ချင်းပြည်နယ်၊ မတူပီ-ပလက်ဝ လမ်းကြောင်းပေါ်ရှိ ခလရ-၃၀၄ စစ်ကောင်စီ တပ်စခန်းဂိတ်ကို စက်တင်ဘာ ၄ ရက် မနက် ၈ နာရီခွဲလောက်မှာ Chinland Defence Force - Matupi (CDF - Matupi) က ပစ်ခတ်တိုက်ခိုက်ခဲ့တယ်လို့ CDF - Matupi ထံက သိရပါတယ်။

CDF - Matupi ပြောရေးဆိုခွင့်ရှိသူ ကိုနိုင်ဂျွန်ကိမ်းက “ကျနော်တို့ ဒီဂိတ်ကိုသွားပြီး ဝင်တိုက်တာ ဖြစ်ပါတယ်။ အချိန်အကြာကြီး တိုက်တာတော့ မရှိခဲ့ပါဘူး။ အဲဘက်က လက်နက်ကြီးတွေနဲ့ တောက်လျှောက် ပစ်နေတာနဲ့ပဲ နာရီဝက်လောက် တိုက်ပွဲဖြစ်ပွားပြီးတော့ ပြန်ဆုတ်ခဲ့တာပါ” လို့ ဒီဗွီဘီကို ပြောပါတယ်။

အဆိုပါတိုက်ခိုက်မှုမှာ စစ်ကောင်စီဘက်ကတော့ အနည်းဆုံး ၃ ဦး ထိခိုက်သွားပြီး ဒဏ်ရာပြင်းပြင်းထန်ထန် ရမယ်လို့ ခန့်မှန်းကြောင်းနဲ့  CDF တပ်ဖွဲ့ဝင်တွေကတော့ အထိအခိုက်မရှိ လုံခြုံတဲ့နေရာတွေဆီ ကောင်းမွန်စွာ ဆုတ်ခွာနိုင်တယ်လို့   ကိုနိုင်ဂျွန်ကိမ်းက ပြောပါတယ်။

ပစ်ခတ်တိုက်ခိုက်မှုအပြီး စစ်ကောင်စီဘက်က လက်နက်ကြီးတွေနဲ့ ပစ်ခတ်မှု ရှိတဲ့အတွက် ပြည်သူတွေအနေနဲ့ အထူးသတိထားသွားလာကြဖို့ CDF - Matupi က သတိပေးထားပါတယ်။

မတူပီမြို့နယ်မှာ တိုက်ပွဲတွေဖြစ်ပွားနေသလို  မိုးသည်းထန်စွာရွာသွန်းပြီး လမ်းတွေပျက်စီးနေတာကြောင့် ဒေသတွင်းမှာ စားနပ်ရိက္ခာ ကုန်စျေးနှုန်းတွေ အဆမတန် မြင့်တက်နေတယ်လို့ မြို့ခံပြည်သူတွေထံက သိရပါတယ်။

ပြီးခဲ့တဲ့ ဇူလိုင်လကတည်းက ချင်းပြည်နယ်မှာ မိုးသည်းထန်စွာရွာသွန်းပြီး မတူပီမြို့ရဲ့ အဓိက ကုန်သွယ်ရေးလမ်းကြောင်းဖြစ်တဲ့ ဟားခါး-မတူပီ ကားလမ်းမကြီး ဩဂုတ် ၁၅ ရက်မှာ ပျက်စီးသွားတဲ့အတွက် ကုန်စျေးနှုန်းတွေ အဆမတန် မြင့်တက်နေတာ ဖြစ်ပါတယ်။

မတူပီ-ဟားခါး လမ်းမကြီး၊ လုံလှော်-ဇကမ်းအကြား ကားလမ်းမကြီး မြေပြိုကျခဲ့တဲ့အတွက် ကား၊ ဆိုင်ကယ် စတဲ့ယာဉ်တွေ သွားလာလို့မရတော့ဘဲ ကုန်ပစ္စည်းသယ်ယူဖို့ ခက်ခဲနေတာပါ။

အခြေခံစားသောက်ကုန်တွေကို​တော့ တောလမ်းတွေကနေ ဆိုင်ကယ်နဲ့ရော လူအင်အားနဲ့ပါ တနိုင်တပိုင် သယ်ယူနေရတဲ့အတွက် စျေးကြီးပေးဝယ်နေရတယ်လို့လည်း မြို့ခံတွေက ဆိုပါတယ်။

မတူပီဒေသခံတဦးက “လမ်းပျက်စီးတာက အတော်များလို့ တော်ရုံပြင်နိုင်ဖို့ မလွယ်သေးပါဘူး။ အခုရက်ထဲ တိုက်ပွဲကလည်း ပြန်ဖြစ်နေတော့ လမ်းက ပြန်ကောင်းဦးမယ် မထင်ပါဘူး” လို့ ပြောပါတယ်။

မတူပီမှာ လက်ရှိ ဓာတ်ဆီတလီတာကို ကျပ် ၅,၀၀၀ ၊ ပေါ်ဆန်းမွှေးတအိတ်ကို ကျပ် ၁၃၀,၀၀၀ ဝန်းကျင်၊ စားသုံးဆီတလီတာကို ကျပ် ၁၀,၀၀၀ အထိစျေးကြီးပေးဝယ်နေရတယ်လို့ မြို့ခံတွေဆီက သိရပါတယ်။