်ခဲ့ကြတာဖြစ်တယ်လို့ သိရပါတယ်။

ဇန်နဝါရီ ၅ ရက် မနက်စောပိုင်းကလည်း ဝက်လက်မြို့နယ်ထဲက အုန္နဲဘုတ်ရွာထဲကို ၀င်စီးကာ ပြည်သူပိုင်ပစ္စည်းတွေယူပြီး ညအိပ်စခန်းချနေကြတဲ့ စစ်ကိုင်းအခြေစိုက် တပ်မ ၃၃ လက်အောက်ခံ စစ်သားအင်အား ၇၀ နီးပါးကို တော်လှန်ရေးတပ်ဖွဲ့တွေက ဝင်ရောက်တိုက်ခိုက်ခဲ့လို့ စစ်ကောင်စီတပ်ဖွဲ့ဝင် ၂၀ နီးပါး သေဆုံးကာ စစ်သား ၃ ယောက် အရှင်ဖမ်းမိသလို လက်နက်ခဲယမ်းတွေလည်း သိမ်းဆည်းရရှိခဲ့ပါသေးတယ်။

စစ်ကောင်စီတပ်ဖွဲ့ဝင်တွေ တိုက်ခိုက်ခံရတာနဲ့ပတ်သက်ပြီး စစ်ကောင်စီဘက်ကတော့ သတင်းတစုံတရာ ထုတ်ပြန်လာတာ မတွေ့ရသေးပါဘူး။