ထိုင်းနိုင်ငံ၊ တာ့ခ်ခရိုင်၊ မဲဆောက်မြို့မှာ တရားမဝင်နေထိုင်နေတဲ့ မြန်မာနိုင်ငံသား ၄ ဦးကို စက်တင်ဘာ ၁၄ ရက်မှာ ဖမ်းဆီးရမိခဲ့တယ်လို့ တာ့ခ်ခရိုင် လူဝင်မှုကြီးကြပ်ရေးဌာနက ထုတ်ပြန်ပါတယ်။
စက်တင်ဘာ ၁၄ ရက် မနက် ၇ နာရီလောက်က တာ့ခ်ခရိုင် လူဝင်မှုကြီးကြပ်တားဆီးနှိမ်နင်းရေးအဖွဲ့က မဲဆောက်မြို့တွင်းမှာ အသက် ၃၀ နှစ်အရွယ် မြန်မာနိုင်ငံသားတဦးကို ဖမ်းဆီးခဲ့သလို မနက် ၉ နာရီလောက်က အမှတ် ၆ စစ်ဆေးရေးဂိတ်မှာ သက်တမ်း ၄၅၉ ရက်ထက် ပိုနေထိုင်တဲ့ အသက် ၂၈ နှစ်အရွယ် မြန်မာနိုင်ငံသားတဦးကို ဖမ်းဆီးခဲ့ပါတယ်။
စက်တင်ဘာ ၁၄ ရက် နေ့လယ် ၁ နာရီခွဲမှာ ထိုင်းနယ်ခြားစောင့်စစ်တပ်နဲ့ တာ့ခ်ခရိုင် လူဝင်မှုကြီးကြပ်ရေး အရာရှိတွေ ပူးပေါင်းပြီး သောင်ရင်းမြစ်ကမ်းဘေးမှာရှိတဲ့ ကျေးရွာတွေက တရားမဝင် နိုင်ငံခြားသားတွေရှိရာ နေရာတွေကို ဝန်းရံပိတ်ဆို့ရှာဖွေရာ ဘန်ဒွန်ချိုင်းကျေးရွာမှာ နေထိုင်တဲ့ တရားမဝင် မြန်မာနိုင်ငံသား ၂ ဦးကို ဖမ်းဆီးရမိခဲ့ပါတယ်။
ဖမ်းဆီးခံရတဲ့ မြန်မာနိုင်ငံသား ၄ ဦးကို မဲဆောက်ရဲစခန်းမှာ ဆက်လက်စစ်ဆေးနေပြီး ပုဒ်မ ၂၂ အရ အရေးယူဆောင်ရွက်သွားဖို့ ရှိနေတယ်လို့ တာ့ခ်ခရိုင် လူဝင်မှုကြီးကြပ်ရေးဌာနက ထုတ်ပြန်ခဲ့ပါတယ်။
တာ့ခ်ခရိုင် လူဝင်မှုကြီးကြပ်ရေးဌာနနဲ့ ထိုင်းနယ်ခြားစောင့်စစ်တပ်တို့ဟာ နယ်စပ်မတည်မငြိမ် ကိစ္စတွေကြောင့် တရားမဝင် နိုင်ငံခြားသားတွေရှိရာ နေရာတွေကို ဝင်ရောက်စစ်ဆေး လိုက်လံဖမ်းဆီးနေပြီး စက်တင်ဘာ ၁၄ ရက် တရက်တည်း မြန်မာနိုင်ငံသား ၄ ဦး အပါအဝင် ၁၈ ဦး ဖမ်းဆီးရမိခဲ့တယ်လို့ လူဝင်မှုကြီးကြပ်ရေးဌာနရဲ့ ထုတ်ပြန်ချက်အရ သိရပါတယ်။
တာ့ခ်ခရိုင် မဲဆောက်မြို့မှာ ခွင့်ပြုချက်မရှိဘဲ နေထိုင်နေတဲ့ နိုင်ငံခြားသားတွေနဲ့ ခိုးဝင်နေတဲ့ နိုင်ငံခြားသားတွေကို စီမံချက်နဲ့ ဖမ်းဆီးသွားမယ်လို့ ပြီးခဲ့တဲ့ရက်ပိုင်းက တာ့ခ်ခရိုင် လူဝင်မှုကြီးကြပ်ရေးဌာနက ထုတ်ပြန်ခဲ့ပါတယ်။
Source/Photo-Tak Immigration
