မြန်မာနိုင်ငံဆိုင်ရာ ဒိန်းမတ်သံရုံးအကြီးအကဲသစ် မစ္စတာ Anders Graugaard ဟာ စက်တင်ဘာ ၂၆ ရက်မှာ ရန်ကုန်ကို ရောက်ရှိလာတယ်လို့ သံရုံးက ထုတ်ပြန်ထားပါတယ်။
“လှပစိမ်းလန်းစိုပြေတဲ့ ရန်ကုန်မြို့ကို ကျနော် မနေ့က ရောက်ရှိလာပြီ ဖြစ်ပါတယ်။ အခုလို အရေးကြီးတဲ့အချိန်အခါမှာ မြန်မာနိုင်ငံ ဒီမိုကရေစီလမ်းကြောင်း ပြန်သွားနိုင်ရေးအတွက် ပံ့ပိုးဖို့ ဒိန်းမတ်အစိုးရရဲ့ ကြိုးပမ်းအားထုတ်မှုတွေကို ဆက်လက်ဆောင်ရွက်ဖို့ ဒီကို လာရောက်ရတာ ဝမ်းမြောက်ပါတယ်”
နောဒစ်လို့ခေါ်တဲ့ မြောက်အတ္တလန္တိတ်ဒေသ တနိုင်ငံဖြစ်တဲ့ ဒိန်းမတ်နိုင်ငံဟာ မြန်မာနိုင်ငံနဲ့ ၁၉၅၅ ခုနှစ်မှာ သံတမန်အဆက်အသွယ် စတင်တည်ထောင်ခဲ့ပေမယ့် မြန်မာနိုင်ငံမှာ အချိန်ကာလအတော်ကြာ သံရုံးဖွင့်ခဲ့ခြင်းမရှိဘဲ မြန်မာနိုင်ငံဆိုင်ရာ သံတမန်ရေးရာကိစ္စတွေကို ထိုင်းနိုင်ငံ ဘန်ကောက်မြို့မှာရှိတဲ့ ဒိန်းမတ်သံရုံးက တာဝန်ယူ ဆောင်ရွက်ပေးနေခဲ့တာ ဖြစ်ပါတယ်။
ပြီးခဲ့တဲ့ ၂၀၁၄ ခုနှစ်မှာမှ မြန်မာနိုင်ငံဆိုင်ရာ ဒိန်းမတ်သံရုံးကို ရန်ကုန်မြို့မှာ စတင်ဖွင့် လှစ်နိုင်ခဲ့ကာ ပြီးခဲ့တဲ့ ဩဂုတ်လမှာတော့ သံရုံးဖွင့်လှစ်ခဲ့တဲ့ အချိန်ကာလ ၇ နှစ်ပြည့်ခဲ့ပြီ ဖြစ်ပါတယ်။
