စစ်ကောင်စီတပ် စကခ ၂၁၊ ခလရ ၃၄၈၊ ခလရ ၂၂၃၊ ခလရ ၂၇၆ တပ်တွေအခြေစိုက်တဲ့ မိုးမိတ်မြို့မှာ တိုက်ပွဲတွေပြင်းထန်နေပြီး ဇူလိုင် ၃ ရက်ကနေ ၉ ရက်အထိ တပတ်အတွင်း တပ်စခန်း ၅ ခုကိုသိမ်းပိုက်ထားနိုင်ကြောင်း TNLA က ထုတ်ပြန်ပါတယ်။

ဇူလိုင် ၃ ရက်မှာ ရွှေသာယာတပ်စခန်း၊ ၇ ရက်နေ့မှာ လက်ခုပ်ပင်စခန်း၊ လက်ခုပ်သံစခန်းနဲ့ လယ်ကြီးစခန်း၊ ၉ ရက်နေ့မှာတော့ သရက်တောစခန်းတွေကို သိမ်းပိုက်နိုင်ခဲ့ပြီး အရပ်သားထိခိုက်မှုတွေလည်း ရှိခဲ့တယ်လို့ ဆိုပါတယ်။

PSLF/TNLA ပြောရေးဆိုခွင့်ရ လွေးယေဦးက  “တိုက်ပွဲမှာတော့ ကျမတို့မိုးမိတ်မှာတည်ရှိတဲ့ သရက်တော တပ်စခန်းကိုတော့ သိမ်းပိုက်နိုင်ခဲ့တယ်။ မိုးမိတ်မှာဆိုရင်တော့ စစ်ကောင်စီရဲ့ တပ်စခန်း ၅ ခုကို ကျမတို့သိမ်းပိုက်နိုင်ခဲ့ပြီ။ လက်ရှိမှာတော့ တပ်စခန်း ၄ ခုတော့ကျန်ပါသေးတယ်” လို့ ပြောပါတယ်။

ဒါပေမဲ့ အခုသိမ်းပိုက်ထားတဲ့ စခန်းတွေထဲ တပ်ရင်းစခန်းတွေ ပါ၊ မပါကိုတော့ အသေးစိတ်မပြောခဲ့ပါဘူး။

ဇူလိုင် ၆ ရက်နဲ့ ၇ ရက်နေ့တွေမှာ မိုးမိတ်မြို့ထဲက စစ်ကောင်စီတပ်တွေကို တအာင်းအမျိုးသားလွတ်မြောက်ရေးတပ်မတော် (TNLA) ဦးဆောင်တဲ့ ပူးပေါင်းတပ်တွေက ဝင်ရောက်တိုက်ခိုက်လို့ မြို့တွင်းတိုက်ပွဲပြင်းထန်ခဲ့ပြီး ၈ ရက်နေ့ကစလို့ မြို့ပြင်နားက တပ်ရင်းတွေကနေ လက်နက်သံတွေကြားခဲ့ရတာလို့ သိရပါတယ်။

မြို့တွင်းနဲ့ ၂ မိုင်ပတ်လည်မှာ ဖုန်းလိုင်းတွေပြတ်တောက်နေပြီး မြို့ထဲအိမ်စောင့်ကျန်နေခဲ့တဲ့ မိသားစုဝင်နဲ့ ဇူလိုင် ၉ ရက်နေ့လယ် ပိုင်းလောက်ကစလို့ အဆက်အသွယ်ပြတ်တောက်သွားပြီလို့ မိုးမိတ်မြို့ခံ စစ်ရှောင်အမျိုးသမီးတစ်ယောက်က ပြောပါတယ်။

“အခုကတော့ လယ်ကြီးဆိုတဲ့ရွာ၊ သရက်တောဆိုတဲ့ရွာက စစ်တပ်ကုန်းနဲ့ နီးနေပြီပေါ့နော်။ ရှိရင်‌တောင် ၁ မိုင်လောက်တောင်မရှိတော့ဘူး အစ်ကိုရယ်။ အဲနားမှာတော့ တွယ်နေကြတယ်လို့ ကြားတယ်ရှင့်၊ ပစ်နေကြပြီပေါ့။ အဲနားထိ‌တော့ ရောက်သွားပြီပေါ့။ မြို့ထဲကနေဖြတ်ပြီးတော့ ကတော့။ လေယာဉ်နဲ့ပစ်တာတို့၊ လက်နက်ကြီးတွေနဲ့ ထုတာတို့ ဆိုတာ အိမ်ဘေးပတ်လည်နားတွေကို ကျတာပေါ့။ အိမ်ဘေးပတ်လည်နားတွေကျတာဆိုတော့ အိမ်ရဲ့ခေါင်မိုးပေါ်တွေရော၊ တခါတရံကျရင် မီးဖိုချောင်တွေရော ကျတယ်ဆိုတော့ ကျမတို့ ခိုနေတဲ့ နေရာကနေမထွက်ရဲတော့လေ၊ သူတို့လည်းအပြင်ရဲ့ကိစ္စတော့ ဘာမှမသိရသေးတာပေါ့။”

ဇူလိုင် ၉ ရက်နေ့တိုက်ပွဲမှာ စစ်တပ်က ဂျက်ဖိုက်တာနဲ့ ဗုံးကြဲတာကြောင့် ရွှေတောင်ဦးက ၁၁ နှစ်အရွယ် ကလေးငယ် တစ်ဦးသေပြီး ဘုန်းကြီး တစ်ပါးအပါအဝင် ၃ ဦးထိခိုက်ခဲ့ရကြောင်း TNLA က ထုတ်ပြန်ထားပါတယ်။

TNLA ကတော့ PLA၊ PDF၊ မိုးကုတ်ဗျုဟာ ပူးပေါင်းတပ်ဖွဲ့နဲ့ စစ်ကောင်စီတပ် စကခ(၂၁)၊ ခလရ (၃၄၈)၊ ခလရ (၂၂၃)၊ ခလရ (၂၇၆) တို တိုက်ပွဲပြင်းပြင်းထန်ထန်ဖြစ်နေတယ်လို့ ဇူလိုင် ၅ ရက်နေ့ထဲက အသိပေးခဲ့ပါတယ်။

အခုချိန် ရိက္ခာနဲ့ စက်သုံးဆီတွေပြတ်တောက်လာပြီး မြို့ထဲအိမ်စောင့်ကျန်နေခဲ့တဲ့ ဒေသခံတချို့ကတော့ မြို့ပြင်တွေမှာရှိတဲ့ ကျေးရွာတွေဆီ စစ်ရှောင်ကြတယ်လို့ ပြောကြပေမဲ့ အခြေအနေအသေးစိတ်ကိုတော့ အတည်မပြုနိုင်သေးပါဘူး။

မိုးမိတ်မြို့မှာ ဇန်နဝါရီလကတည်းက မြို့တွင်းတိုက်ပွဲတွေဖြစ်ခဲ့ပြီး အခုဇူလိုင်လအထိ ၇ လနီးပါးအကြာမှာ မြို့သိမ်းတိုက်ပွဲတွေ ထပ်ဖြစ်လာတာပါ။ 

စိုးသူအောင်