ထိုင်း-မြန်မာနယ်စပ်ရှိ ဒုက္ခသည်စခန်းမှ ထိုင်းနိုင်ငံအတွင်းကို တရားမဝင် ဝင်ရောက်ခဲ့တဲ့ မြန်မာနိုင်ငံသား ၁၀ ဦးနဲ့ ပို့ဆောင်ပေးတဲ့ထိုင်နိုင်ငံသား ၃ ဦးကို ထိုင်းရဲတပ်ဖွဲ့က ဖမ်းဆီးရမိခဲ့တယ်လို့ သြဂုတ် ၁၂ ရက်မှာ The Thaiger ထိုင်းသတင်းမှာ ဖော်ပြပါတယ်။

တမွန်မယ်​ခေးမြို့နယ် အဝေးပြေးလမ်းမကြီး ၁၃၃၇ မှာရှိတဲ့စစ်ဆေးရေးဂိတ်မှာ သြဂုတ် ၁၀ ရက် ညပိုင်းက ဒေသဆိုင်ရာအာဏာပိုင်တွေနဲ့ ထိုင်းရဲတပ်ဖွဲ့တို့ စစ်ဆေးနေချိန်မှာ ချင်းမိုင်လိုင်စင်နဲ့ ပစ်ကပ်ထရပ်ကား နှစ်စီးထဲမှာ ရွေ့ပြောင်း မြန်မာနိုင်ငံသား  ၁၀ ဦးနဲ့ ထိုင်းနိုင်ငံသား ၃ ဦးကို ဖမ်းဆီးရမိခဲ့ပါတယ်။

ပစ်ကပ်ထရပ်ကား နှစ်စီးလုံးရဲ့ ယာဥ်မောင်းတွေအပါအဝင် အမျိုးသား ၃ ဦးဟာ ထိုင်းနိုင်ငံသားတွေဖြစ်ပြီး  နောက်မှလိုက်ပါလာခဲ့တဲ့မြန်မာ ၁၀ ယောက်မှာ အသက် ၅ နှစ်မှ ၁၄ နှစ်ကြား ကလေး ၄ ဦးပါဝင်တယ်လို့ ထိုင်းရဲတပ်ဖွဲ့က ထုတ်ပြန်ခဲ့ပါတယ်။

ဖမ်းဆီးခံခဲ့ရတဲ့ ရွေ့ပြောင်းမြန်မာနိုင်ငံသားတွေဟာ စာရွက်စာတမ်းနဲ့ တရားဝင် အထောက်အထားတွေ မပါရှိပေမဲ့ ထိုင်းဘာသာစကားကိုကျွမ်းကျင်စွာ ပြောဆိုနိုင်တယ်လို့ ဆိုပါတယ်။

​ကယားပြည်နယ်မှာ တိုက်ပွဲတွေဖြစ်ပွားနေတာကြောင့် ထိုင်းနိုင်ငံသို့ ထွက်ပြေးလာပြီး နယ်စပ်အနီးရှိ ဒုက္ခသည်စခန်းမှာတခုမှာ နေထိုင်ကြကာ စခန်းကို ရိက္ခာကူညီပံ့ပိုးပေးတဲ့ ထိုင်းနိုင်ငံသားနဲ့ ချိတ်မိကာ  ထိုင်းနိုင်ငံရှိ ဆွေမျိုးတွေကိုတွေ့ဆုံဖို့ သွားရောက်ခဲ့တာလို့ ရဲတပ်ဖွဲ့ထံ ထွက်ဆိုဝန်ခံခဲ့ပါတယ်။

ဖမ်းဆီးရမိခဲ့တဲ့ ထိုင်းနိုင်ငံသား သုံးယောက်ထဲက  အနိုင်းဟာ ထိုင်းနိုင်ငံအတွင်းကို ခိုးဝင်လာတဲ့ မြန်မာဒုက္ခသည်တွေကို ၂ ကြိမ် ကူညီပေးခဲ့ကြောင်းနဲ့ ကယ်ဆယ်ရေးစခန်းတွေကို ပစ္စည်းတွေ ကူညီပို့ပေးသူဖြစ်လို့  မြန်မာဒုက္ခသည်တွေနဲ့ အဆက်အသွယ်ရှိနေခဲ့တာ ဖြစ်ပါတယ်။

အဆိုပါ ထိုင်းနိုင်ငံသား ၃ ဦးကို  တရားမဝင်ရွေ့ပြောင်းနေထိုင်သူ မြန်မာနိုင်ငံသားတွေကို ခေါ်ယူမှုနဲ့ တရားစွဲဆိုထားတယ်လို့ ထိုင်းသတင်းမှာ ဖော်ပြပါတယ်။

Source. The Thaiger