ကချင်ပြည်နယ် ပူတာအိုခရိုင် နောင်မွန်းမြို့မှာ ဖမ်းဆီးခံခဲ့ရတဲ့ ဆရာတော်များအတွက် ဆုတောင်းပေးကြဖို့ KBC က တောင်းဆိုလိုက်ပါတယ်။
စစ်ကောင်စီမှအာဏာသိမ်းပြီးနောက် လွန်ခဲ့တဲ့မတ်လ ၃ ရက်နေ့က နောင်မွန်းမြို့ရှိ ရိုးရာယဥ်ကျေးမှုခန်းမမှာ ခရစ်ယာန်ဂိုဏ်းဂဏပေါင်းစုံက ဆရာတော်တွေ ဦးဆောင်ပြီး မြန်မာပြည်ငြိမ်းချမ်းရေးအတွက် ဆုတောင်းပွဲပြုလုပ်ခဲ့ကြတာဖြစ်ပါတယ်။
အဆိုပါဆုတောင်းပွဲကို ဦးဆောင်ခဲ့တဲ့ ဆရာတော် ၅ ပါးအနက် ကေဘီစီအသင်းတော်က ဆရာတော်ဂိုရှန်ဆင်ဆားရ် အပါအ၀င် သုံးဦးကို စစ်ကောင်စီတပ်ဖွဲ့၀င်တွေက ဖမ်းဆီးခဲ့တာဖြစ်ပါတယ်။
ဖမ်းဆီးခံရပြီးနောက် ဇွန်လ ၂၈ ရက်နေ့မှာ စစ်ကောင်စီခန့်ရပ်ရွာလူကြီး ယောရှုက တရားလိုပြုလုပ်ပြီး ပုဒ်မ ၅၀၅ က နဲ့ တရားစွဲဆိုခံခဲ့ရတာဖြစ်ပါတယ်။
လက်ရှိမှာ သူတို့ကို တရားရင်ဆိုင်ဖို့ ပူတာအိုကို ခေါ်ဆောင်သွားပြီး ဖမ်းဆီးခံ ဆရာတော်သုံးပါးအတွက် ဆုတောင်းကူညီပေးကြဖို့ ကချင်နှစ်ခြင်းခရစ်ယာန်အဖွဲ့ချုပ် (KBC) က လူမှုကွန်ရက်စာမျက်နှာမှတဆင့် တိုက်တွန်းတောင်းဆိုလိုက်တာပါ။
လွန်ခဲ့တဲ့ ဧပြီလနဲ့မေလအတွင်း နောင်မွန်းမြို့မှာ စည်းရုံးရေးလာဆင်းတဲ့ ဌာနေပြည်သူ့စစ်ခေါင်းဆောင် ဦးဒါဇွမ်ယော်ရမ်နဲ့ ရ၀မ်ရိုးရာယဉ်ကျေးမှုဒုဥက္ကဋ္ဌ ဦးထံဖူးဒဂုဏ်တို့က ကေဘီစီဆရာတော်တွေဟာ ကေအိုင်အေ သင်တန်းတက်ထားသူတွေဖြစ်ပြီး ဖမ်းဆီးမယ်လို့ စွပ်စွဲပြောဆိုထားပါတယ်။
နောင်မွန်းသာသနာနယ်အတွင်းရှိ အမှုတော်ဆောင်တွေ တစ်စုံတစ်ရာထိပါးမှုရှိလာပါက စွပ်စွဲပြောဆိုထားသူတို့မှာ တာ၀န်ရှိကြောင်း နောင်မွန်းဇုန်နယ်အသင်းတော်များက မေလ ၁၇ ရက်နေ့မှာ သဘောထားထုတ်ပြန်ထားပါတယ်။
