လီဗာပူးအသင်းဟာ စပါးအသင်းနဲ့ပွဲစဉ်မှာ အဝါနဲ့ အနီကတ်တွေ ပြသခံရတာ များပြားခဲ့တဲ့အတွက် ပေါင် ၂၅၀၀၀ ဒဏ်ရိုက်ခံရတော့မှာဖြစ်ပါတယ်။

အင်္ဂလန်အက်ဖ်အေရဲ့ စည်းမျဉ်းတွေထဲမှာ အသင်း တသင်း အနေနဲ့ တပွဲတည်းမှာပဲ ကတ်ပြား ၆ ခုနဲ့ အထက် ပြသခံရမယ်ဆိုရင် အရေးယူခံရမှာဖြစ်ကြောင်း စည်းမျဉ်းသတ်မှတ်ထားတာပါ။

လီဗာပူးအသင်းဟာ စပါးအသင်းနဲ့ ပွဲစဉ်မှာ အနီကတ် နှစ်ကတ်ပြသခံခဲ့ရသလို အဝါကတ် ၅ ကတ်အထိလည်းပြသခံခဲ့ရတာပါ။

စုစုပေါင်းပြသခံရတဲ့ကတ် ၇ ကတ်အထိရှိခဲ့တာကြောင့် ပေါင် ၂၅၀၀၀ ဒဏ်ရိုက်ခံရဖို့ ဖြစ်လာခဲ့တာပါ။

စပါးအသင်းက ၂ ဂိုး ၁ ဂိုးနဲ့ အနိုင်ရခဲ့တဲ့ အဲဒီပွဲစဉ်မှာ လီဗာပူးအသင်းရဲ့ သွင်းဂိုးတစ်ဂိုးဟာလည်း လူကျွံတယ်ဆိုပြီး ပယ်ဖျက်ခံခဲ့ရပါသေးတယ်။

လီဗာပူးအသင်းဟာ ကွင်းလယ်လူ ဂျုံးစ်ရဲ့အနီကတ်ပြစ်ဒဏ်အပေါ်မှာတော့ အယူခံ တင်သွင်းထားတယ်လို့ သိရပါတယ်။ 

Photo-Reuters