မြန်မာနိုင်ငံမှာ မတရားအာဏာသိမ်းကာလ ၇ လကျော်အကြာ အကြမ်းဖက်စစ်တပ် ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁၀၅၁ ယောက်ထိရှိပြီလို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း(အေအေပီပီ)က ထုတ်ပြန်ပါတယ်။
ဒီစာရင်းဟာ ပြီးခဲ့တဲ့ ဖေဖော်ဝါရီ ၁ ရက်မှ စက်တင်ဘာ ၇ ရက်အထိ အေအေပီပီက ကောက်ယူမှတ်တမ်း ပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။
နွေဦးတော်လှန်ရေးကာလအတွင်း ပြည်သူ ၇၉၆၂ ယောက် ဖမ်းဆီးခံခဲ့ရကာ ၆၃၁၃ ယောက်ကတော့ လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၂၆၅ ယောက်ကတော့ ထောင်ဒဏ် ချမှတ်ခံထားရပါတယ်။
ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၂၆ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။
အမှုဖွင့်ခံထားရပြီး ဖမ်းဝရမ်းထုတ်ခံထားရတဲ့အတွက် တိမ်းရှောင်နေသူ အရေအတွက်ကတော့ ၁၉၈၄ ယောက်ရှိနေပြီး သူတို့ထဲက မျက်ကွယ်သေဒဏ်ချမှတ်ခံထားရသူ ၃၉ ယောက်အပါအဝင် ၁၁၈ ယောက်ဟာ မျက်ကွယ်ပြစ်ဒဏ်ချမှတ်ခံထားရကာ သေဒဏ်ချမှတ်ခံထားရသူ စုစုပေါင်း ၆၅ ယောက် ရှိခဲ့ပြီဖြစ်ပါတယ်။
စက်တင်ဘာ ၅ ရက်နေ့က အကြမ်းဖက်စစ်အုပ်စုတပ်တွေဟာ စစ်ကိုင်းတိုင်းဒေသကြီး၊ ပုလဲမြို့နယ်၊ ၅၅ မိုင်ကျေးရွာကို ဝင်ရောက် စီးနင်းခဲ့ပြီး ဆိုင်ကယ်စီးလာတဲ့ ရွာ သား ဦးခင်ဇော်ကို ဆိုင်ကယ်ရပ်တန့်မပေးဘဲ မောင်းပြေးတယ်လို့ဆိုကာ လိုက်လံပစ်သတ်ခဲ့ကြောင်း သိရှိရပါတယ်။
ပဲခူးတိုင်းဒေသကြီး၊ ပြည်မြို့မှာ နေထိုင်တဲ့ ကိုဇော်လင်းထက်နဲ့ ဝမ်းကွဲညီဖြစ်သူ ကိုရန်ပိုင်ဖြိုး(ခ)အငဲတို့ကို အခြေခံပညာကျောင်းသားများသမဂ္ဂနဲ့ ဆက်စပ်တယ်လို့ဆိုကာ အကြမ်းဖက်စစ်တပ်က စက်တင်ဘာ ၆ ရက် ညနေ ၃ နာရီခွဲအချိန်လောက်က ရိုက် နှက်ဖမ်းဆီးသွားခဲ့ကြပါတယ်။ ကိုဇော်လင်းထက်ဟာ ဖမ်းဆီးခံထားရပြီး နာရီပိုင်းအကြာ ရိုက်နှက်ခံထားရတဲ့ ဒဏ်ရာတွေကြောင့် သွေးထွက်လွန်ကာ ပြည်မြို့ကုတင် ၁၀၀ စစ်ဆေးရုံမှာ ကျဆုံးသွားခဲ့ကြောင်း သိရှိရပါတယ်။
အေအေပီပီအနေနဲ့ လက်ရှိအခြေအနေတွေကို နေ့စဉ် စောင့်ကြည့်မှတ်တမ်းတင်နေတာဖြစ်ပြီး စစ်အာဏာသိမ်းမှုနဲ့ပတ်သက်ပြီး ဖမ်းဆီး၊ တရားစွဲဆို၊ ပြစ်ဒဏ်ချမှတ်ခံထားရသူတွေ စာရင်းကို နေ့စဉ် ထုတ်ပြန်သွားမယ်လို့ ဆိုပါတယ်။
အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ် ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးက ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာကို သိရှိပါက အေအေပီပီ အီးမေးလ်၊ ဖေ့စ်ဘွတ်ခ်နဲ့ တွစ်တာတို့ကတဆင့် ဆက်သွယ်အသိပေး အကြောင်းကြားဖို့ အသိပေးထားပါတယ်။
