ရန်ကုန်၊ ဒဂုံဆိပ်ကမ်းမြို့နယ်၊ ၆၁ ရပ်ကွက် အုပ်ချုပ်ရေးမှူးရုံးမှာ အမျိုးသမီးတယောက်ကို သူခိုးလို့စွပ်စွဲပြီး ရိုက်နှက်ခဲ့တဲ့ အုပ်ချုပ်ရေးမှူး အပါအဝင် ၈ ယောက်ကို စစ်ဆေးနေတယ်လို့ မြို့ခံတွေဆီက သိရပါတယ်။
တောင်ဒဂုံမြို့နယ်၊ ၆၆ ရပ်ကွက်၊ အင်းဝအိမ်ရာမှာနေတဲ့ အမျိုးသမီးတယောက်ကို အောက်တိုဘာ ၉ ရက်က ၆၁ ရပ်ကွက် အုပ်ချုပ်ရေးမှူးရုံးက ခေါ်ကာ သူခိုးလို့စွပ်စွဲပြီး ၅ ရက်တိုင် ကြိုးနဲ့တုပ်ကာ ရိုက်နှက်ခဲ့တာလို့ ဖြစ်စဥ်ကို သိသူတယောက်က DVB ကို ပြောပါတယ်။
“ဒဂုံဆိပ်ကမ်းက ဘုန်းကြီးတပါးက သူ့ကျောင်းကပစ္စည်း ခိုးတယ်ဆိုပြီး အုပ်ချုပ်ရေးမှူးနဲ့ ပေါင်းပြီး ကြိုးတုပ်ရိုက်တာ။ ဘုန်းကြီးကျောင်းမှာ ၃ ရက်၊ ရုံးမှာ ၂ ရက် ရေပိုက်ကြိုးတွေနဲ့ ရိုက်တာ။”
စွပ်စွဲခံရတဲ့ အမျိုးသမီးကို ဒဂုံဆိပ်ကမ်းမြို့နယ်ရှိ ရာဇဂြိုဟ်ပရိယတ္တိ စာသင်တိုက်မှာ ၂ ရက်၊ ၆၁ ရပ်ကွက် အုပ်ချုပ်ရေးမှူးရုံးမှာ ၃ ရက်၊ ကြိုးတုပ်ရိုက်ခဲ့တဲ့အတွက် ခန္ဓာကိုယ်အနှံ့ ဒဏ်ရာတွေ ရခဲ့တယ်လို့ အုပ်ချုပ်ရေးနဲ့နီးစပ်တဲ့ သတင်းရင်းမြစ်က DVB ကို ပြောပါတယ်။
“ဘုန်းကြီးက တပ်ကကိုးကွယ်တဲ့ ဘုန်းကြီးဆိုတော့ ဘုန်းကြီးခိုင်းသမျှ အုပ်ချုပ်ရေးမှူးက လုပ်တာ၊ ၁၄ ရက်နေ့ညကမှ အဲ့အမျိုးသမီးက ရဲစခန်းမှာ အမှုလာဖွင့်တာ၊ အားလုံး ၈ ယောက်။”
ရိုက်နှက်ခံရတဲ့ အမျိုးသမီးမှာ ဒဂုံဆိပ်ကမ်းမြို့နယ် ရာဇဂြိုဟ်ပရိယတ္တိ စာသင်တိုက်မှာ ဆွမ်း၊ ဆေး၊ ပစ္စည်း လှူဒါန်းနေတဲ့ အမျိုးသမီးလည်း ဖြစ်ပါတယ်။
လတ်တလောမှာ ဒဂုံဆိပ်ကမ်းမြို့နယ်ရဲစခန်းက ၆၁ ရပ်ကွက် အုပ်ချုပ်ရေးမှူး ဦးတင်မောင်ဆွေ၊ အဖွဲ့ဝင် ဦးသာထွန်းလှ၊ ဆရာတော် ဦးသူရဓမ္မ အပါအဝင် ၈ ဦးကို (ပ) ၄၈၃၊ ၂၀၂၄ ပုဒ်မ ၂၉၄၊ ၃၄၃၊ ၃၂၃၊ ၅၀၆/၁၀၄ နဲ့ အမှုဖွင့်စစ်ဆေးနေတယ်လို့ ရဲတပ်ဖွဲ့ဆီက သိရပါတယ်။
