မန္တလေး၊ ချမ်းမြသာစည်မြို့နယ်မှာ ဇွန်လ ၂၂ ရက် ဒီနေ့မနက်က ပစ်ခတ်မှုဖြစ်ပွားပြီး စစ်ကောင်စီအကြမ်းဖက်အဖွဲ့ရဲ့လုံခြုံရေးတပ်ဖွဲ့ဝင်အချို့ အပြင်းအထန်ဒဏ်ရာရရှိသွားတယ်လို့ စစ်ကောင်စီရဲ့ မီဒီယာတွေမှာ အတည်ပြု သတင်းထုတ်ပြန်ပါတယ်။
ဒီမနက် ၇ နာရီခွဲလောက်က ၅၄ လမ်းနဲ့ ၁၁၁ လမ်းထောင့် နေအိမ်တအိမ်မှာ အပြန်အလှန် ပစ်ခတ်မှုဖြစ်ပွားခဲ့တာဖြစ်ပြီး သေဆုံးသူ ၄ ဦးနဲ့ ဖမ်းဆီးရမိသူ ၈ ဦးကို လက်လုပ်မိုင်း၊ လက်ပစ်ဗုံးနဲ့ လက်နက်ငယ်တချို့နဲ့ သိမ်းဆည်းရမိတယ်လို့ စစ်ကောင်စီသတင်းမှာ ဖော်ပြပါတယ်။
ဒါ့အပြင် ၅၆ လမ်းနဲ့ ၁၁၀ လမ်းမှာလည်း ပစ်ခတ်ထွက်ပြေးသွားတဲ့ ပါဂျဲရိုးကားတစ်စီး ထရန်စဖော်မာကို ဝင်တိုက်ပြီး ၄ ဦး သေဆုံးနေတာတွေ့ရတယ်လို့လည်း စစ်ကောင်စီ မီဒီယာတွေက ထုတ်လွှင့်သွားပါတယ်။
ပစ်ခတ်မှုဖြစ်ပြီးနောက် အခင်းဖြစ်ပွားရာ အနီးအနားပတ်ဝန်းကျင်က တွေ့ရာကြုံရာလူတွေကို စစ်တပ်က စစ်ဆေးဖမ်းဆီးသွားတာဖြစ်တယ်လို့ မျက်မြင်ဒေသခံတွေက ပြောပါတယ်။
အပြန်အလှန်ပစ်ခတ်မှုဖြစ်ပြီးနောက် နေရာတော်တော်များများမှာ လက်လုပ်မိုင်းတွေ ပေါက်ကွဲနေပြီး စစ်ကောင်စီရဲ့ အကြမ်းဖက်လက်နက်ကိုင်တွေ သံချပ်ကာကားတွေနဲ့ပါ လှည့်လည်နေတဲ့အတွက် လမ်းမတချို့မှာ ကားတာယာမီးရှို့တားဆီးတာတွေ လုပ်ထားကြပါတယ်။
