ရှမ်းပြည်နယ်၊ နမ့်ခမ်းမြို့နယ်နဲ့ မန္တလေးတိုင်း မိုးကုတ်မြို့နယ်မှာ PSLF/TNLAနဲ့ စစ်ကောင်စီတပ်တွေ အောက်တိုဘာ ၂၁ ရက်က တိုက်ပွဲနှစ်နေရာဖြစ်ပွားခဲ့ပြီး စစ်ကောင်စီတပ်ဘက်က ထိခိုက်သေဆုံးမှု အများအပြားရှိခဲ့ကာ  လက်နက်ခဲယမ်းတွေ သိမ်းဆည်းရမိခဲ့တယ်လို့  TNLA ဘက်က ပြောပါတယ်။

TNLA တပ်ဖွဲ့ရဲ့ တပ်မဟာ ၁ စစ်ဒေသဖြစ်တဲ့ နမ့်ခမ်းမြို့နယ် ပန်ဟန်ကြီးကျေးရွာဘက်ကို ထိုးစစ်ဆင်လာတဲ့ စစ်ကောင်စီရဲ့ စကခ ၇ ခမရ ၄၂၇ နဲ့ တိုက်ပွဲဖြစ်ပွားခဲ့ဖြစ်ပြီး စစ်ကောင်စီတပ်သား ရုပ်အလောင်းတွေနဲ့ လက်နက်တွေကို TNLAက သိမ်းဆည်းရမိခဲ့ပါတယ်။

ဒါ့အပြင် တအာင်းတပ်မတော် တပ်မဟာ(၂)စစ်ဒေသဖြစ်တဲ့ မိုးကုတ်မြို့နယ်ဘက်မှာလည်း စစ်ကောင်စီတပ် တပ်မ(၄၄) ခလရ - ၁၀၂/၁၀၄၊ လပခ/ခလရ -၈၈ တို့နဲ့  အထက်ညောင်ကုန်းရွာအနီးမှာ တိုက်ပွဲပြင်းထန်ခဲ့ပြီး စစ်ကောင်စီတပ်ဘက်က အရာရှိအပါအဝင် ထိခိုက်ကျဆုံးမှုများတယ်လို့  TNLA ဘက်က ဆိုပါတယ်။

အဲဒီတိုက်ပွဲတွေအတွင်း စစ်ကောင်စီဘက်ကလည်း အထက်ညောင်ကုန်းရွာဘက်ကို လက်နက်ကြီးတွေနဲ့ ၃၆ ကြိမ်ပစ်ခတ်ခဲ့သလို  မူဆယ်မြို့နယ် တီမားရွာနဲ့ လွယ်မောက်တောင်ဘက်ကိုလည်း နမ့်ဖက်ကာတပ်ဘက်ကနေ လက်နက်ကြီးနဲ့ ၅ ကြိမ်အထိ ပစ်ခတ်တိုက်ခိုက်ခဲ့တယ်လို့ TNLA ဘက်ကပြောပါတယ်။

အောက်တိုဘာ ၂၁ ရက် ညနေ ၄ နာရီဝန်းကျင်မှာ တံတားဦးလေတပ်စခန်းကနေ ဂျက်လေယာဉ် ၂ စီးနဲ့ ဗုံးကြဲတိုက်ခိုက်ခဲ့လို့ အထက်ညောင်ကုန်းကျေးရွာက ဒေသခံနေအိမ်  ၁၀ လုံးထက်မနည်း မီးလောင်ပျက်ဆီးသွားခဲ့ပါတယ်။

အောက်တိုဘာလအတွင်း စစ်ကောင်စီတပ်နဲ့ တအာင်းအမျိုးသားလွတ်မြောက်ရေးတပ်မတော် TNLA တို့အကြား တိုက်ပွဲ ၁၅ ကြိမ်အထိ ဖြစ်ပွားခဲ့ပြီး နှစ်ဖက်ထိခိုက် သေဆုံးမှု စာရင်းကိုတော့ နှစ်ဖက်စလုံးက ထုတ်ပြန်ပြောဆိုခြင်းမရှိပါဘူး။ 

NB TNLA and Army