မကွေးတိုင်း၊ ပေါက်မြို့နယ်၊ ရေပြာရဲစခန်း အချုပ်ခန်းမှာ ဖမ်းဆီးခံထားရတဲ့ ပြည်သူ့ကာကွယ်ရေးတပ်ဖွဲ့ဝင် ၅ ယောက်ဟာ နိုဝင်ဘာ ၂၅ ရက်မှာ ထွက်ပြေးလွတ်မြောက်လာခဲ့တယ်လို့ ပခုက္ကူခရိုင် အမှတ် ၁၆ (Pakkokku Generation Z) ရဲ့ ပြန်ကြားရေးတာဝန်ခံဆီကနေ သိရပါတယ်။
“ကျနော်တို့ ပခုက္ကူခရိုင် အမှတ် ၁၆ တပ်ရင်းက ရဲဘော် ၃ ဦးရယ်၊ LPDF တခုက အမျိုးသမီးတပ်ဖွဲ့ဝင် ရဲမေတဦးနဲ့ နောက်ထပ်ရဲဘော်တဦးတို့က အဲဒီနေ့ မနက်စော ၂ နာရီလောက်မှာ အချုပ်ဆောင်ကိုဖောက်ပြီး လွတ်မြောက်လာတာပါ။”
ပခုက္ကူခရိုင် အမှတ် ၁၆ PDF တပ်ရင်းက ရဲဘော် ၃ ယောက်ဟာ ပြီးခဲ့တဲ့ ဩဂုတ် ၈ ရက်က တပ်ဖွဲ့အလုပ်ကိစ္စနဲ့ ခရီးသွားကြရင်း ရေပြာရဲစခန်း စစ်ဆေးရေးဂိတ်အနီးမှာ ဖမ်းဆီးခံခဲ့ရတာဖြစ်ပြီး ကျန်တဲ့ PDF ရဲဘော် ၂ ယောက်ကတော့ မေလထဲမှာ အဖမ်းခံရတာ ဖြစ်တယ်လို့ ဆိုပါတယ်။
“အချုပ်ထဲမှာကို နေ့ရောညပါ လက်ထိပ်အမြဲခတ်ထားတာ၊ ကင်းသမားတွေ ငိုက်တဲ့အချိန် အချုပ်ခန်းကိုဖောက်ပြီး ပြေးလာကြတာပါ။ အခုတော့ သူတို့ ၅ ယောက်လုံး လုံခြုံတဲ့နေရာကို ရောက်ပါပြီ။”
အချုပ်တရားခံတွေ လွတ်မြောက်သွားတာနဲ့ပတ်သက်ပြီး ပေါက်မြို့နယ်က ပျူစောထီးခေါင်းဆောင် ပေါက်ကိုယ်တော်ကတော့ ရေပြာရဲစခန်းက စခန်းမှူးကို ဖုန်းဆက်ပြီး ငေါက်ငန်းပြစ်တင်ပြောဆိုထားသလို ရေပြာရဲစခန်းမှူးကလည်း အချုပ်တရားခံတွေ လွတ်မြောက်သွားတယ်ဆိုတာ ဝန်ခံထားပါတယ်။
တော်လှန်ရေးတပ်ပေါင်းစုတွေဟာ ပေါက်မြို့နယ်အရှေ့ဘက် ၁၂ မိုင်ဝန်းကျင်ကွာဝေးတဲ့ ရေပြာရဲစခန်းကို ပြီးခဲ့တဲ့ ၂၀၂၂ ဖေဖော်ဝါရီလထဲမှာ တိုက်ခိုက်ခဲ့တဲ့အတွက် စခန်းမှူး အပါအဝင် ရဲတပ်ဖွဲ့ဝင် ၅ ယောက် သေဆုံးခဲ့ပါတယ်။
