တနင်္သာရီတိုင်း၊ မြိတ်-ပုလော ပြည်ထောင်စုကားလမ်းမကြီးမှာ တိုက်ပွဲကြောင့် ခရီးသွားကားလမ်း ပိတ်လိုက်ပြီးနောက်မှာ မြိတ်ကနေ ပုလောဘက်ကို စပိဘုတ်နဲ့ ပြေးဆွဲနေတယ်လို့ ခရီးသွားလုပ်ငန်း လုပ်ကိုင်နေသူတွေဆီက သိရပါတယ်။
မြိတ်-ပုလော ကားလမ်းပိတ်ပြီးနောက်ပိုင်းမှာ ရေလမ်းကတဆင့် ကုန်ပစ္စည်း ပို့ဆောင်ပေးရာကနေ ခရီးသွားတွေရဲ့ တောင်းဆိုမှုကြောင့် အခုလို စပိဘုတ်ယာဉ်နဲ့ ခရီးသည်တွေကို ပြေးဆွဲပေးတာလို့ ပြောပါတယ်။
ခရီးသွားလုပ်ငန်း လုပ်ကိုင်သူတယောက်က “ပြောရရင် ပထမ အရေးကြီးကုန်တွေ သယ်ယူချင်လို့ ငှားကြတာပါ။ နောက်တော့ ခရီးသည်တွေလည်း ၃ ရက်၊ ၄ ရက်လောက် ကြာလာတော့ ဈေးကြီးလည်း ကြီးပါတော့ဆိုပြီး တောင်းဆိုရာကနေ ဈေးတခုသတ်မှတ်ပြီး ပို့ဆောင်ပေးဖြစ်ပါတယ်” လို့ ပြောပါတယ်။
အခုလို ခရီးစဉ်ပြေးဆွဲရာမှာ တချို့ စပိဘုတ်ယာဉ်တွေက တနေ့မှာ တခေါက်ပဲ ပြေးဆွဲနေတာလည်း ရှိသလို တနေ့ကို နှစ်ကြိမ်ကနေ သုံးကြိမ်အထိ ပြေးဆွဲနေတဲ့ စပိဘုတ်ယာဉ်တွေလည်း ရှိတယ်လို့ သိရပါတယ်။
ပုလောမြို့နယ်၊ ကျောက္ကာရွာမှာ အောက်တိုဘာ ၂၀ ရက် ည ၉ နာရီလောက်က စက်လှေတိမ်းမှောက်ပြီးနောက် ရေလမ်းခရီးကနေ သွားလာမရဲကြတဲ့ ခရီးသည်တွေ ရှိလာပြီး ရာသီဥတုအပေါ် မူတည်ကာ ခရီးသွားလာတာတွေ များလာတယ်လို့ သူက ဆက်ပြောပါတယ်။
“စပိဘုတ်တွေ ကျပ်လာပါတယ်။ လှေမြုပ်သတင်း နောက်ဆက်တွဲက ခရီးသည်တွေ အမေးများလာကြတာက ဘယ်နှယောက်စီးလဲ၊ ရာသီဥတုကောင်းလား၊ အဲလိုတွေ မေးမြန်းတာ များလာပါတယ်။ ခရီးသည်က လျော့မသွားပါဘူး။”
မြိတ်-ပုလော ကားလမ်းပိုင်းမှာ အခုနှစ် အောက်တိုဘာ ၁၄ ရက်ကစပြီး ထိတွေ့တိုက်ပွဲတွေ ပြင်းထန်လာတာကြောင့် ခရီးသည်ကား၊ ကုန်ကားတွေ အများအပြား ပိတ်မိခဲ့တယ်လို့ ခရီးသွားပြည်သူတွေဆီက သိရပါတယ်။
