စစ်ကိုင်းတိုင်း၊ ဘုတလင်မြို့နယ်၊ သခွတ္တနယ်ရွာကို ဩဂုတ် ၁၂ ရက် မနေ့ညနေကစလို့ ဒီမနက်အထိ စစ်ကောင်စီက မီး ၃ ကြိမ်ရှို့ခဲ့ပြီး ဒေသခံရွာသားတွေ ထွက်ပြေးတိမ်းရှောင်နေကြရပါတယ်။
အဲဒီစစ်ကြောင်းမှာ အင်အား ၁၅၀ လောက်ပါပြီး ကူတော်ရွာရဲစခန်းက စစ်သားတွေနဲ့ ရေဦးဘက်ကတဆင့် စစ်ကြောင်းထိုးလာတဲ့ ပူးပေါင်းစစ်ကြောင်းဖြစ်တယ်လို့လည်း ဒေသခံတွေက ပြောပါတယ်။
သခွတ္တနယ်ရွာသားတယောက်က “မရကန်ရွာကိုမီးရှို့ခဲ့ပြီး ကျနော်တို့ ဘုတလင်မြို့နယ် ကူတော်စခန်းကိုဝင်ပြီး အင်အားထပ်တိုးပြီး မောင်းထောင်ရွာ၊ သစ်ခဲရွာ၊ လက်ယက်တွင်းရွာ၊ ဂွေးပင်ကျင်းရွာကနေ ဖြတ်ပြီး ကျနော်တို့ရွာကိုဝင်လာတာ။ မီးက မနေ့က ညနေ ၅ နာရီတကြိမ်၊ ည ၉ နာရီက တကြိမ်၊ ဒီနေ့ဩဂုတ် ၁၃ ရက်နေ့ မနက်ခင်းက တကြိမ် ရွာကိုမီးရှို့နေတာဗျ။ ရွာသားတွေကတော့ မနေ့က မနက်ခင်းကတည်းက ထွက်ပြေးနေရတယ်။ ရွာမီးရှို့နေတာက အဝေးကနေပဲ မီးခိုးလုံးကြီးတွေတက်နေတာ အဝေးကနေ မြင်နေရတယ်” လို့ ပြောပါတယ်။
အိမ်ခြေဘယ်လောင် ဆုံးရှုံးသွားလဲဆိုတာကိုလည်း မသိရသေးဘဲ စစ်ကောင်စီ စစ်ကြောင်းဟာ မနေ့ညက သခွတ္တနယ်ရွာမှာဝင်အိပ်ပြီး ဒီမနက်မှာလည်း ရွာကနေ ထွက်မသွားသေးတာကြောင့် ဒေသခံထောင်ချီထွက်ပြေးနေရတုန်းဖြစ်ပါတယ်။
