ကချင်ပြည်နယ်၊ ဗန်းမော်မြို့နယ်မှာ စစ်ကောင်စီလက်အောက်ခံ အခွန်ဦးစီးဌာနနဲ့ စည်ပင်သာယာဌာနဝန်ထမ်းတွေက ပြည်သူလူထုတွေထံကနေ နှစ်ဟောင်းက ကြွေးကျန် အခွန်အခတွေကို လိုက်လံကောက်ခံနေပါတယ်။
စစ်အာဏာသိမ်းပြီး ၂ နှစ်တာ ကာလ အတွင်း အခွန်အခ လိုက်လံကောက်ခံတာမရှိပဲ ၂၀၂၃ ခုနှစ် မတ်လပိုင်းကျမှ ၂ နှစ်စာ စုပေါင်းပြီး ပြန်လည်ကောက်ခံနေတာဖြစ်တဲ့အတွက် အခက်အခဲတွေနဲ့ကြုံတွေ့နေရတယ်လို့ ဒေသခံတွေဆီက သိရပါတယ်။
ဗန်းမော်ဒေသခံ အမျိုးသားတစ်ဦးက "အရင် မကောက်ခဲ့တဲ့ အခွန်အခတွေ ခုမှ နှစ် နှစ်စာ ပေါင်းပြီး ဆောင်ခိုင်းတယ်။ အာဏာသိမ်းပြီးနောက်ပိုင်းကတည်းက အမြတ်ခွန် အိမ်ခွန် စတာတွေကို နှစ် နှစ်စာ ပေါင်းပြီး ဆောင်ခိုင်းတယ်။ လူတွေ က စီးပွားရေးကျပ်တည်းနေတာကို အခွန်အခတွေ စုပေါင်းပြီး ဆောင်နေရမယ်ဆိုရင် အဆင်မပြေဘူး "လို့ ပြောပါတယ်။
စီးပွားရေးလုပ်ငန်းနဲ့ပတ်သက်တဲ့ အမြတ်ခွန်ကိုတော့ မြို့နယ်အခွန်ဦးစီးဌာနကနေ အခွန်လာရောက်ဆောင်ဖို့ ဖုန်းဆက်အကြောင်းကြားတာဖြစ်ပြီး နေအိမ်ခွန် လုပ်ငန်းခွန်ကိုတော့ စည်ပင်သာယာ NON CDMဝန်ထမ်းတွေက အရပ်ဝတ်တွေနဲ့ နေအိမ်တွေမှာ လိုက်လံကောက်ခံနေတာပါ။
အမြတ်ခွန်ကိုတော့ ဆိုင်အကြီးအသေး ပေါ်မူတည်ပြီး ကျပ် ငါးသောင်းကနေ သိန်းဆယ်ဂဏန်းအထိ ပေးဆောင်ရတဲ့ ဆိုင်တွေရှိပြီး ၂ နှစ်စာ တစ်ပါတည်း မပေးဆောင်နိုင်ပါက နှစ်ကြိမ် ခွဲပေးရမှာ ဖြစ်ကြောင်း လည်း သိရပါတယ်။
