မန်ချက်စတာယူနိုက်တက်အသင်းရဲ့ တိုက်စစ်မှူးဟောင်း မေဆန်ဂရင်းဝုဒ်ဟာ ပြင်သစ်ကလပ် မာဆေးလ်ကနေ တူရကီကလပ် ဖီနာဘာချီကို ပေါင် ၃၆ သန်းနဲ့ ပြောင်းရွှေ့တော့မှာ ဖြစ်ပါတယ်။

ဒီပြောင်းရွှေ့မှုကနေ မန်ယူအသင်းဟာ ပေါင် ၁၀ ဒသမ ၂ သန်းဝန်းကျင် ရရှိမှာ ဖြစ်ပါတယ်။ ဂရင်းဝုဒ်ဟာ မန်ယူအတွက် နောက်ဆုံးကစားခဲ့တာ ၄ နှစ်ကျော် ကြာမြင့်နေပြီဖြစ်ပါတယ်။ 

ဂရင်းဝုဒ်ကို ၂၀၂၂ ခုနှစ်မှာ စွဲဆိုခံရတဲ့ စွပ်စွဲချက်တွေကြောင့် မန်ယူအသင်းကနေ ထုတ်ပယ်ခဲ့တာပါ။ ၂၀၂၃ မှာတော့ သက်သေတွေ ရုပ်သိမ်းခဲ့လို့ စွဲချက်တွေ ပယ်ဖျက်ခဲ့တာ ဖြစ်ပါတယ်။ သူကတော့ ဘာအမှားမှ မလုပ်ခဲ့ကြောင်း ငြင်းဆိုထားပါတယ်။

ဂရင်းဝုဒ်ဟာ မာဆေးလ်မှာ နှစ်ရာသီအတွင်း ၈၁ ပွဲမှာ ၄၈ ဂိုးသွင်းပြီး ခြေစွမ်းပြခဲ့တာပါ။ မန်ယူပိုင်ရှင် ဆာဂျင်မ်ရက်ကလစ်ဖ်ကတော့ သူ့အခြေအနေကို အသင်းရဲ့ တန်ဖိုးတွေနဲ့အညီ တရားမျှတတဲ့ ဆုံးဖြတ်ချက် ချမယ်လို့ ပြောကြားထားပါတယ်။