ဘင်္ဂလားဒေ့ရှ်-မြန်မာ နှစ်နိုင်ငံ နယ်နိမိတ်မှတ်တိုင် ၄၁/၄၁ ကြား ဘင်္ဂလားဒေ့ရှ်နိုင်ငံဘက်မှာ သောင်းကျန်းသူအဖွဲ့စခန်း ၃ ခု အခြေပြုနေတယ်ဆိုတဲ့ မြန်မာဘက်က တင်ပြချက်ကို ဘင်္ဂလားဒေ့ရှ်ဘက်က ငြင်းဆိုခဲ့တယ်လို့ သိရပါတယ်။
မောင်တောမြို့ အဝင်အထွက်စခန်း POE မှာ မတ် ၂၃ ရက် မနက်ပိုင်းက ပြုလုပ်တဲ့ နှစ်နိုင်ငံအလံတင် အစည်းအဝေးမှာ စစ်ကောင်စီဘက်က တပ်ဖွဲ့ခွဲမှူး ယာယီရဲမှူးကြီး ကျော်နိုင်စိုးက သောင်းကျန်းသူအဖွဲ့ စခန်း ၃ ခု အခြေပြုနေတဲ့ကိစ္စ ဘင်္ဂလားဒေ့ရှ်နိုင်ငံဘက်ကို တရားဝင် အကြောင်းကြားစာ ၃ ကြိမ်အထိ ပို့ဆောင်ခဲ့ပေမယ့် ဘင်္ဂလားဒေ့ရှ်နိုင်ငံအနေနဲ့ တစုံတရာ ဆောင်ရွက်ပေးခဲ့တာ မရှိတဲ့အကြောင်း တင်ပြခဲ့တာလို့ ဆိုပါတယ်။
စစ်ကောင်စီလက်အောက်ခံ နယ်ခြားစောင့်ရဲအရာရှိတဦးက “ဒီသောင်းကျန်းသူစခန်း ၃ ခုကိစ္စ မြန်မာဘက်က ဘင်္ဂလားကို အကြောင်းကြားတာ ၃ ခါတောင်ရှိပြီ၊ ဘာမှ အကြောင်းမပြန်ဘူး။ မနေ့ကလည်း မြန်မာဘက်က တင်ပြတယ်။ သူတို့ဘက်မှာ မရှိဘူးလို့ ငြင်းခဲ့တယ်” လို့ ပြောပါတယ်။
ဘင်္ဂလားဒေ့ရှ်နိုင်ငံဘက်က ကိုယ်စားလှယ် တပ်ရင်းမှူး ဒုဗိုလ်မှူးကြီး AljHaider and Ahmedy က ဘင်္ဂလားဒေ့ရှ်နိုင်ငံဘက်ခြမ်းမှာ အဲဒီ သောင်းကျန်းသူစခန်းတွေ မရှိကြောင်းနဲ့ အကြမ်းဖက်အဖွဲ့တွေကို လက်ခံထားတာ မရှိဘူးလို့ ငြင်းဆိုခဲ့တာပါ။
ပြီးခဲ့တဲ့ မတ် ၁၈ ရက်က စစ်ကောင်စီတပ်ဖွဲ့ရှိတဲ့ နယ်စပ်မှတ်တိုင် ၄၁ စခန်းကို ဘင်္ဂလားဒေ့ရှ်နိုင်ငံဘက်က လှမ်းပြီး ပစ်ခတ်တာတွေ ရှိခဲ့သလို ဖေဖော်ဝါရီ ၄ ရက် မနက်ပိုင်းကလည်း မောင်တောမြောက်ပိုင်း ဝေလာတောင်ကျေးရွာအနီး မိုင်တိုင်အမှတ် ၄၃ နဲ့ ၄၄ အနီးမှာ စစ်ကောင်စီ နယ်ခြားစောင့်တပ်ဖွဲ့နဲ့ အာဆာအဖွဲ့တို့အကြား မိနစ် ၃ဝ လောက် တိုက်ပွဲဖြစ်ပွားခဲ့ပြီး နယ်ခြားစောင့်တပ်ဖွဲ့ဝင် ၂ ဦး ကျဆုံး၊ ၁ ဦး ဒဏ်ရာရရှိခဲ့ပါတယ်။