ဂါဇာကမ်းမြောင်အတွက် စားနပ်ရိက္ခာအကူအညီ ၃၃၂ တန် တင်ဆောင်လာတဲ့ ဒုတိယမြောက် ရိက္ခာသယ် သင်္ဘောဟာ ဆိုက်ပရပ်စ်နိုင်ငံ လာနာကာ ဆိပ်ကမ်းကနေ မတ် ၃၀ ရက်မှာ ထွက်ခွာလာပြီဖြစ်ပြီး ရှေ့အပတ်ထဲ ဂါဇာကို ရောက်ရှိမှာဖြစ်တယ်လို့ အာဏာပိုင်တွေက ထုတ်ပြန်ပါတယ်။ 

အခြားသတင်းတွေမှာတော့ တန် ၄၀၀ နီးပါး ပါတယ်လို့ ဖော်ပြကြပြီး  ရိက္ခာအပြင် အခြားအထောက်အပံ့လည်း ပါတယ်လို့ ဖော်ပြကြပါတယ်။ 

ဂါဇာကမ်းမြောင်ရဲ့ ရေလမ်းကြောင်းကို အစ္စရေးက ၁၇ နှစ်နီးပါး ပိတ်ဆို့ထားပြီးတဲ့နောက် ဆိုက်ပရက်စ်ကနေ ရေလမ်းကြောင်းနဲ့ အကူအညီပေးဝင်တာ ဒုတိယအကြိမ်မြောက် ဖြစ်ပါတယ်။ 

ငတ်မွတ်နေကြတဲ့ ပါလက်စတိုင်းသားတွေအတွက် အမေရိကန် ပရဟိတအဖွဲ့ World Central Kitchen (WCK) က ထောက်ပံ့ပေးတာ ဖြစ်ပါတယ်။ ကုန်တင်သင်္ဘောတစင်းနဲ့ ဝမ်းပြားတွဲကို ဆွဲတဲ့ တွဲဆွဲရေယာဉ်တစင်းက အကူအညီတွေကို သယ်လာမှာဖြစ်ပြီး အထောက်အကူပြုအဖွဲ့ လိုက်ပါလာတဲ့ ရေယာဉ်တစ်စင်းလည်း ပါမှာဖြစ်ပါတယ်။ ခရီးစဉ်ဟာ နာရီ ၆၀ လောက် ကြာမြင့်မယ်လို့ မှန်းထားပါတယ်။

ဥရောပသမဂ္ဂဝင် နိုင်ငံတွေထဲမှာ ဂါဇာနဲ့ အနီးဆုံးက ဆိုက်ပရပ်စ် ဖြစ်တဲ့အတွက် ဆိုက်ပရပ်စ်ကနေ ရေကြောင်းစင်္ကြံ ဖော်ဆောင်တာဖြစ်ပြီး ပစ္စည်းတွေကို အစ္စရေးကလည်း စစ်ဆေးပါတယ်။ 

မတ်လ အစောပိုင်းတုန်းက ရေကြောင်း ပထမဆုံး ပို့ဆောင်မှုမှာတော့ ရိက္ခာ တန် ၂၀၀ နီးပါး ပို့နိုင်ခဲ့ပါတယ်။ အခုတကြိမ်မှာတော့ ပစ္စည်းတွေ ချရလွယ်အောင် ဝန်ချီစက် နှစ်ခု၊ ကရိန်း တခုနဲ့ ကရိန်းမောင်းတဲ့အဖွဲ့ပါ ပါလာမှာ ဖြစ်ပါတယ်။ 

Source/Photo-REUTERS/Yiannis Kourtoglou