ထိုင်းကွန်ဒိုဈေးကွက်ဟာ ပြည်ပဝယ်လိုအားအပေါ် မှီခိုနေရပြီး ပထမသုံးလပတ် ရောင်းအားဟာ အဓိကအားဖြင့် ပြည်ပဝယ်သူတွေကြောင့် သမိုင်းမှာ ရာနှုန်းအားဖြင့် အမြင့်ဆုံး တက်လာခဲ့တယ်လို့ အိမ်ခြံမြေသတင်းအချက်အလက်စင်တာ (REIC) ကို ကိုးကားပြီး ဘန်ကောက်ပို့စ်သတင်းစာက ဖော်ပြပါတယ်။

၂၀၂၄ ပထမသုံးလပတ် ထိုင်းကွန်ဒိုဝယ်ယူမှုမှာ မြန်မာက  ရုရှားကို ကျော်တက်ပြီး နံပါတ် ၂ နေရာ ရောက်လာခဲ့ပါတယ်။

တရုတ်နိုင်ငံသားတွေက နံပါတ်တစ် ဝယ်လက်အဖြစ် ဆက်ရှိနေပြီး အရင်က ရုရှားနိုင်ငံသားတွေက နံပါတ် ၂ နေရာမှာ နှစ်အတန်ကြာ ရှိနေခဲ့တာဖြစ်ပါတယ်။

မြန်မာနိုင်ငံသားတွေဟာ ၂၀၂၂ ကမှ ကွန်ဒိုဝယ်ယူမှုမှာ အရေအတွက်နဲ့ တန်ဖိုးအရ ထိပ်တန်း ၁၀ နိုင်ငံစာရင်း စဝင်ခဲ့တာဖြစ်ပါတယ်။

၂၀၂၂ တုန်းက အရေအတွက်အရ နံပါတ် ၆ နေရာ၊ တန်ဖိုးအရ နံပါတ် ၃ နေရာမှာ ရှိခဲ့တာပါ။ ၂၀၂၃ မှာတော့ နှစ်မျိုးစလုံးမှာ နံပါတ် ၄ နေရာ ရောက်လာခဲ့ပြီး ၂၀၂၄ နှစ်ဦးပိုင်းမှာတော့ နံပါတ် ၂ ဖြစ်လာခဲ့တာပါ။

၂၀၂၄ ပထမသုံးလပတ်မှာ တနိုင်ငံလုံး အတိုင်းအတာနဲ့ နိုင်ငံခြားသားတွေ လက်ပြောင်းရယူခဲ့တဲ့ ကွန်ဒိုအရေအတွက်နဲ့ တန်ဖိုး နှစ်အလိုက် နှိုင်းယှဉ်မှုမှာ ၄ ဒသမ ၃ ရာခိုင်နှုန်းနဲ့ ၅ ဒသမ ၂ ရာခိုင်နှုန်းစီ တက်လာခဲ့တယ်လို့ ဆိုပါတယ်။ ကိန်းဂဏန်းအားဖြင့် ယူနစ် ၃,၈၃၈ လုံးနဲ့ တန်ဖိုး ဘတ် ၁၈ ဘီလီယံ ဖြစ်ပါတယ်။

ပြည်တွင်းဝယ်လိုအားကတော့ သိသိသာသာ ကျနေပြီး နိုင်ငံခြားဝယ်လိုအားသာ မရှိရင် ကွန်ဒိုဈေးကွက်ဟာ သိသိသာသာ ကျဆင်းနိုင်တယ်လို့ REIC ယာယီညွှန်ကြားရေးမှူးချုပ် ဗီချိုင်း ဗီရတ်ကာပန်က ဆိုပါတယ်။

Source/Photo-Reuters