ကရင်အမျိုးသားအစည်းအရုံး (KNU)၊ တပ်မဟာ ၅ နယ်မြေ မယ်သူဒေသတွင်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တဲ့အတွက် ဃောဝါးရွာသား ၁ ဦးသေဆုံးပြီး ထီးကေလို ကျောင်းထိုင်ဆရာတော် ပျံလွန်တော်မူခဲ့တယ်လို့ ဧပြီ ၆ ရက်မှာ KNU က သတင်းထုတ်ပြန်ခဲ့ပါတယ်။
စစ်ကောင်စီက ဧပြီ ၅ ရက်မှာ လေကြောင်းကနေ ဗုံးကြဲတိုက်ခိုက်ခဲ့တဲ့အတွက် ဃောဝါးရွာသား စောသိန်းအောင် ဗုံးဆန်ထိမှန် သေဆုံးခဲ့သလို ပျောက်ဆုံးနေတဲ့ ထီးကေလို ကျောင်းထိုင်ဆရာတော် အရှင်ဩဘာသ (ဝါတော် ၄ ဝါ) ရဲ့ ရုပ်ကလာပ်ကို တောတွင်းတနေရာမှာ ပုပ်ပွပြီး ပျံလွန်တော်မူနေတာကို ရှာဖွေတွေ့ရှိခဲ့တယ်လို့ ဝိုင်းဝန်းရှာဖွေခဲ့တဲ့ ဒေသခံတွေက ပြောပါတယ်။
အလားတူ ဧပြီ ၅ ရက် ညနေ ၃ နာရီခွဲလောက်က မယ်ဝေ(မဲဝိုင်) ဒေသကို စစ်ကောင်စီ လေယာဉ် ၄ စီး ရောက်ရှိလာပြီး လေယာဉ်ပေါ်ကနေ အမျိုးအမည်မသိ ပါဆယ်ထုပ်တွေကို လေထီးနဲ့ အမြောက်အမြား ကြဲချခဲ့သလို ညနေ ၄ နာရီလောက်မှာ ထပ်မံရောက်ရှိလာတဲ့ လေယာဉ် ၂ စီးပေါ်ကနေ ဗုံးကြဲချပြီး ပစ်ခတ်တိုက်ခိုက်ခဲ့တယ်လို့ ဆိုပါတယ်။
အဆိုပါနေ့ ညနေ ၅ နာရီလောက်က နယ်ခြားစောင့် (BGF) အမှတ် ၁၀၁၃ တပ်ရင်းမှူး ကျော်ဝင်း ဦးဆောင်ပြီး မထောဒေသအတွင်း လှုပ်ရှားနေတဲ့ တပ်ခွဲမှူး ဗိုလ်ဘာယိုက ထီးဘောဒေး ကျေးရွာအတွင်းကို ၈၁ မမ ၂ လုံး ပစ်ခတ်ခဲ့ရာ ကျေးရွာသား စောဖားတူးနေအိမ် ၁ လုံး ထိမှန်ပျက်စီးခဲ့ပါတယ်။
အဆိုပါ လေကြောင်းတိုက်ခိုက်မှုနဲ့ မြေပြင် လက်နက်ကြီး ပစ်ခတ်မှုအတွင်း ဒေသခံ အရပ်သား ပြည်သူတွေဟာ ဘေးကင်းလုံခြုံရာ တောတောင်၊ လျှိုမြောင်တွေအတွင်းကို ကြိုတင် ထွက်ပြေး တိမ်းရှောင်ခဲ့ရတယ်လို့ ဆိုပါတယ်။
ဧပြီ ၄ ရက်၊ မွန်းလွဲ ၂ နာရီလောက်က ဖာပွန်အခြေစိုက် စစ်ကောင်စီတပ်ရင်းထဲကနေ မယ်ဝေဒေသအတွင်းကို လက်နက်ကြီး ၁၀ လုံး လှမ်းပစ်ခတ်ခဲ့တဲ့အတွက် တိုမယ်ခီး (တံတားဦး) ကျေးရွာသားပိုင် ဆန်စက်ကို ထိမှန်ခဲ့တဲ့အတွက် မီးလောင်ပျက်စီးခဲ့ပါတယ်။
အဲဒီနေ့ မွန်းလွဲ ၃ နာရီလောက်က စစ်ကောင်စီရဲ့ မယ်ဝေတပ်စခန်းက ပတ်ဝန်းကျင် ကျေးရွာတွေကို လက်နက်ကြီး၊ စက်သေနတ်တွေနဲ့ ပစ်ခတ်ခဲ့သလို လေကြောင်းကနေ ရိက္ခာထုပ်တွေ ကြဲချချိန် KNLA ဒေသခံတပ်ရင်း၊ တပ်ခွဲ၊ တပ်ဖွဲ့ဝင်တွေက စောင့်ဆိုင်း ပစ်ခတ်ခဲ့တဲ့အတွက် ရိက္ခာထုပ်တွေ မကြဲချနိုင်တော့ဘဲ နောက်ကြောင်းပြန်လှည့်သွားခဲ့ရပြီး ပစ်ခတ်တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၁ ဦး ထိမှန်သေဆုံးခဲ့တယ်လို့ ဆိုပါတယ်။
အလားတူ မူတြော်ခရိုင်၊ လူသောမြို့နယ်၊ စောမူပလေကျေးရွာအုပ်စု၊ စစ်ကောင်စီရဲ့ စောနွယ်ပလော တပ်စခန်းကို မနက် ၆ နာရီလောက်က တကြိမ်၊ မနက် ၈ နာရီခွဲလောက်က ကော်သူးဒဲမှာ တကြိမ်နဲ့ ၉ နာရီလောက်က စောနွယ်ပလောမှာ ထပ်မံပြီး KNLA တပ်ဖွဲ့ဝင်တွေနဲ့ ဒေသ ကာကွယ်ရေးတပ်ဖွဲ့ဝင်တွေက ၃ ကြိမ်တိုင်တိုင် ဝင်ရောက်တိုက်ခိုက်ခဲ့တဲ့အတွက် စစ်ကောင်စီတပ်ဖွဲ့ဝင် ၁၀ ဦးသေဆုံးပြီး ၁ ဦး ဒဏ်ရာရရှိခဲ့ပါတယ်။
ဧပြီ ၄ ရက် မနက် ၁ဝ နာရီလောက်က ဖားလုံးကြီးနဲ့ ထီးကဆောမဲအကြား ကလောလူခီးဒေသကနေ မောင်းနှင်လာတဲ့ BGF ရိက္ခာယာဉ်တန်းကို တပ်မဟာ ၅ ဌာနချုပ် တပ်ဖွဲ့ဝင်တွေနဲ့ တပ်ရင်း ၁၀၂၊ တပ်ခွဲ ၂ တပ်ဖွဲ့ဝင်တွေက ပူပေါင်းတိုက်ခိုက်ခဲ့တဲ့အတွက် BGF တပ်ရင်းမှူး ၁ ဦး၊ တပ်ခွဲမှူး ၁ ဦး၊ တပ်ကြပ်ကြီး ၁ ဦး၊ တပ်ကြပ် ၁ ဦး အပါအဝင် တပ်ဖွဲ့ဝင် ၁၃ ဦး သေဆုံးခဲ့သလို ဒဏ်ရာရရှိမှုကို KNU က အတည်မပြုနိုင်သေးဘူးလို့ ဆိုပါတယ်။
ဧပြီ ၃ ရက် စောမူပလေကျေးရွာအုပ်စု၊ စစ်ကောင်စီရဲ့ စောနွယ်ပလောတပ်စခန်းကို မနက် ၆ နာရီလောက်က တကြိမ်၊ မနက် ၇ နာရီလောက်မှာ တကြိမ် ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း၊ တပ်ခွဲ တပ်ဖွဲ့ဝင်တွေက ဝင်ရောက်တိုက်ခိုက်ခဲ့ပြီး စစ်ကောင်စီတပ်ဖွဲ့ဝင်တွေ ထိခိုက်သေဆုံးမှုကို အတည်မပြုနိုင်သေးဘူးလို့ ဆိုပါတယ်။
ဧပြီ ၃ ရက် မနက် ၅ နာရီလောက်က မယ်ဝေအထက်စုကျေးရွာက နေအိမ် ၅ လုံးကို စစ်ကောင်စီရဲ့ မယ်ဝေ လှုပ်ရှားစစ်ကြောင်းက ဝင်ရောက် မီးရှို့ဖျက်ဆီးခဲ့တယ်လို့ KNU က ထုတ်ပြန်ထားပါတယ်။
စစ်ကောင်စီရဲ့ လေကြောင်းတိုက်ခိုက်မှု၊ အခြေစိုက်တပ်တွေနဲ့ BGF တပ်တွေရဲ့ လက်နက်ကြီး ပစ်ခတ်မှုတွေကြောင့် ထွက်ပြေးတိမ်းရှောင်နေရတဲ့ ကလေးသူငယ်တွေနဲ့ သက်ကြီးရွယ်အိုတွေဟာ ငှက်ဖျား၊ တုပ်ကွေး၊ နှာစီး ချောင်းဆိုး ရောဂါတွေ အပြင်းအထန် ခံစားနေရပြီး မသန့်ရှင်းတဲ့ သောက်သုံးရေတွေကို သောက်သုံးနေရသလို နောက်ဆက်တွဲ ရောဂါတွေ ဖြစ်ပွားလာမှာကို စိုးရိမ်ရတယ်လို့ စစ်ရှောင်အရေး ကူညီပေးနေသူတွေက ဆိုပါတယ်။
