မလေးရှားနိုင်ငံ၊ ဆူဘူယာအူရေပြင်မှာ ဇူလိုင် ၂၀ ရက်က ကုန်တင်သင်္ဘောတစီး တိမ်းမှောက်နစ်မြုပ်ပြီး မြန်မာနိုင်ငံသား ၄ ဦး အပါအဝင် ၉ ဦး ပျောက်ဆုံးနေတယ်လို့ အာဏာပိုင်တွေရဲ့ ပြောဆိုချက်ကို ကားကားပြီး စင်ကာပူအခြေစိုက် The Straits Times သတင်းစာမှာ ဖော်ပြပါတယ်။
ကျောက်စရစ်တင်ဆောင်လာတဲ့ ကုန်သင်္ဘောဟာ ကူချီမှ ဆူရီကိုင်းကို သွားရောက်စဥ် ဆူဘူယာအူရေပြင်မှာ တိမ်းမှောက်သွားခဲ့တာဖြစ်ပြီး မလေးရှားရေကြောင်းလှည့် သင်္ဘော ၂ စီးနဲ့ ရှာဖွေနေပါတယ်။
မလေးရှား ရေကြောင်းထိန်းသိမ်းရေး အေဂျင်စီရဲ့ ရေတပ်ဗိုလ်ချုပ် ဇင်အက်ဇ်မန်က ပျောက်ဆုံးသင်္ဘောသားတွေမှာ မလေးရှားနိုင်ငံသား ၄ ဦး၊ မြန်မာနိုင်ငံသား ၄ ဦးနဲ့ အင်ဒိုနီရှားနိုင်ငံသား ၁ ဦးတို့ဖြစ်ပြီး အသက် ၂၀ မှ ၅၂ နှစ်ကြား ရှိတယ်လို့ ပြောပါတယ်။
ပျောက်ဆုံးသွားတဲ့ မြန်မာနိုင်ငံသား ၄ ဦးကတော့ မင်းဇူလှိုင်၊ ရဲလင်းထက်၊ လှဝင်းထွန်းနဲ့ ထွန်းလင်းဦး တို့ ဖြစ်ကြပါတယ်။
ပျောက်ဆုံးနေတဲ့ သင်္ဘောသား ၉ ဦး ရှာဖွေကယ်ဆယ်ရေး လုပ်ငန်းတွေကို ဇူလိုင် ၂၁ ရက် မနက် ၈ နာရီကစပြီး ပူလာအူဘူရန် အနီးတဝိုက်ကနေ တန်ဂျင်ပိုအထိ ပြုလုပ်နေပါတယ်။
ကုန်တင်သင်္ဘော မတိမ်းမှောက်မီ ကုန်တင်သင်္ဘောပိုင်ရှင်ထံက ဒုက္ခရောက်နေတဲ့ ဖုန်းခေါ်ဆိုမှုတခုကို လက်ခံရရှိခဲ့တယ်လို့ ဗိုလ်ချုပ်အက်ဇ်မန်က ပြောပါတယ်။
ဒီနေ့မွန်းလွဲ ၂ နာရီမှာ ဗိုလ်ချုပ်အက်ဇ်မန်က ဆူဘူယာအူရေဆိပ်ခံတံတားမှာ သင်္ဘောတိမ်းမှောက် နစ်မြုပ်မှုကို ကယ်ဆယ်ရေးလုပ်ငန်းတွေ ပြုလုပ်တာနဲ့ပတ်သက်ပြီး သတင်းစာရှင်းလင်းပွဲ ပြုလုပ်သွားမှာ ဖြစ်ပါတယ်။
source. The Straits Times
