မွန်ပြည်နယ်၊ ဘီးလင်းမြို့နယ်ထဲက ကျေးရွာတချို့က ထရန်စဖော်မာပုံးတွေမှာ တပ်ဆင်ထားတဲ့ မိန်းကြိုးတွေကို မကြာခဏ ဖြတ်တောက်ခိုးယူခံနေရတယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဇန်နဝါရီလအတွင်းကစပြီး ဖြတ်တောက်ခိုးယူခံခဲ့ရပေမယ့် ခိုးယူသွားတဲ့ တရားခံတွေကို လက်ရှိအချိန်အထိ ဖမ်းမိတာမရှိသေးဘူးလို့ မုသင်ကျေးရွာ ဒေသခံတယောက်က ပြောပါတယ်။

“ခိုးခံထိနေတာက ပြီးခဲ့တဲ့လတည်းကပါ။ အခုဆိုရွာ ၅ ရွာလောက် ကျနော်တို့နည်းတူ ခိုးဖြတ်သွားတာ။ ကြေးကြိုးတွေဆိုတော့ တန်ဖိုးရှိတာပေါ့။ ရဲသွားတိုင်တော့လည်း ဘာမှ အစအနတောင်မရသေးဘူး။ လောလောဆယ်တော့ ရွာသားတွေစုပြီး မီးကြိုး ပြန်ဝယ်ထားရတာပေါ့” လို့ ပြောပါတယ်။

ဘီးလင်းမြို့နယ်ထဲက ဇုတ်သုတ်ကျေးရွာအုပ်စု၊ ယွန်းဒလင်းကုန်းကျေးရွာအုပ်စု၊ ပေါက်တောကျေးရွာအုပ်စု၊ ဇွဲကလာကျေးရွာအုပ်စုနဲ့ မုသင်ကျေးရွာအုပ်စုတွေမှာရှိတဲ့ (200 – K) ထရန်စဖော်မာပုံးတွေက မိန်းကြိုးတွေ ဖြတ်တောက်ခိုးယူခံခဲ့ရတယ်လို့ သိရပါတယ်။

ဖြစ်စဉ်နဲ့ပတ်သက်ပြီး ထပ်မံသိရှိရဖို့ ဘီးလင်းမြို့နယ် လျှပ်စစ်အင်ဂျင်နီယာရုံးကို ဆက်သွယ်ခဲ့ပေမယ့် ဖုန်းလက်ခံဖြေဆိုတာမရှိခဲ့ပါဘူး။

ခိုးယူခံလိုက်ရတဲ့ မိန်းကြိုးတွေဟာ ကြေးကြိုးတွေဖြစ်လို့ တန်ဖိုးအားဖြင့် ငွေကျပ် ၇၅ သိန်း ဖိုးလောက်ရှိကြောင်းနဲ့ လက်ရှိ အဲဒီမိန်းကြိုးတွေ ပြန်လည်တပ်ဆင်ဖို့အတွက် ကျေးရွာနေပြည်သူတွေကပဲ စုပေါင်းဝယ်ယူကြရပြီး ကြေးကြိုးတွေ မဝယ်နိုင်လို့ သတ္တုကြိုးတွေနဲ့ပဲ ပြန်တပ်ဆင်ထားရတယ်လို့ ဒေသခံတွေဆီက သိရပါတယ်။