မိုးမိတ်နဲ့ နောင်ချိုတို့မှာ ဒီနေ့ တိုက်ပွဲဖြစ်နေပြီး နောင်ချို့ ရှုခင်းသာက ခလရ ၁၄၆ စခန်းတိုက်ပွဲကနေ စစ်ကောင်စီတပ်သား အလောင်း ၁၀ လောင်နဲ့ လက်နက်ခဲယမ်းမျိုးစုံ သိမ်းဆည်းရရှိခဲ့တယ်လို့ ပလောင်ပြည်နယ် လွတ်မြောက်ရေးတပ်ဦး (PSLF/TNLA) က ထုတ်ပြန်ပါတယ်။

၁၀၂၇ စစ်ဆင်ရေး အပိုင်း ၂ ရဲ့ ဒီနေ့ ဇွန် ၂၉ ရက် နေ့လယ်အချိန်ထိ ရတဲ့ တိုက်ပွဲသတင်းအကျဉ်းချုပ်ကို ထုတ်ပြန်လာတာဖြစ်ပြီး မနက် ၅ နာရီခွဲလောက်က တအာင်းပြည်၊ တပ်မဟာ ၃ စစ်ဒေသ မိုးမိတ်မြို့နယ်၊ ရွှေဆာလီကျေးရွာမှာ စစ်ကောင်စီနဲ့ တိုက်ပွဲဖြစ်ခဲ့သလို ၃။ မိုးမိတ်မြို့နယ်၊ လွယ်ဝိန်းတောင်က စကခ၂၁၊ ခလရ ၂၂၃ တပ်စခန်းမှာလည်း တိုက်ပွဲဖြစ်တယ်လို့ ဆိုပါတယ်။

ပြီးတော့ နောင်ချိုမြို့နယ်၊ ခလ၇ ၆၀၆ မှာလည်း မနက် ၄ နာရီခွဲကျော်က တိုက်ပွဲဖြစ်ခဲ့သလို မနက် ၇ နာရီမှာတော့ နောင်ချိုမြို့နယ်၊ ရှုခင်းသာက ခလ၇ ၁၄၆ စခန်းတိုက်ပွဲကနေ စစ်ကောင်စီတပ်သား အလောင်း ၁၀ လောင်းနဲ့ လက်နက်ခဲယမ်းမျိုးစုံ သိမ်းဆည်း ရမိတယ်လို့ ဆိုပါတယ်။

မနက် ၇ နာရီခွဲလောက်မှာလည်း မိုးမိတ်မြို့နယ်၊ လယ်ကြီးက စစ်ကောင်စီတပ် စကခ၂၁ ၊ ခမရ ၃၄၈ တပ်စခန်းမှာ တိုက်ပွဲဖြစ်ခဲ့ပါတယ်။

ဇွန် ၂၈ ရက် ညပိုင်း ထုတ်ပြန်ချက်အရတော့ နောင်ချို၊ ကျောက်မဲ၊ သီပေါ၊ မိုးမိတ်၊ မိုးကုတ် စတဲ့မြို့တွေမှာ တိုက်ပွဲဆက်ဖြစ်နေပြီး နောင်ချိုမြို့မှာ စစ်ကောင်စီရဲ့ ခမရ ၆၀၆ တပ်စခန်း တခုပဲ ကျန်တော့လို့ အဲဒီစခန်းကို တအာင်းတပ်မတော် TNLA၊ MDY-PDF နဲ့ ဓနုပြည်သူ့လွတ်မြောက်ရေး တပ်မတော် (DPLA) ပူးပေါင်းတပ်ဖွဲတို့ ထိုးစစ်ဆင်နေတယ်လို့ ဆိုပါတယ်။

ပြီးတော့ ဇွန် ၂၅ ရက်ကနေ ၂၈ ရက်အထိ စစ်ကောင်စီက လေကြောင်းနဲ့ လက်နက်ကြီးပစ်ခတ်တာကြောင့် ကျောက်မဲ၊ နောင်ချို၊ မိုးကုတ်နဲ့ ‌မိုးမိတ်မြို့နယ်တို့မှာ သီလရှင် ၁ ပါးနဲ့ ကိုရင် ၁ ပါး အပါအဝင် အရပ်သား ၁၈ ယောက်သေဆုံး၊ အယောက် ၃၀ ဒဏ်ရာရခဲ့တယ်လို့လည်း ထုတ်ပြန်ထားပါတယ်။

စစ်ကောင်စီဟာ လားရှိုးမြို့နယ်က မန်စံရေကျ၊ မန်ပွဲ - လားရှိုး ဆက်သွယ်ထားတဲ့ မန်စံရေကျကြိုးတံတားနဲ့ ခိုလိတ်ရထားလမ်းတံတားတို့ကို ဇွန် ၂၇ ရက်နေ့က မိုင်းခွဲဖျက်ဆီးခဲ့သလို ဇွန် ၂၅ ရက်နေ့ကလည်း ခိုလိတ်အုပ်စုက မန်ပွဲရွာတံတား၊ ဆွတ်လန်းတံတားနဲ့ မန်စံရေကျတံတားတို့ကို ဖျက်ဆီးခဲ့တယ်လို့ ဆိုပါတယ်။