DVB Logo
Home
နိုင်ငံတကာ

GTA 6 ဂိမ်း  ဖျော်ဖြေရေးသမိုင်းတွင် အဖွင့်နေ့ဝင်ငွေ စံချိန်တင်

DVB
·
November 20, 2026
Photo : GTA 6
Photo : GTA 6
Donate to DVB

၁၃ နှစ်ကြာ စောင့်မျှော်ခဲ့ရတဲ့ Grand Theft Auto 6 (GTA 6) ဂိမ်းဟာ ဖြန့်ချိတဲ့ ပထမဆုံးနေ့မှာပဲ အမေရိကန်ဒေါ်လာ ၂ ဒသမ ၃၆ ဘီလီယံ ရရှိခဲ့ပြီး ဖျော်ဖြေရေးသမိုင်းတလျှောက် အဖွင့်နေ့ဝင်ငွေ အများဆုံးအဖြစ် စံချိန်တင်နိုင်ခဲ့တယ်လို့ ခန့်မှန်းထားပါတယ်။ 

နိုဝင်ဘာ ၁၉ ရက်က စတင်ဖြန့်ချိခဲ့တဲ့ ဒီဂိမ်းဟာ ကြိုတင်မှာယူမှုနဲ့ ပထမနေ့ရောင်းအား စုစုပေါင်း ယူနစ် ၂၄ သန်းခွဲကျော် ရောင်းချခဲ့ရတယ်လို့ ဈေးကွက်သုတေသနကုမ္ပဏီ Sensor Tower က ဖော်ပြပါတယ်။ 

ဒီနှစ် ဝင်ငွေအများဆုံး ရုပ်ရှင်ဖြစ်တဲ့ Spider-Man: Brand New Day တောင် ရုံတင် ပြသချိန် တလျှောက် အမေရိကန်ဒေါ်လာ ၂ ဒသမ ၅ ဘီလီယံ ရရှိထားတာ ဖြစ်ပါတယ်။ 

GTA 6 ကို ဖန်တီးတဲ့ Rockstar Games နဲ့ မိခင်ကုမ္ပဏီ Take-Two တို့ကတော့ တရားဝင် ရောင်းအား မထုတ်ပြန်သေးပေမဲ့ ဝယ်လိုအားဟာ "မကြုံစဖူး များပြားခဲ့တယ်" လို့ ပြောပါတယ်။

ရာဇဝတ်မှုနဲ့ စွန့်စားခန်းတွေကို အခြေခံထားတဲ့ GTA ဂိမ်းစီးရီးဟာ ဆယ်စုနှစ်သုံးခုနီးပါး သက်တမ်းရှိပြီး ကမ္ဘာပေါ်မှာ လူကြိုက်အများဆုံး ဂိမ်းတွေထဲက တခုဖြစ်ပါတယ်။ 

GTA 6 မှာတော့ အမေရိကန်နိုင်ငံ ဖလော်ရီဒါပြည်နယ်ကို အခြေခံဖန်တီးထားတဲ့ Leonida ဒေသမှာ လူဆိုးစုံတွဲ Lucia နဲ့ Jason တို့ရဲ့ ဇာတ်လမ်းကို ကစားရမှာ ဖြစ်ပါတယ်။ 

ဒီဂိမ်းကို ဖန်တီးထုတ်လုပ်ဖို့ အမေရိကန်ဒေါ်လာ တစ်ဘီလီယံကျော် ကုန်ကျခဲ့တယ်လို့ ခန့်မှန်း ထားပြီး သမိုင်းတလျှောက် ထုတ်လုပ်မှုကုန်ကျစရိတ် အများဆုံး ဗီဒီယိုဂိမ်းလည်း ဖြစ်လာ နိုင်ပါတယ်။

ရောင်းအားရဲ့ လေးပုံသုံးပုံလောက်ဟာ PlayStation 5 အတွက်ဖြစ်ပြီး ကျန်တဲ့ ရောင်းအားတွေ ကတော့ Xbox အတွက်ဖြစ်တယ်လို့ Sensor Tower က ပြောပါတယ်။

ဂိမ်းဖိုင်အရွယ်အစားက ၂၁၂ GB ရှိတာကြောင့် စတင်ဖြန့်ချိတဲ့နေ့မှာ ဂိမ်းကစားသူတွေ အလုံးအရင်းနဲ့ ဒေါင်းလုဒ်လုပ်ခဲ့ကြပြီး ဗြိတိန်အင်တာနက်ကုမ္ပဏီ Virgin Media O2 ရဲ့ ညနေပိုင်းအင်တာနက်အသုံးပြုမှု စံချိန်လည်း ကျိုးခဲ့ပါတယ်။ 

GTA 6 ဟာ ဒီနှစ်ကုန်အထိ အမေရိကန်ဒေါ်လာ သုံးဘီလီယံကျော် ရောင်းချရနိုင်တယ်လို့ ဈေးကွက် သုတေသနကုမ္ပဏီ Niko Partners က ခန့်မှန်းထားပါတယ်။ 

ဒါတောင် PlayStation နဲ့ Xbox အတွက်သာ ဖြန့်ချိထားရသေးတာဖြစ်ပြီး PC ဗားရှင်းနဲ့ Online Multiplayer ကို ဘယ်တော့ဖြန့်ချိမလဲဆိုတာတော့ Rockstar Games က တရားဝင် မကြေညာ သေးပါဘူး။

Source:Reuters

Support DVB
Live
DVB Donate
မြန်မာနိုင်ငံအပေါ် အရေးယူဒဏ်ခတ်မှုများ
DVB Logo

About Us

For over 30 years, the Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB is registered as a non-profit association in Thailand.

Follow Us

© Democratic Voice of Burma 2013