နီပေါနိုင်ငံမှာ လူ ၃ ယောက်ထက်မနည်း သေဆုံးခဲ့ရတဲ့ ဘာသာရေး အကြမ်းဖက်ပဋိပက္ခတွေ ဖြစ်ပြီးနောက် နိုင်ငံအရှေ့တောင်ပိုင်းရှိ မြို့တချို့မှာ စိုးရိမ်စရာ တင်းမာမှုတွေ ဆက်ရှိနေတာကြောင့် ဇူလိုင် ၃၁ ရက်အထိ ညမထွက်ရအမိန့် ထုတ်ပြန်ထားရပါတယ်။

အိန္ဒိယနယ်စပ်အနီး နီပေါနိုင်ငံ၊ ဆွန်ဆာရီခရိုင်ထဲက ဒီဝမ်ဂန့်ဂျ်မြို့မှာ ဇူလိုင် ၂၆ ရက် ညပိုင်းက ဟိန္ဒူနဲ့ မွတ်စလင် အသိုက်အဝန်း ၂ ခုကြား ရုန်းရင်းဆန်ခတ် ဖြစ်ပွားခဲ့တာကြောင့် လူ ၂၅ ယောက် ဒဏ်ရာ ရရှိခဲ့ပါတယ်။

ဟိန္ဒူ ဘာသာရေးပွဲတော်တခုအတွင်း သီချင်းအသံကျယ်ကျယ် ဖွင့်တာနဲ့ ဘာသာရေး အလံတွေ စိုက်ထူတဲ့ ကိစ္စအပေါ် အငြင်းပွားရာကနေ အကြမ်းဖက်မှု စတင်ခဲ့တာလို့ တာဝန်ရှိသူတွေက ဆိုပါတယ်။

တနင်္ဂနွေနေ့တုန်းက ဆွန်ဆာရီ ခရိုင်မှာ အမျိုးသား ၂ ယောက် သေနတ်မှန် သေဆုံးခဲ့သလို၊ ဇူလိုင် ၃၀ ရက်ကလည်း အိမ်နီးချင်း ဆိရာဟာခရိုင်မှာ ကြိုကြားကြိုကြား ပဋိပက္ခတွေ ဆက်ဖြစ်ပွားခဲ့တာ ကြောင့် တတိယမြောက် လူတယောက်ထပ်မံ သေဆုံးခဲ့ပါတယ်။

ရဲတပ်ဖွဲ့ ပြောရေးဆိုခွင့်ရှိသူ အဘီနာရာယန် ကာဖယ်လ်က ဒီဖြစ်စဉ်တွေကို စုံစမ်းစစ်ဆေး နေတယ် လို့ ပြောပါတယ်။

သောကြာနေ့မှာတော့ အကြမ်းဖက်မှုတွေ မရှိတော့ပေမဲ့ နောက်ထပ် ထပ်မဖြစ်ပွားအောင် တားဆီးတဲ့အနေနဲ့ မြို့အတော်များများမှာ အချိန်အကန့်အသတ်မရှိ ညမထွက်ရအမိန့် ထုတ်ပြန်ထား တာပါ။

ဂျန်ဇီအဖွဲ့အစည်းတွေရဲ့ ထောက်ခံမှုနဲ့ တက်လာတဲ့ နီပေါဝန်ကြီးချုပ် ဘာလန်ဒရာရှားကလည်း နီပေါနိုင်ငံမှာ ရိုက်ခတ်နေတဲ့ "မငြိမ်မသက် ပဋိပက္ခတွေ" ကို ဖယ်ရှားပြီး ငြိမ်းငြိမ်းချမ်းချမ်း နေကြဖို့ ပြည်သူတွေကို တိုက်တွန်းခဲ့ပါတယ်။

Source:Reuters