ရန်ကုန်တိုင်းဒေသကြီးအတွင်းရှိ သာကေတ၊ မြောက်ဥက္ကလာ၊ လှိုင်သာယာနဲ့ ရွှေပြည်သာ၊ သင်္ဃန်းကျွန်းနဲ့ တိုက်ကြီးမြိုနယ်မှာ မှတ်ပုံတင်တခုကို ၅ သောင်းမှ ၅ သိန်းအထိ ပေးပြီး လုပ်နေရတယ်လို့ သွားရောက်လုပ်ကိုင်နေသူတွေက ပြောပါတယ်။
"အသစ်ဆို ၄ သိန်း ပျောက်ပျက်မိတ္တူလျှောက်မယ်ဆို ၂ သိန်း၊ ၁ သိန်းခွဲကျတယ်၊ ကိုယ်တိုင်သွားလုပ်ကြည့် သိလိမ့်မယ်၊ နာမည်တွေ တပ်မပြောချင်ဘူး၊ ပေးရတဲ့လူတိုင်း သိတယ်။"
လှိုင်သာယာမြိုနယ် လဝကရုံးမှာတော့ မှတ်ပုံတင်အသစ်ပြုလုပ်ရာမှာ ၈ သောင်းမှ ၁ သိန်းအထိ စျေးရှိပြီး ငွေကြေးကုန်းကျမခံနိုင်ပါက ၄ လမှ ၅ လအထိ ကြန့်ကြာတယ်လို့ ၁၆ ရပ်ကွက်နေသူတဦးက ဒီဗွီဘီကို ပြောပါတယ်။
"ကျနော်မှတ်ပုံတင်လုပ်တာ ၁ သိန်းကုန်တယ်။ ကျနော် သူငယ်ချင်းက နိုင်ငံတော်က အလကားလုပ်ပေးတာဆိုပြီးပြောတာ၊ မှတ်ပုံတင်လုပ်တာ မပေးရဘူးလေဆိုပြီး ပြန်ပြောတယ်။ ၅ လကျော်ကြာပြီ မှတ်ပုံတင်မရသေးဘူး။"
မြောက်ဥက္ကလာ လဝက ဦးစီးမှုးရုံးမှာ မှတ်ပုံတင်ပြုလုပ်လိုပါက ရှယ်နဲ့ရိုးရိုးဝန်ဆောင်မှုရှိပြီး ရိုးရိုးမှာ ၆ သောင်းဖြစ်ပြီး ရှယ်ဆိုပါက ၁ သိန်း ၃ သောင်းအထိ ပေးရတယ်လို့ ၂ ရပ်ကွက်နေသူတဦးက ဒီဗွီဘီကို ပြောပါတယ်။
"ရိုးရိုးက ကိုယ့်ဘာသာလက်ဘွေနှိပ်ပြီး သွားယူရတာ။ ရှယ်ကတော့ အိမ်မှာနေရုံပဲ။ လဝကရုံးက ဝန်ထမ်းကိုယ်တိုင် မှင်ယူလာပြီး အိမ်မှာလက်ဘွေလာနှိပ်ပေးတာ။"
စျေးသက်သာဆုံးမှာ တောင်ဒဂုံလဝက ဦးစီးမှူးရုံးဖြစ်ပြီး မှတ်ပုံတင်ပြုလုပ်ရာမှာ လူတဦးကို ၂ သောင်းခွဲမှ ၃ သောင်းခွဲအထိသာ တောင်းတယ်လို့ ၂၀ ရပ်ကွက်နေသူတဦးက ပြောပါတယ်။
ဒါ့အပြင် နာမည်ဆိုးနဲ့ ကျော်ကြားတဲ့ သာကေတ၊ သင်္ဃန်းကျွန်း၊ ရွှေပြည်သာ စတဲ့ လဝက ဦးစီးမှူးရုံးတွေမှာတော့ မှတ်ပုံတင်အသစ်လျှောက်ထားတာ၊ ပျောက်ပျက်မိတ္တူ လျှောက်ထားတာ၊ ပုံစံ ၁၀ အဝင်အထွက်၊ မွေးတိုး စတဲ့ကိစ္စတွေ ပြုလုပ်ရာမှာ ၅ သောင်းမှ ၁ သိန်းခွဲအထိ တောင်းယူတယ်လို့ သွားရောက်လုပ်ကိုင်သူတွေဆီ သိရပါတယ်။
