လုပ်ငန်းရှင် ၂၅၄ ဦးကို နှစ်စဉ် အသင်းဝင်ကြေး ပေးသွင်းဖို့ ပျက်ကွက်ခဲ့တာကြောင့် အသင်းဝင်အဖြစ်က ရပ်ဆိုင်းခဲ့ကြောင်း မြန်မာနိုင်ငံအထည်ချုပ်လုပ်ငန်းရှင်များအသင်း (MGMA) က အောက်တိုဘာ ၉ ရက်မှာ ထုတ်ပြန်ကြေညာခဲ့ပါတယ်။
MGMA အသင်းအနေနဲ့ အဲ့ဒီလုပ်ငန်းရှင်တွေကိုအကြောင်းကြားစာ ၃ ကြိမ်ပေးပို့ခဲ့ပေမယ့် ပြန်လည်ဆက်သွယ်လာခြင်းမရှိတာကြောင့် အသင်းဝင်ကြေး မပေးသွင်းတဲ့ လုပ်ငန်းရှင်တွေကို အသင်းဝင်အဖြစ်က ရပ်ဆိုင်းခဲ့တာလို့ ဆိုပါတယ်။
"စက်ရုံတော်တော်များများက ဒီနှစ်ပိုင်းအတွင်းမှာ လုပ်ငန်းအော်ဒါတွေ မကောင်းလို့ ပိတ်လိုက်တာ သေချာသွားတဲ့သဘောပါ။ အရင်လိုလည်း စျေးကွက်က မတွင်ကျယ်တော့ဘူးလေ။ ဒီပုံအတိုင်းဆို ရှေ့ဆက် ထပ်လျော့လာနိုင်တယ်လို့တော့ သုံးသပ်မိတယ်" လို့ အလုပ်သမားရေးရာကူညီဆောင်ရွက်ပေးနေတဲ့ ရှေ့နေတဦးက ဒီဗွီဘီကို ပြောပါတယ်။
မြန်မာနိုင်ငံ အထည်ချုပ်လုပ်ငန်းရှင်များအသင်း (MGMA) မှာ အသင်းဝင်ထားတဲ့ အသင်းသားဦးရေ ၈၁၉ ဦးရှိခဲ့ပြီး အသင်းသား ၂၅၄ ဦးမှာ ၂၀၂၂ ခုနှစ်အတွက် နှစ်စဉ်ကြေးပေးသွင်းဖို့ ပျက်ကွက်ခဲ့တာလည်း ဖြစ်ပါတယ်။
လက်ရှိ ရပ်ဆိုင်းခံခဲ့ရတဲ့ အသင်းသားတွေအနေနဲ့ မြန်မာနိုင်ငံ အထည်ချုပ်လုပ်ငန်းရှင်များအသင်း MGMA ကို ပြန်လည် အသင်းဝင်လိုပါက အသင်းမှာ ပေးသွင်းဖို့ ကျန်တဲ့ အကြွေးတွေကို ပြန်လည်ပေးသွင်းပြီးမှသာ အသင်းသားသစ်အဖြစ် မှတ်ပုံတင်ရမယ်လို့ ထုတ်ပြန်ချက်မှာ ဖော်ပြထားပါတယ်။
