ချင်းပြည်နယ်၊ ပလက်ဝမြို့နယ်ရှိ ခလရ ၂၈၉ တပ်ရင်းနဲ့ မီးဝဗျူဟာကုန်းတို့ကို ရက္ခိုင့်တပ်တော် (အေအေ)က ထိုးစစ်ဆင် တိုက်ခိုက်နေပြီး စစ်ကောင်စီကလည်း လေကြောင်း၊ လက်နက်ကြီး ပစ်ကူတွေနဲ့ အပြင်းအထန် ခုခံနေပါတယ်။
ဇန်နဝါရီ ၉ ရက်က စစ်ကောင်စီက မီးဝကျေးရွာအတွင်းကို လေကြောင်းက ပစ်ခတ်ခဲ့လို့ အမျိုးသမီးတယောက် သေဆုံးပြီး ၃ ဦး ဒဏ်ရာရခဲ့တယ်လို့ ပလက်ဝမြို့နယ် ဒေသခံတဦးက ပြောပါတယ်။
“မီးဝနဲ့ ၂၈၉ တပ်ရင်းမှာ ဒီနေ့လည်း တိုက်ပွဲပြင်းထန်နေဆဲ ဖြစ်တယ်။ လက်နက်ကြီးသံတွေ ကြားနေရတယ်။ ၉ ရက်နေ့ကလည်း စစ်ကောင်စီက လေကြောင်းတိုက်ခိုက်ခဲ့တာကြောင့် အသက် ၆၀ အရွယ် အမျိုးသမီးတဦး သေဆုံးခဲ့ပြီးတော့ နောက်ထပ် ၃ ဦးလည်း ထိခိုက်ဒဏ်ရာ ရရှိခဲ့တယ်လို့ မြေပြင်သတင်းတွေကြားတယ်။”
ပလက်ဝမြို့အရှေ့ဘက်ရှိ ခလရ ၂၈၉ တပ်ရင်းလည်း ရက္ခိုင့်တပ်တော်ရဲ့ တိုက်ခိုက်ခံနေရပြီး အပြင်းအထန် ခုခံနေရတယ်လို့ မြေပြင်နဲ့ နီးစပ်သူတွေက ပြောပါတယ်။
ပလက်ဝမြို့က အဓိကဗျူဟာကုန်း ၃ ခု အပါအဝင် တပ်စခန်း ၂၂ ခုကို ရက္ခိုင့်တပ်တော်က သိမ်းပိုက်ရရှိထားပြီး ဖြစ်ပါတယ်။
တိုက်ပွဲတွေအတွင်း စစ်ကောင်စီက လေကြောင်းတိုက်ခိုက်မှုနဲ့ လက်နက်ကြီး ပစ်ခတ်မှုတွေကြောင့် အရပ်သား ၄ ဦးထက်မနည်း သေဆုံးခဲ့ပြီး ၂၂ ဦးထက်မနည်း ဒဏ်ရာရရှိခဲ့ပါတယ်။
တိုက်ပွဲပြင်းထန်နေတဲ့ မီးဝဗျူဟာကုန်းဟာ ကျောက်တော်နဲ့ ပလက်ဝနယ်စပ်မှာ တည်ရှိတာ ဖြစ်ပါတယ်။ တိုက်ပွဲတွေဖြစ်နေချိန် ပလက်ဝမြို့နယ်ကို စစ်ကောင်စီက ဖုန်းလိုင်း၊ အင်တာနက်လိုင်းတွေ ဖြတ်တောက်ထားပါတယ်။
ပလက်ဝဒေသတခုလုံး စစ်ကောင်စီကင်းစင်တဲ့နယ်မြေ ဖြစ်လာနိုင်ရေးအတွက် ပလက်ဝမြို့ ပတ်ဝန်းကျင်မှာ ကျန်ရှိနေသေးတဲ့ စစ်ကောင်စီတပ်ရဲ့ လက်ကျန်စခန်းတွေကို ဆက်လက်ချေမှုန်းတိုက်ခိုက်နေတယ်လို့ ဇန်နဝါရီ ၉ ရက်နေ့မှာ ရက္ခိုင့်တပ်တော် (အေအေ) က ထုတ်ပြန်ခဲ့ပါတယ်။
စစ်တွေမြို့နယ်မှာတော့ ဇန်နဝါရီ ၁၁ ရက် မနက်ပိုင်းက စစ်ကားတစီး မိုင်းဆွဲ တိုက်ခိုက်ခံရပြီး ၄ ယောက်သေဆုံးကာ အများအပြားဒဏ်ရာ ရခဲ့တယ်လို့ အေအေနဲ့နီးစပ်သူတွေဆီကနေက သိရပါတယ်။
စစ်တွေမြို့နယ် ကံပြင်ရွာအဝင်ဝမှာ ဇန်နဝါ ၁၁ ရက် မနက် ၁၀ နာရီ ၁၅ မိနစ်မှာ ရက္ခိုင့်တပ်တော် အေအေက မိုင်း ၂ လုံးဆွဲပြီး တိုက်ခိုက်ခဲ့တယ်လို့ အေအေနဲ့နီးစပ်သူတယောက်က ပြောပါတယ်။
ကားပေါ်မှာ စစ်သည် ၃၀ ကျော်လောက် လိုက်ပါလာတာ ဖြစ်ပြီး မိုင်းဆွဲတိုက်ခိုက်ခံရတာကြောင့် ၄ ယောက် သေဆုံးကာ အများအပြား ဒဏ်ရာရခဲ့တယ်လို့ ဆိုပါတယ်။
အဲဒီနောက် ညနေ ၃ နာရီ ၄၈ မိနစ်လောက်မှာ ကံပြင်ရွာနဲ့ သုံးဆောင်ကျေးရွာက ရွာသား အားလုံးကို ဖမ်းဆီးပြီး ကံပြင်ဘုန်းကြီးကျောင်းထဲမှာ စစ်ဆေးနေတယ်လို့ ပြောပါတယ်။
“စစ်သားတွေက ရွာထဲမှာရှိတဲ့ ယောကျာ်းတွေ အားလုံးကို ကြိုးနဲ့တုပ်ပြီး ဖမ်းဆီးသွားတာ။ အမျိုးသမီးတွေကိုတော့ ပြန်လွှတ်ပေးလိုက်တယ်။ လက်ရှိအချိန်မှာတော့ ဘုန်းကြီးကျောင်းထဲမှာ စစ်ကြောရေးလုပ်နေကြတယ်လို့ ဆိုပါတယ်။
အဆိုပါ ပစ်ခတ်တိုက်ခိုက် ဖမ်းဆီးမှုတွေနဲ့ ပတ်သက်ပြီး စစ်ကောင်စီဘက်က သတင်းထုတ်ပြန်တာ မတွေ့ရသေးပါဘူး။
