ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ ခေါင်းအိတိုက်ပွဲမှာ ကျဆုံးခဲ့တဲ့ PDF ရဲဘော် ၂ ဦးရဲ့ ဈာပနကို ဇွန် ၁၁ ရက်က ပြုလုပ်ခဲ့တယ်လို့ တပ်ရင်းအမှတ်-၁၀၀၇ (မိုးဗြဲ ပြည်သူ့ကာကွယ်ရေးတပ်-၂) က ထုတ်ပြန်ပါတယ်။
ဇွန် ၁၀ ရက်က ဖယ်ခုံမြို့နယ် ခေါင်းအိကျေးရွာမှာ စစ်ကောင်စီတပ်နဲ့ ဒေသကာကွယ်ရေး ပူးပေါင်းတပ်ဖွဲ့တွေကြား တိုက်ပွဲဖြစ်ပွားခဲ့ပြီး တိုက်ပွဲအတွင်း တပ်ရင်းအမှတ်-၁၀၀၇ (မိုးဗြဲ ပြည်သူ့ကာကွယ်ရေးတပ်-၂) မှ စနိုက်ပါ ရဲဘော် နာတားလက်နဲ့ ကျောင်းသားရဲဘော် မောင်ဂျော်နိုင်တို့ ၂ ဦးဟာ စစ်ကောင်စီတပ်က ပစ်ခတ်လိုက်တဲ့ လက်နက်ကြီးထိမှန်ပြီး ကျဆုံးခဲ့တာလို့ ထုတ်ပြန်ချက်မှာ ဖော်ပြထားပါတယ်။
“တိုက်ပွဲတိုင်းတွင် ရွပ်ရွပ်ချွံချွံ ပါဝင်တိုက်ခိုက်တဲ့ ရဲဘော်များဖြစ်သလို ကျနော်တို့အတွက် ကြီးမားတဲ့ ပေးဆပ်မှုတရပ်ဖြစ်ပါတယ်။ ရဲဘော် ၂ ဦးရဲ့ မိသားစုဝင်နဲ့ထပ်တူ ဝမ်းနည်းကြေကွဲရပါတယ်။ ရဲဘော်နာတားလက်နဲ့ ရဲဘော်ဂျော်နိုင်တို့ကို အာဇာနည် သူရဲကောင်းများအဖြစ် အလေးနီပြု ဂုဏ်ပြုမှတ်တမ်းတင်ပါတယ်” လို့ တပ်ရင်းအမှတ်-၁၀၀၇ (မိုးဗြဲ ပြည်သူ့ကာကွယ်ရေးတပ်-၂) က ပြောပါတယ်။
စစ်တပ်က အာဏာသိမ်းပြီး တော်လှန်ရေးကာလ ၂ နှစ်ကျော်အတွင်း စစ်အာဏာရှင်ကို တွန်းလှန်တိုက်ခိုက်ရင်း တပ်ရင်းအမှတ်-၁၀၀၇ (မိုးဗြဲ ပြည်သူ့ကာကွယ်ရေးတပ်-၂) မှ ရဲဘော် ၈ ဦး ကျဆုံးခဲ့သလို ခြေထောက်ဆုံးရှုံးသွားတဲ့ ရဲဘော် ၄ ဦးနဲ့ ထိခိုက်ဒဏ်ရာရ ရဲဘော် ၁၇ ဦး အထိ ရှိလာပြီလို့ သိရပါတယ်။
