နေပြည်တော်ကောင်စီနယ်မြေမှာ စစ်ကောင်စီစစ်ကြောင်း တိုက်ခိုက်ခံရလို့ စစ်သား ၃ ယောက် သေဆုံး၊ အများအပြား ဒဏ်ရာရသွားပြီး ရှမ်းပြည်နယ်မြောက်ပိုင်း၊ နမ့်လန်မြို့တွင်းကို သြဂုတ် ၁၆ ရက် ညနေပိုင်းမှာ လက်နက်ကြီးကျရောက်လို့ အိမ်တချို့ပျက်စီးခဲ့ပါတယ်။
ပျဉ်းမနားမြို့နယ်က ဘိုမအထက်ကျေးရွာနဲ့ ကိုးဒစ်တဲစုကျေးရွာကြားမှာ သြဂုတ် ၁၆ ရက်နေ့၊ မနက် ၇ နာရီခွဲဝန်းကျင်က စစ်ကောင်စီစစ်ကြောင်းကို ကြားဖြတ်တိုက်ခိုက်ခဲ့လို စစ်ကောင်စီတပ်သား ၃ ယောက် သေဆုံး၊ အများအပြားဒဏ်ရာရသွားကြတယ်လို့ ဗိဿနိုးနယ်မြေ ပြည်သူ့ကာကွယ်ရေး တပ်မတော်တပ်ရင်း ၃၊ (တောင်တွင်းကြီး- BTO PDF) ဆီကနေ သိရပါတယ်။
BTO PDF တပ်ရင်း ၃ (တောင်တွင်းကြီး) ရဲ့ ပြန်ကြားရေးတာဝန်ခံက “ကျနော်တို့ဆီကို ဖရဲသီးက အချိန်နဲ့တပြေးညီ သတင်းပေးတာကြောင့် သူတို့စစ်ကြောင်းအပြန်လမ်းကနေစောင့်ပြီး ကြားဖြတ်တိုက်ခိုက်ခဲ့တာပါ။ သူတို့ဘက်က စစ်သား ၃ ကောင်သေတယ်ဗျ။ ဒဏ်ရာရတဲ့သူတွေလည်းများတယ်။ သူတို့ဘက်က သေတဲ့သူတွေရဲ့လက်နက်တွေကို ကျန်တဲ့ကောင်တွေကပြန်ကောက်သွားကြလို့ လက်နက်တွေတော့ မရခဲ့ဘူး” လို့ DVB ကို ပြောပါတယ်။
စစ်ကောင်စီတပ်ဖွဲ့ဝင် အင်အား ၁၅၀ လောက်ပါတဲ့စစ်ကြောင်းဟာ ဘိုမအထက်ကျေးရွာဘက်ကနေ စစ်ကြောင်းထိုးပြီးအပြန် ကိုးဒစ်တဲစုကျေးရွာမရောက်ခင် ရွာ ၂ ရွာကြားမှာ ကြားဖြတ် တိုက်ခိုက်ခဲ့တာဖြစ်တယ်လို့ ဆိုပါတယ်။
BTO PDF တပ်ရင်း ၃ (တောင်တွင်းကြီး) ရဲ့ ပြန်ကြားရေးတာဝန်ခံက “ကျနော်တို့ ပူးပေါင်း တပ်ဖွဲ့တွေဘက်ကတော့ အထိအခိုက်မရှိဘဲပြန်လည်ဆုတ်ခွာနိုင်ခဲ့ကြပါတယ်။ BTO PDF တပ်ရင်း ၃ (တောင်တွင်းကြီး) ဟာ အခြားစစ်မျက်နှာတွေမှာရှိတဲ့ မဟာမိတ်တပ်ဖွဲ့နဲ့လည်း ပူးပေါင်း တိုက်ပွဲဝင်နေပါတယ်” လို့ ပြောပါတယ်။
အဲဒီတိုက်ခိုက်မှုကို သံတောင်မြောက်ပိုင်းအထူးဒေသအဖွဲရဲ့ဦးဆောင်မှုနဲ့ ဗိဿနိုးနယ်မြေ ပြည်သူ့ကာကွယ်ရေး တပ်မတော်တပ်ရင်း ၃ (တောင်တွင်းကြီး) အပါအဝင် Mercury Revolution Force (MRF) တို့ ပူးပေါင်း တိုက်ခိုက်ခဲ့တာဖြစ်တယ်လို့ သိရပါတယ်။
ရှမ်းပြည်နယ်မြောက်ပိုင်း၊ နမ့်လန်မြို့မှာ ကိုးကန့်တပ်ဖွဲ့ MNDAA နဲ့ စစ်ကောင်စီတပ်တို့ နှစ်ဖက် ပစ်ခတ်မှုကြောင့် မြို့တွင်းကို လက်နက်ကြီးကျည် ကျရောက်ပေါက်ကွဲခဲ့ပြီး နေအိမ် ၂ လုံးထိမှန် ပျက်စီးခဲ့တယ်လို့ ဒေသခံတွေဆီက သိရပါတယ်။
သြဂုတ် ၁၆ ရက် မနက်ပိုင်းကစလို့ နှစ်ဖက်စစ်ရေးပြင်းထန်ခဲ့ပြီး ညနေ ၃ နာရီခွဲလောက်မှာ မြို့တွင်းကို လက်နက်ကြီးကျရောက်ပေါက်ကွဲတာလို့ ဒေသခံတယောက်က ပြောပါတယ်။
“မနက်ပိုင်းကတည်းက လက်နက်ကြီးတွေနဲ့တအားပစ်နေကြတာ။ ကောင်းလန်းရပ်ကွက်ထဲက အိမ် ၂ လုံးတော့ ပျက်စီးသွားပြီ။ လူတွေတော့ထိခိုက်တာမရှိဘူး။ တချို့လူတွေလည်း မနေရဲတော့လို့ အကုန်ရှောင်သွားကြပြီ” လို့ ပြောပါတယ်။
ပြီးခဲ့တဲ့ သြဂုတ် ၁၄ ရက်နေ့က သီပေါမြို့နယ်၊ နောင်ကော်ကြီးရွာအခြေစိုက် စစ်ကောင်စီတပ် ခလရ ၁၄၇ ကို MNDAA က စတင်တိုက်ခိုက်ခဲ့ရာကနေ နမ့်လန်မြို့နားမှာ တိုက်ပွဲတွေ စတင်ဖြစ်လာတာလို့ ဒေသခံတွေဆီက သိရပါတယ်။
ဒါ့အပြင် နမ့်လန်မြို့အခြေစိုက် စစ်ကောင်စီရဲ့ ခမရ ၅၀၆ ကိုလည်း ထိုးစစ်ဆင် တိုက်ခိုက်နေတာကြောင့် ဒေသခံတွေဟာ လဲချားနဲ့ ပင်လုံမြို့ဘက်ကို ထွက်ပြေး တိမ်းရှောင်နေရသလို နမ့်လန်နားက သီပေါမြို့ကို TNLA က ထိန်းချုပ်ထားပြီး ခလရ ၂၃၊ ခမရ ၅၀၃၊ ၅၀၄ တပ်ရင်းတို့ကိုလည်း ထိုးစစ်ဆင်တိုက်ခိုက်နေတယ်လို့ သိရပါတယ်။
