ရန်ကုန် အင်းစိန်အကျဥ်းထောင်မှာ စစ်ကောင်စီရဲ့ ဖမ်းဆီးအကျဉ်းချခံထားရတဲ့ ဓာတ်ပုံ သတင်းထောက် ကိုကျော်စွာထွန်းဟာ နိုဝင်ဘာ ၁၄ ရက် မနက်ပိုင်းက ပြန်လည်လွတ်မြောက်လာပါတယ်။
သတင်းထောက် ကိုကျော်စွာထွန်းကို ပြီးခဲ့တဲ့ ၂၀၂၂ ခုနှစ် စက်တင်ဘာ ၈ ရက်က သင်္ဃန်းကျွန်းမြို့နယ် ရတနာလမ်းအနီးမှာ ဒရုန်းစမ်းသပ်မောင်းနှင်ခဲ့မှုကြောင့် စစ်ကောင်စီက ဖမ်းဆီးထိန်းသိမ်းခဲ့ပြီး ၂၀၂၃ ခုနှစ် ဇန်နဝါရီမှာ ရာဇသတ်ကြီးပုဒ်မ ၅၀၅(က) နဲ့ ထောင်ဒဏ် ၃ နှစ် ချမှတ်ခံရတာ ဖြစ်ပါတယ်။
ကိုကျော်စွာထွန်းဟာ ဖမ်းဆီးခံရပြီးနောက် ၂ နှစ် ၂ လအကြာမှာ ပြန်လွတ်ခဲ့တာလို့ သူနဲ့နီးစပ်သူတွေထံက သိရပါတယ်။
ပြန်လည်လွတ်မြောက်ခဲ့တဲ့ သတင်းထောက် ကိုကျော်စွာထွန်းက “တနိုင်ငံလုံးက အကျဉ်းထောင်တွေမှာ ကျနော့်နည်းတူ ဖမ်းဆီးထိန်းသိမ်းခံထားရတဲ့ သတင်းသမားတွေကိုလည်း အမြန်ဆုံး ပြန်လည်လွတ်မြောက်စေချင်ပါတယ်” လို့ ပြောပါတယ်။
သတင်းထောက် ကိုကျော်စွာထွန်းဟာ 7 Day TVမှာ သတင်းထောက်အဖြစ် လုပ်ကိုင်ဖူးခဲ့သလို Mizzima မီဒီယာမှာလည်း Fact Checker အဖြစ် တာဝန်ထမ်းဆောင်ခဲ့သူတယောက်လည်း ဖြစ်ပါတယ်။
မြန်မာနိုင်ငံတဝန်း အကျဉ်းထောင်တွေမှာ အကျဉ်းချခံထားရတဲ့ ဂျာနယ်လစ် အယောက် ၆၀ လောက်ရှိတယ်လို့ ပြင်သစ်အခြေစိုက်နယ်စည်းခြားသတင်းထောက်များအဖွဲ့ ( RSF) က ထုတ်ပြန်ထားပါတယ်။
၂၀၂၁ စစ်တပ်အာဏာသိမ်းပြီးနောက်ပိုင်းမှာ သတင်းမီဒီယာနဲ့ စပ်ဆက်လုပ်ငန်းတွေကို လုပ်ကိုင်တဲ့ ထုတ်ဝေသူ၊ ရိုက်ကူးရေးသမား၊ သတင်းထောက်တွေအပြင် သတင်းထောက်အဖြစ် အလုပ်လုပ်ကိုင်ခဲ့ဖူးသူ အနည်းဆုံး ၁၇၂ ယောက် ဖမ်းဆီးခံခဲ့ရတယ်လို့ DVB ကပြုစုထားတဲ့ စာရင်းတွေအရ သိရပါတယ်။
သေဆုံးခဲ့တဲ့ သတင်းထောက် ၄ ယောက် ရှိပြီး လက်ရှိထောင်တွေထဲမှာ အမှုရင်ဆိုင်နေဆဲနဲ့ မတရား ပြစ်ဒဏ်ချမှတ်ခံထားရတဲ့ သတင်းသမား ၅၀ ကျော် အကျဥ်းကျခံနေရဆဲ ဖြစ်ပါတယ်။
စစ်အာဏာသိမ်းပြီးနောက် ဖမ်းဝရမ်းထုတ်တရားစွဲခံထားရတဲ့ သတင်းထောက် အယောက် ၅၀ ထက်မနည်း ရှိနေပြီ ထုတ်ဝေခွင့်ပိတ်သိမ်းခံရတဲ့ သတင်းဌာနပေါင်းက DVB အပါအဝင် ၁၄ ခု ရှိနေပါတယ်။
