မန္တလေးတိုင်း မတ္တရာမြို့နယ်ထဲက စစ်ကောင်စီရဲ့ အခြေစိုက်စခန်းကုန်းကို ပြည်သူ့ကာကွယ်ရေး တပ်မတော်-မန္တလေးနဲ့ TNLAပူးပေါင်းတပ်တွေက သိမ်းပိုက်နိုင်ခဲ့ပြီး စစ်ကောင်စီတပ်ဖွဲ့ဝင် ၄ ဦး အရှင်ဖမ်းဆီးရမိကာ လက်နက်ကြီး လက်နက်ငယ်အများအပြား သိမ်းတည်းရမိခဲ့တယ်လို့ MDY-PDF ပြန်ကြားရေးတာဝန်ခံ ကိုအော်စမွန်က ပြောပါတယ်။
အဲဒီစခန်းကုန်းကို နိုဝင်ဘာ ၂၇ ရက် မနက် ၈ နာရီလောက် စတင်ကာ ထိုးစစ်ဆင် တိုက်ခိုက်ခဲ့တာဖြစ်ပြီး တိုက်ပွဲ ၂ နာရီခွဲအကြာ မနက် ၁ဝ နာရီခွဲလောက်မှာ အပြီးသတ်သိမ်းပိုက်နိုင်ခဲ့ကာ လက်နက်ခဲယမ်းတွေ ရရှိခဲ့တာလို့ ဆိုပါတယ်။
ကိုအော်စမွန်က "မတ္တရာမြို့နယ်အတွင်း စစ်ကောင်စီ အခြေစိုက် နေရာယူထားတဲ့ စခန်းကုန်းတွေ ထဲက တခုပါပဲ။ စစ်သုံ့ပန်းဖမ်းဆီးရမိတာ ဒီ ၄ ယောက်နဲ့ဆို ၁၅ ဦးထိ ရှိပြီ။ သုံ့ပန်း ဥပဒေနဲ့အညီ ကောင်းမွန်စွာပဲ ထားတယ်" လို့ ပြောပါတယ်။
တိုက်ပွဲတွင်းမှာ စစ်ကောင်စီဘက်က ငါးကြင်းမြှီးစက်လတ် ၁ လက်အပါအဝင် ဒရုန်းပစ်သေနတ် ၁ လက်၊ ပစ္စတို ၁ လက်နဲ့ MA-3 ၂ လက်၊ MA-11 ၅ လက်၊ MA-1 ၁လက်၊ BA-63(G-3) ၁ လက်၊ BA-72 ၁ လက်တို့နဲ့ စစ်အသုံးအဆောက်ပစ္စည်းတွေ၊၊ ကျည်ဆန်တွေနဲ့ ဆက်စပ်ပစ္စည်းတွေနဲ့အတူ စစ်ကောင်စီတပ်ဖွဲ့ဝင်အလောင်း ၁၅ လောင်းတို့ကို သိမ်းဆည်းရမိခဲ့တာပါ။
MDY-PDF တပ်ဖွဲ့ဟာ ၁ဝ၂၇ စစ်ဆင်ရေးစတင်ပြီး နောက်ရက်ကတည်းက တောင်သမန် စစ်ဆင်ရေးအဖြစ် အပြီးသတ်တိုက်ပွဲကို ဆင်နွှဲနေတာဖြစ်ပြီး နိုဝင်ဘာ ၁၉ ရက်ကလည်း နောင်ချိုမြို့နယ်ရှိ လွင်ကြီး အကျဉ်းဦးစီးစခန်း၊ ကြူအင်း အကျဉ်းဦးစီးစခန်း၊ ဟိုခို အကျဉ်းဦးစီး စခန်းနဲ့ ကုန်းစံ အကျဉ်းဦးစီးစခန်း ၄ ခုတို့ကို သိမ်းပိုက်ရရှိခဲ့ပြီး လက်နက်မျိုးစုံ ၁၀၄ လက်နဲ့ ဆက်စပ်ခဲယမ်း အမြောက်အမြားကို သိမ်းဆည်းရမိခဲ့ပါသေးတယ်။
