၁၃ နှစ်စောင့်ခဲ့ရသည့် GTA VI ထွက်ရှိ၊ ဂိမ်းသုံးသပ်ချက် ၉၉ မှတ်ဖြင့် အမြင့်ဆုံးရှိနေ
၁၃ နှစ်ကြာ စောင့်မျှော်ခဲ့ရတဲ့ Grand Theft Auto VI (GTA VI) ဗီဒီယိုဂိမ်းသစ်ကို နိုဝင်ဘာ ၁၉ ရက်မှာ ကမ္ဘာတဝန်း စတင်ဖြန့်ချိခဲ့ပြီး ဂိမ်းဝေဖန်သုံးသပ်ချက်တွေမှာလည်း အမြင့်ဆုံးအမှတ်တွေ ရရှိနေပါတယ်။
Rockstar Games က ထုတ်လုပ်ထားတဲ့ ဒီဂိမ်းကို PlayStation 5 နဲ့ Xbox Series X/S ဂိမ်းစက်တွေမှာ ဆော့ကစားနိုင်ပြီ ဖြစ်ပါတယ်။
ကမ္ဘာတဝန်း အချိန်ဇုန်အလိုက် ညသန်းခေါင်မှာ စတင်ဖွင့်ပေးခဲ့တာကြောင့် နယူးဇီလန်နဲ့ ဩစတြေးလျက ဂိမ်းကစားသူတွေ ပထမဆုံး ဆော့ကစားခွင့် ရခဲ့ပါတယ်။
ဂိမ်းဝေဖန်သုံးသပ်ချက်တွေကို စုစည်းဖော်ပြတဲ့ Metacritic ဝက်ဘ်ဆိုက်မှာ GTA VI ဟာ အမှတ် ၁၀၀ မှာ ၉၉ မှတ်အထိ ရရှိထားပါတယ်။
ဒီအမှတ်ဟာ ၁၉၉၈ ခုနှစ်က ထွက်ရှိခဲ့တဲ့ The Legend of Zelda: Ocarina of Time ဂိမ်းနဲ့ တန်းတူဖြစ်ပြီး သမိုင်းတလျှောက် အမှတ်အမြင့်ဆုံး ဂိမ်းတွေထဲ ပါဝင်လာပါတယ်။
GTA ရဲ့ နောက်ဆုံးဂိမ်း GTA V ကို ၂၀၁၃ ခုနှစ်မှာ ထုတ်လုပ်ခဲ့တာဖြစ်ပြီး ဂိမ်းသစ်ထွက်မဲ့ရက်ကိုလည်း နှစ်ကြိမ် ရွှေ့ဆိုင်းခဲ့ရပါတယ်။
အခုဂိမ်းသစ်ရဲ့ ဇာတ်လမ်းကိုတော့ အမေရိကန်နိုင်ငံ မိုင်ယာမီမြို့ကို အခြေခံဖန်တီးထားတဲ့ Vice City နဲ့ စိတ်ကူးယဉ်ပြည်နယ် Leonida မှာ အခြေတည်ထားပါတယ်။
ဇာတ်လမ်းမှာ ရာဇဝတ်မှုတွေ အတူကျူးလွန်တဲ့ ချစ်သူနှစ်ယောက် လူစီယာနဲ့ ဂျေဆင်တို့ကို အဓိကဇာတ်ကောင်တွေအဖြစ် ကစားရမှာဖြစ်ပြီး လူစီယာဟာ ဒီဂိမ်းစီးရီးရဲ့ သုံးဘက်မြင်ဂိမ်းတွေမှာ ပထမဆုံး ကစားနိုင်တဲ့ အမျိုးသမီး အဓိကဇာတ်ကောင် ဖြစ်လာပါတယ်။
ဒီဂိမ်းကိုထုတ်လုပ်ဖို့ အမေရိကန်ဒေါ်လာ တစ်ဘီလီယံနဲ့အထက် ကုန်ကျခဲ့တယ်လို့ ခန့်မှန်းထားပြီး ကနဦးရောင်းချမှုကနေ ဒေါ်လာဘီလီယံနဲ့ချီ ဝင်ငွေရနိုင်တယ်လို့လည်း မျှော်လင့်ထားပါတယ်။
ဩစတြေးလျနိုင်ငံ ဆစ်ဒနီမြို့က ဂိမ်းကစားသူတယောက်ကတော့ “၁၃ နှစ်၊ ၁၃ နှစ်တောင် စောင့်ခဲ့ရတာ၊ ဒါဟာ သမိုင်းတလျှောက် အကောင်းဆုံးဂိမ်း ဖြစ်နိုင်ပါတယ်” လို့ ပြောခဲ့ပါတယ်။
Source: Reuters











