ပဲခူးတိုင်း၊ ကျောက်ကြီးမြို့နယ်၊ မုန်းမြို့ပေါ်ရှိ အာဏာသိမ်းကောင်စီတပ်စခန်းအားလုံးအား KNLA နဲ့ ပူးပေါင်းတပ်ဖွဲ့တို့က တိုက်ခိုက်သိမ်းပိုက်ရရှိခဲ့ပြီလို့ ကရင်အမျိုးသားအစည်းအရုံး (ကေအန်ယူ) က ဒီနေ့ ထုတ်ပြန်ပါတယ်။
ကေအန်ယူ ကော်သူးလေအုပ်ချုပ်နယ်မြေ၊ ခလယ်လွီထူ (ညောင်လေးပင်) ခရိုင်၊ တပ်မဟာ ၃၊ မူး(မုန်း)မြို့ပေါ်ရှိ စစ်ကောင်စီ ခမရ ၅၉၉၊ ခမရ ၅၉၀၊ မုန်းမြို့မ ရဲစခန်းနဲ့ တံတားထိပ်ဂိတ်စခန်းတို့အား သိမ်းပိုက်နိုင်ခဲ့တယ်လို့ ဆိုပါတယ်။
အဆိုပါစခန်းတွေကို ကရင်အမျိုးသား လွတ်မြောက်ရေးတပ်မတော် (KNLA) လက်အောက်ခံတပ်ရင်း တပ်ဖွဲ့တွေနဲ့ တော်လှန်ရေးပူးပေါင်းတပ်ဖွဲ့တို့က ဒီဇင်ဘာ ၂ ရက် ည ၁၁ နာရီ မိနစ် ၄၀ လောက်က စတင်တိုက်ခိုက်ခဲ့ပြီး ဒီဇင်ဘာ ၄ ရက် ဒီနေ့ ညနေ ၅ နာရီခွဲမှာ သိမ်းပိုက်နိုင်ခဲ့တယ်လို့ ဖော်ပြထားပါတယ်။
စခန်းအားလုံးကို သိမ်းပိုက်ရရှိခဲ့ပြီးနောက် KNLA နဲ့ ပူးပေါင်းတပ်ဖွဲ့ဝင်အင်အား ၁၅၀၀ လောက်က နယ်မြေ ရှင်းလင်းရေးလုပ်ငန်းတွေကို ဆက်လက်လုပ်ဆောင်နေပါတယ်။
စခန်းသိမ်းတိုက်ပွဲတွေမှာ နှစ်ဖက်ထိခိုက်ကျဆုံးမှုရှိခဲ့ပြီး စစ်ကောင်စီတပ်မှ တပ်ရင်းမှူး အဆင့်အပါအဝင် အများအပြား လက်နက်ချ အညံ့ခံခဲ့တယ်လို့ ဆိုပါတယ်။
