တနင်္သာရီတိုင်း၊ မြိတ်ခရိုင်၊ ပုလောမြို့နယ်၊ ပလမြို့ တိုတောင်ပေါ်ရှိ စစ်ကောင်စီစခန်းကို ဒေသခံ ပြည်သူ့ကာကွယ်ရေးတပ်ဖွဲ့တွေက နိုဝင်ဘာ ၂၇ ရက် မနက် ၁၁ နာရီခွဲလောက် ဝင်ရောက်တိုက်ခိုက်ခဲ့တယ်လို့ ပြည်သူ့ကာကွယ်ရေးတပ်မတော်၊ မြိတ်ခရိုင်၊ အမှတ် ၁ တပ်ရင်းဆီက သိရပါတယ်။

တိုတောင်ပေါ်မှာ စစ်ကောင်စီတပ်သား ၁၀ ဦးဝန်းကျင်ခန့်ရှိကာ ကတုတ်ကျင်း၊ ဘန်ကာတွေနဲ့ အခိုင်အမာ တပ်စွဲထားပြီး ပုလောမြို့နယ်ထဲမှာရှိတဲ့ ကျေးရွာတွေထဲကို လက်နက်ကြီးနဲ့ ပစ်ခတ်တဲ့နေရာလည်း ဖြစ်တယ်လို့ PDF တွေက ပြောပါတယ်။

မြိတ်ခရိုင်၊ အမှတ် ၁ တပ်ရင်း သတင်းနဲ့ ပြန်ကြားရေးတာဝန်ခံက “ကျနော်တို့ ဝင်ရောက်တိုက်ခိုက်တဲ့အချိန်မှာ ကျနော်တို့တည်နေရာကို သူတို့မသိဘူး။ မသိတော့ ကားလမ်းမှာ သွားလာနေတဲ့ ပြည်သူတွေကို ရမ်းပစ်တာတွေလုပ်တယ်။ တိုက်ပွဲအတွင်း ကဒဲကျေးရွာဘက်ကို လက်နက်ကြီးနဲ့ ပစ်ခတ်တာတွေလုပ်တယ်။ ကျနော်တို့လည်း ပြည်သူတွေ ထိခိုက်မခံချင်လို့ ပြန်ဆုတ်လာတယ်” လို့ ပြောပါတယ်။

အဆိုပါတိုက်ပွဲမှာ ပြည်သူ့ကာကွယ်ရေးဘက်က ထိခိုက်မှုမရှိဘဲ စစ်ကောင်စီဘက်က ၁ ဦးကျဆုံးပြီး ထိခိုက်သေဆုံးမှု အတိအကျကိုတော့ သီးခြားအတည်မပြုနိုင်သေးပါဘူး။

တိုက်ပွဲဖြစ်ပွားပြီးနောက် နိုဝင်ဘာ ၂၈ ရက်နေ့မှာ စစ်ကောင်စီဘက်က အင်အား ၈၀ လောက်နဲ့ မြိတ်မြို့ကနေ ရေလမ်းကနေတဆင့် ပလဆိပ်ကမ်းကို ရောက်လာပြီး တိုတောင်ပေါ်မှာ နေရာပြန်ယူထားတယ်လို့ ပြည်သူ့ကာကွယ်ရေးတပ်ဖွဲ့တွေက ပြောပါတယ်။

နိုဝင်ဘာ ၂၆ ရက် နေ့လယ် ၂ နာရီဝန်းကျင်လောက်မှာ တနင်္သာရီဘက်က ဆင်းလာတဲ့ စစ်ကောင်စီယာဉ် ၄ စီးကို ညောင်ပင်ကုန်ရွာအနီးမှာ ပြည်သူ့ကာကွယ်ရေး ပူးပေါင်းစစ်ကြောင်း ၁ က မိုင်းနှစ်ကြိမ်ဆွဲ တိုက်ခိုက်ခဲ့တယ်လို့ မြိတ်ခရိုင် ပြည်သူ့ကာကွယ်ရေးတပ်ဖွဲ့က ပြောပါတယ်။

မြိတ်ခရိုင်ပကဖ ပြန်ကြား‌ရေးတာဝန်ရှိသူတဦးက “စစ်ကောင်စီယာဥ်တန်း ဆင်းလာတယ်လို့ သတင်းရတာနဲ့ လမ်းပိုင်းမှာ အဆင်သင့်လုပ်ပြီးတော့ စောင့်ပြီး မိုင်းဆွဲတာပါ။ ကျောက်ကား လေးစီးမှာ အရှေ့က ကားနှစ်စီး ထိတာ‌ပါ။ လူနာတင်ကားနဲ့ မြိတ်ကို ခေါ်ဆောင်သွားတယ်” လို့ ပြောပါတယ်။

မိုင်းထိမှန်ခဲ့တာကြောင့် ကားတစီး ထိခိုက်ပျက်စီးခဲ့ပြီး ကားပေါ်ပါလာတဲ့ စစ်ကောင်စီတပ်သား ၄ ဦး ဒဏ်ရာရခဲ့သလို နောက်ထပ် ၃ ဦးကိုလည်း ၅၅၈ တပ်ရင်းထဲကို ပို့ဆောင်ခဲ့တယ်လို့ ပြောပါတယ်။

မိုင်းဆွဲတိုက်ခိုက်ခံရပြီးနောက် စစ်ကောင်စီယာဉ်တန်းကနေ လက်နက်ငယ်တွေနဲ့ ပြန်လည်ပစ်ခတ်တိုက်ခိုက်ခဲ့ပေမဲ့ ပြည်သူ့ကာကွယ်ရေးစစ်ကြောင်းဘက်က ထိခိုက်မှု မရှိခဲ့ဘူးလို့ ဆိုပါတယ်။

ပြည်သူ့ကာကွယ်ရေးတပ်ဖွဲ့ဝင်တဦးက “မိုင်းဆွဲတဲ့အခါမှာ အရှေ့ကနှစ်စီးကို ဆွဲတယ်။ ကားထဲမှာပါတဲ့ စစ်သားတွေက ကြောက်လန့်ပြီးတော့ ပစ်ခတ်တာပေါ့။ မိုင်းဆွဲတဲ့နေရာမှာပဲ ရမ်းသန်းပစ်ခတ်တာပါ” လို့ ပြောပါတယ်။

တနင်္သာရီမြို့နယ် ပြည်သူ့ကာကွယ်ရေး ပူးပေါင်းစစ်ကြောင်း ၁ မှာ မြိတ်ခရိုင်တပ်ရင်း ၂ တပ်ခွဲ ၁၊ တနင်္သာရီ ပကဖမှ ဘက်မလိုက်ပြောက်ကျားအဖွဲ့၊ တောင်ပိုင်းသူရဲကောင်းအဖွဲ့နဲ့ မြိတ် ပကဖတို့ ပူးပေါင်းဖွဲ့စည်းထားတာ ဖြစ်ပါတယ်။

နိုဝင်ဘာ ၂၄ ရက်‌ကလည်း လက်နက်အပြည့်နဲ့ အင်အား ၅၀ ခန့်ပါ စစ်ကောင်စီစစ်ကြောင်းကို ခမောက်ကြီးမြို့နယ် မလိဝမ်းရွာ ဆယ်အိမ်စုအနီးမှာ ကော့သောင်းပြည်သူ့ကာကွယ်ရေးတပ်ဖွဲ့က ရှေ့ပြေးမိုင်းနှစ်လုံးနဲ့ ကြားဖြတ် မိုင်းဆွဲတိုက်ခိုက်ခဲ့ရာ စစ်ကောင်စီစစ်ကြောင်းမှူး အပါအဝင် တပ်သားတချို့ ထိခိုက်ဒဏ်ရာရခဲ့ပြီး ၃ ဦး သေဆုံးခဲ့တယ်လို့ သိရပါတယ်။

တိုက်ပွဲတွေ ပြင်းထန်လာနိုင်တဲ့ တနင်္သာရီ၊ ပုလော၊ ကော့သောင်း၊ ကျွန်းစုမြို့နယ်တို့မှာ ပြည်သူတွေ စစ်ရေးသတိရှိကြဖို့၊ စစ်ကောင်စီတပ်တွေနဲ့ ဝေးဝေးမှာ သွားလာနေထိုင်ကြဖို့၊ စစ်ရေးထုတ်ပြန်ချက်တွေကို အချိန်နဲ့တ‌ပြေးညီ စောင့်ကြည့်ပေးကြဖို့ ပြည်သူ့ကာကွယ်ရေးတပ်ဖွဲ့တွေက သတိပေး ထုတ်ပြန်ထားပါတယ်။