မြန်မာသင်္ဘောသား ၄ ဦး ပါသွားတဲ့ MV Tung Sung သင်္ဘောကို မှောက်ရက် အနေအထားကနေ ပြန်လည်တည့်မတ်နိုင်ခဲ့တယ်လို့ Malaysia Maritime Enforcement Agency (MMEA) Sarawak ရဲ့ ဒါရိုက်တာ ဇင်အက်စမန်အမ်ဒီယူနွတ်က ထုတ်ပြန်ထားပါတယ်။
ဇူလိုင် ၁၉ ရက်က မလေးရှားနိုင်ငံ၊ ဆာရာဝပ်ပြည်နယ်၊ ကိုချင်းမြို့ကနေ ဆာရီကိုင်းဆိပ်ကမ်းကို ထွက်ခွာလာရင်း ဆဘူရောင်ဆိပ်ကမ်းရဲ့ အနောက်မြောက်ဘက် ရေမိုင် ၄ မိုင်ခန့်အကွာမှာ တိမ်းမှောက်ခဲ့တဲ့ MV Tung Sung သင်္ဘောဟာ ၁၁ ရက်အကြာ မှောက်ရက်အနေအထားကနေ ဇူလိုင် ၃၀ ရက်မှာ အောင်မြင်စွာ ပြန်လည်တည့်မတ်နိုင်ခဲ့တာပါ။
အဲဒီသင်္ဘောပေါ်မှာ လိုက်ပါသွားတဲ့ မြန်မာသင်္ဘောသား ကိုသက်မင်းဂျူလိုင်၊ ကိုရဲလင်းထက်၊ ကိုလှဝင်းထွန်း၊ ကိုထွန်းလင်းဦး အပါအဝင် တခြားနိုင်ငံသား ၄ ဦးနဲ့ စုစုပေါင်း ၈ ဦး ပျောက်ဆုံးနေတာဖြစ်ပြီး သင်္ဘောကိုတော့ ဆဘူရောင်ဆိပ်ကမ်းရဲ့ အနောက်မြောက်ဘက် ရေမိုင် ၈ မိုင်အကွာကို ဆွဲယူ ရွှေ့ပြောင်းပြီးပြီလို့ ဆိုပါတယ်။
မြန်မာသင်္ဘောသား ကိုလှဝင်းထွန်းရဲ့ ညီမဖြစ်သူကတော့ “ကိုကြီးရဲ့သတင်းက လွဲပြီးရင် ကျန်တာတွေ ဘာမှမကြားချင်ပါဘူးရှင်။ တမိသားစုလုံးလည်း စိတ်ဓာတ်တွေကျနေပြီ။ ဘာသတင်းမှ ခုထိမရသေးလို့ပါ။ ကျန်တာတွေကတော့ ဘာမှနားမလည်ပါဘူးရှင်” လို့ ပြောပါတယ်။
ဇူလိုင် ၂၂ ရက် မွန်းလွဲပိုင်းက ဘယ်သူဘယ်ဝါ ခွဲခြားလို့မရသေးတဲ့ ရုပ်အလောင်း ၄ လောင်းကို ဆယ်ယူရရှိခဲ့ပြီး ဆာရာဝပ်ဆေးရုံကို ပို့ဆောင်ထားတယ်လို့ သိရပါတယ်။
သေဆုံးသူတွေက ဘယ်သူဘယ်ဝါဖြစ်တယ်ဆိုတာကို DNA စစ်ဖို့အတွက် မြန်မာသင်္ဘောသား မိသားစုဝင်တွေရဲ့ DNA နမူနာတွေကိုလည်း မလေးရှားနိုင်ငံအထိ ယူဆောင်နိုင်ဖို့ စီစဉ်နေပြီး ရှာဖွေကယ်ဆယ်မှုတွေကိုလည်း ဆက်လက်လုပ်ဆောင်နေကာ ကျန်တဲ့ သင်္ဘောသား ၄ ဦးဟာလည်း မှောက်နေတဲ့ သင်္ဘောအတွင်း ရှိနိုင်မယ်လို့ ခန့်မှန်းထားကြောင်း MMEA က ထုတ်ပြန်ထားပါတယ်။
ကိုလှဝင်းထွန်းရဲ့ ချစ်သူဖြစ်သူကတော့ “အစ်ကိုက ရေကူးကျွမ်းတယ်လေ။ ခုထိတော့ အားလုံးက အသက်ရှင်ကျန်နိုင်ပါသေးတယ်ဆိုပြီး မျေှာ်လင့်ချက်အပြည့် ရှိနေကြဆဲပါ” လို့ ဒီဗွီဘီကို ပြောပါတယ်။
လက်ရှိမှာတော့ ပြန်လည်တည့်မတ်ထားတဲ့ သင်္ဘောကို တည်ငြိမ်အောင် သေချာ ဆောင်ရွက်နေရတာဖြစ်ပြီး ၃၁ ရက် မနက် ၈ နာရီမှာ မီးသတ်နဲ့ ကယ်ဆယ်ရေးအဖွဲ့တွေက ရှာဖွေကယ်ဆယ်ရေး ပြန်စလုပ်ကြမယ်လို့ ဇင်အဇမန်းက ပြောပါတယ်။
သဲနဲ့ ကျောက်တွေကိုသာ အဓိကထားတင်လေ့ရှိတဲ့ MV Tung Sung သင်္ဘာဟာ ကုန်တန်ချိန် GRT ၁,၀၀၀ နီးပါးရှိပြီး တိမ်းမှောက်ချိန်မှာတော့ ရာသီဥတုဆိုးဝါးနေတယ်လို့ သိရပါတယ်။
