ကရင်ပြည်နယ်၊ ဖာပွန်ခရိုင်အတွင်းက တပ်စခန်းတွေ ထပ်မံမကျရေးအတွက် စစ်ကောင်စီတပ်တွေ အင်အားဖြည့်တင်းပြီး လှုပ်ရှားလာတာကြောင့် တိုက်ပွဲတွေ ပိုမိုဖြစ်ပွားလာတယ်လို့ ကေအန်ယူ တပ်မဟာ ၅ တာဝန်ရှိသူက ပြောပါတယ်။

ကရင်အမျိုးသားအစည်းအရုံး (KNU ) တပ်မဟာ ၅ နယ်မြေ၊ ဖာပွန်ခရိုင်အတွင်းက စစ်ကောင်စီတပ်စခန်းတွေကို KNLA ပူးပေါင်းတပ်ဖွဲ့တွေက မကြာခဏ တိုက်ခိုက်သိမ်းပိုက်ပြီး လက်နက်ခဲယမ်းတွေ သိမ်းဆည်းခံရတဲ့အပြင် စခန်းတွေပါ မီးရှို့ဖျက်ဆီးခံနေရပါတယ်။

စစ်ကောင်စီတပ်စခန်းတွေ ထပ်မံမကျရေး စစ်ကောင်စီတပ်တွေက အင်အားဖြည့်တင်းပြီး ပိုမိုလှုပ်ရှားလာတာကြောင့် နယ်မြေခံ KNLA ပူးပေါင်းတပ်တွေနဲ့ နေ့တိုင်းနီးပါး တိုက်ပွဲတွေ ဖြစ်ပွားနေပါတယ်။ စက်တင်ဘာ ၁ လတာအတွင်း စစ်ကောင်စီတပ်တွေနဲ့ KNLA ပူးပေါင်းတပ်ဖွဲ့တို့ တိုက်ပွဲပေါင်း ၈၄ ကြိမ် ဖြစ်ပွားခဲ့ပါတယ်။

ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၅ ပြောခွင့်ရ ဗိုလ်မှူးကြီး စောကလယ်ဒိုက “စစ်ကောင်စီတပ်ရဲ့ လှုပ်ရှားမှုက ပိုများလာတဲ့ သဘောရှိတယ်။ စခန်းတွေရဲ့ အနီးတဝိုက် ပိုပြီးတော့ လှုပ်ရှားလာတယ်။ ဖာပွန်နဲ့ ကမမောင်းကြားက လမ်းမအနီးက တပ်စခန်းတွေ နောက်ထပ်ပြီး ဆုံးရှုံးမှုမရှိရအောင် တိုးပြီးလှုပ်ရှားလာတဲ့အပေါ်မှာ တိုက်ပွဲတွေက ပိုများလာတယ်” လို့ ပြောပါတယ်။

နှစ်ဖက်တိုက်ပွဲအတွင်း စစ်ကောင်စီတပ်ဘက်က ၃၉ ယောက်သေဆုံးကာ ဗိုလ်ကြီး ၂ ယောက် အပါအဝင် ၄၆ ယောက် ဒဏ်ရာရရှိခဲ့ပြီး စစ်ကောင်စီတပ်ရဲ့ အဆောက်အအုံ ၁ လုံးကိုပါ ဖျက်ဆီးနိုင်ခဲ့ပါတယ်။

တိုက်ပွဲအတွင်း KNLA ပူးပေါင်းတပ်ဘက်က ၅ ယောက်ကျဆုံးပြီး ၁၃ ယောက် ဒဏ်ရာရရှိခဲ့တဲ့အပြင် စစ်ကောင်စီတပ်တွေက မြေပြင်လက်နက်ကြီး အလုံး ၂၀ ပစ်ခတ်ခဲ့ပြီး ဖာပွန်ခရိုင်အတွင်းက နေရာ ၆ ခုကို လေကြောင်းကနေ ဗုံးသီး ၂၃ လုံး ဗုံးကြဲတိုက်ခိုက်ခဲ့ပါတယ်။

အဲဒီတိုက်ခိုက်မှု‌တွေအတွင်း ကျောင်းသားကျောင်းသူ ကလေးငယ် ၃ ယောက်၊ ကျောင်းကော်မတီဝင် ၁ ယောက်နဲ့ အဘွား ၁ ယောက် သေဆုံးခဲ့ပြီး ဆရာ ဆရာမနဲ့ ဒေသခံ ၈ ယောက် ဒဏ်ရာရရှိခဲ့ပါတယ်။

ဒေသခံပြည်သူတွေဟာ စစ်ကောင်စီတပ်တွေရဲ့ လက်နက်ကြီးနဲ့ လေကြောင်းပစ်ခတ်မှုတွေကြောင့် စိုးရိမ်ကြောက်လန့်နေရတယ်လို့ ဒေသခံတွေက ပြောပါတယ်။

ဒါ့အပြင် စစ်ကောင်စီတပ်တွေနဲ့ နယ်ခြားစောင့် ပူးပေါင်းတပ်ဖွဲ့တွေက ကမမောင်း-ဖာပွန် ကုန်းလမ်း ရေလမ်းကနေ ဖြတ်သန်းသွားလာခွင့်နဲ့ ရိက္ခာသယ်ယူခွင့်တွေကို တားဆီး ပိတ်ထားတာကြောင့် ဖာပွန်မြို့နယ်အတွင်း စားသောက်ကုန်တွေ ပြတ်လပ်နေပါတယ်။

ကုန်စည်သယ်ယူရာမှာ တောလမ်းကနေ သွားလာနေရပြီး လမ်းပန်းဆက်သွယ်ရေး ခက်ခဲတာတွေကြောင့် ဆန် ၁ အိတ် ၁၄၀,၀၀၀ ကျပ်ကနေ ၂၅၀,၀၀၀ ကျပ်၊ ဆီ ၁ ပိဿာ ၆,၀၀၀ ကျပ်ကနေ ၁၃,၀၀၀ ကျပ်၊ ကြက်သွန်နီ ၁ ပိဿာ ၅,၀၀၀ ကျပ်ကနေ ၁၂,၀၀၀ ကျပ်ထိ ကုန်ဈေးနှုန်းတွေ မြင့်တက်ခဲ့လို့ ဒေသခံတွေနဲ့ စစ်ဘေးရှောင် ၁ သိန်းကျော်ဟာ အခက်အခဲတွေနဲ့ ရင်ဆိုင်နေရပါတယ်။