စစ်ကိုင်းတိုင်း၊ ကန့်ဘလူမြို့နယ်မှာ ပြီးခဲ့တဲ့ မတ်လအတွင်း စစ်တပ်နဲ့ ပျူစောထီးတွေ  မီးရှို့ဖျက်ဆီးခဲ့တာကြောင့် ရွာ ၅ ရွာက နေအိမ် ၁၀၁ လုံး၊ စပါးတင်း‌ပေါင်းထောင်ချီ၊ လယ်ယာသုံး ထွန်စက် ၃ စီး၊ ထော်လာဂျီ၊ ထွန်စက်အကြီးနဲ့ ဆိုင်ကယ် ၁၇ စီးတို့အား ကျွန်းလှကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင်က ဧပြီ ၇ ရက်မှာ ထုတ်ပြန်ပါတယ်။

ဒေသခံအမျိုးသားတဦးက  "အခုလ ၂ ရက်နေ့ကနေ ၄ ရက်နေ့ထိ ၃ ရက်အတွင်း လျှော်ဖြူကုန်း၊ ဉာဏ်အင်းရွာနဲ့ အင်းလည်ကြီး ရွာတွေက လူနေအိမ်တွေကို မီးရှို့ခဲ့တယ်။ ဆွံ့အနားမကြား စိတ်ကျန်းမာရေး မကောင်းတဲ့ အမျိုးသား ၂ ယောက်လည်း စစ်တပ်နဲ့ ပျူစောထီးတွေက သတ်ဖြတ်သွားတယ်" လို့  ပြောပါတယ်။

ကန့်ဘလူ (၆၀၀၆) အမြှောက်တပ်ရင်းကနေ ဟောင်ဝစ်ဇာ အမြောက်ကြီးတွေနဲ့ ရမ်းသန်း ပစ်ခတ်တာကြောင့် ညောင်ပေါင်ရင်းရွာက လူနေအိမ် ၁ လုံး၊ အင်းလယ်ကြီးရွာက လူနေအိမ် ၂ လုံး မီးရှို့လောင်ဆုံးရှုံးခဲ့ပါတယ်။ 

စစ်ကောင်စီတပ်ဟာ ထန်းကုန်းတိုက်နယ်၊ ညောင်ဇင်ကြီးရွာက အသက် ၃၅ နှစ်အရွယ် စိတ်ကျန်းမာရေးမကောင်းသူကို မီးရှို့သတ်ဖြတ်ခဲ့သလို ကိုးတောင်ဘို့တိုက်နယ် အလယ်ခုံရွာက အသက် ၂၂ အရွယ် အမျိုးသား ၁ ဦးကိုလည်း မျက်နှာနဲ့ ခေါင်းတခြမ်းပွင့်ထွက်သွားတဲ့အထိ ရက်ရက်စက်စက်သတ်ဖြတ်ခဲ့တယ်လို့ ဆိုပါတယ်။  

မတ် ၈ ရက်နေ့ကလည်း စစ်တပ်က ဖမ်းဆီးသွားတဲ့ ကာဘိုးတိုက်နယ် ကျီစုရွာက ပြည်သူ ၃ ဦးဟာ ဒီနေ့အချိန်ထိ အဆက်အသွယ် ပြတ်တောက် ပျောက်ဆုံးနေတယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင်က ထုတ်ပြန်ထားပါတယ်။

စစ်ကိုင်းတိုင်း ပုလဲမြို့နယ် ပန်းရွာနဲ့ တနယ်ရွာအနီး ဧပြီ ၅ ရက် မနက် ၉ နာရီက Mi35 နှစ်စီး၊ ရိုးရိုးဂျက်လေယာဉ် ၂ စီးနဲ့ပစ်ခတ်ကာ မြေပြင်ကို စစ်ကြောင်းထိုးကာ M7 PDF စခန်းကို စီးနင်းပြီး ရဲဘော် ၇ ယောက်အား သတ်ဖြတ်သွားကြတယ်လို့ ပုလဲဒေသခံတွေက ပြောပါတယ်။

အခုလိုစစ်ကောင်စီက သတ်ဖြတ်ထားခဲ့ပြီး မီးရှို့တာတွေပါ လုပ်ဆောင်ထားခဲ့တာကြောင့် သေဆုံးသူတွေရဲ့ ရုပ်အလောင်းကို ပြာပုံအနေထားနဲ့ပဲ တွေ့ရတယ်လို့ ဆိုပါတယ်။

ဒေသခံပြည်သူကာကွယ်‌ရေးအဖွဲ့ဝင်တဦးက “စခန်းကို ဝင်အစီးခံရတာက ဧပြီ ၅ ရက်က ဝင်စီးခံရတယ်။ သူတို့‌ လေယာဉ်နဲ့ လာပစ်တဲ့ အချိန် ရဲဘော်လေးတွေ သင်တန်းနားပြီး ထမင်းစားနေချိန် အခုလိုကြီး အစီးခံလိုက်ရတာ။ သူတို့ ဝင်စီးတော့ စခန်းထဲမှာ ရဲဘော် ၇ ယောက်ပိတ်မိပြီး ကျန်ခဲ့တာရှိတယ်။ သူ‌တို့ ဧပြီ ၆ရက် ကြတော့ နောက်တော့ မြိုင်မြို့နယ် ညောင်ရွာက စခန်းကို ထပ်မံဝင်ရောက်စီးနင်းဖို့ လာတင်သွားကြတယ်။ သူတို့ ထွက်သွားပြီး ဧပြီ ၆ ရက် ညနေ ၅ နာရီမှာ စခန်းကို သွားပြီးကြည့်တဲ့အခါ စခန်းကိုလည်း မီးရှို့ခဲ့သလို ဆိုင်ကယ်တွေနဲ့အတူ ရဲဘော်လေးတွေကိုပါ မီးရှို့ထားခဲ့တဲ့ ပြာပုံပါ တွေ့ခဲ့ရတယ်။ ရဲ‌ဘော်အကုန်လုံးကို သတ်ပြီး မီးရှို့ခဲ့တာလားဆိုတာကတော့ အတိကျမပြောနိုင်ဘူး။ သူတို့ရှို့သွားတာက အရိုးကိုပါ ပြာကျအောင်ရှို့သွားကြတာဆိုတော့ အတိအကျ ပြောလို့ မရသေးဘူး။ ဧပြီ ၇ ရက်အထိ ပျောက်နေတဲ့ ရဲဘော်တွေကို ရှာဖွေပေမဲ့ မတွေ့ရလို့ ဖမ်းမိသွားတဲ့ ၇ ဦလုံး သေဆုံးရတယ်လို့ အကြမ်းဖျင်းတွက်ထားရတယ်” လို့ ပြောပါတယ်။

အဆိုပါ ရဲဘော် ၇ ဦးနဲ့အတူ M7အဖွဲ့ရဲ့ စခန်းတဲနှစ်လုံးမီးရှို့ဖျက်ဆီးခံရပြီး M 4 ၁ လက်၊ 9 MM ပစ္စတို ၁ လက်၊ ၆၀ မမ ၁ လက်နဲ့ လက်လုပ်အဖူး တချို့၊ မိုင်းတချို့၊ လက်လုပ်သေနတ် ၆ လက်၊ ဆိုင်ကယ် ၄ စီး၊ မီးစက်တလုံး၊ ယူနီဖောင်းနဲ့ ဒရုန်းတစီး ဆုံးရှုံးတယ်လို့လည်း ဒေသခံ ကာကွယ်ရေးအဖွဲ့တွေရဲ့ပြောပြချက်အရ သိရပါတယ်။