မြောက်ကိုရီးယားနိုင်ငံဟာ နယ်စပ်တလျှောက်လုံးမှာ တောင်ကိုရီးယားဆန့်ကျင်ရေး ဝါဒဖြန့် အသံချဲ့စက်တွေကို အောက်တိုဘာလကုန်မှာ စတင်ဖွင့်လှစ် အသုံးပြုသွားမှာဖြစ်သလို အသေးစိတ် ထုတ်ဖော်မထားတဲ့ တန်ပြန်အစီအမံအသစ်တွေကိုပါ အသင့်ပြင်ထားတယ်လို့ ခေါင်းဆောင် ကင်မ်ဂျုံအန်းရဲ့ ဩဇာကြီးမားတဲ့ ညီမဖြစ်သူ ကင်မ်ယိုးဂျုံက အောက်တိုဘာ ၂၂ ရက်မှာ ပြောကြားလိုက်ပါတယ်။
တောင်ကိုရီးယားအနေနဲ့ ပြည်တွင်းရေးကို ဝင်ရောက်စွက်ဖက်နေတာတွေ ဆက်လုပ်နေမယ်ဆိုရင် “အဆိုးရွားဆုံးနဲ့ ခံရအခက်ဆုံး အခြေအနေဆိုးကြီး” နဲ့ ရင်ဆိုင်ရလိမ့်မယ်လို့ ဆိုးလ်ကို သတိပေး ထုတ်ပြန်ချက်ကို မြောက်ကိုရီးယားအစိုးရပိုင် KCNA သတင်းဌာနက ဖော်ပြပါတယ်။
ဒါ့အပြင် တောင်ကိုရီးယားတပ်ဖွဲ့တွေကြောင့် မြောက်ကိုရီးယားစစ်သည်တွေရဲ့ ဘေးကင်းလုံခြုံရေး ထိခိုက်လာရင် “မညှာမတာ သုတ်သင်ရှင်းလင်းသွားမယ်” လို့လည်း ကင်မ်ယိုးဂျုံက ထပ်လောင်း ခြိမ်းခြောက်ခဲ့တာကြောင့် လက်နက်ကိုင်တပ်တွေ အပြည့်တပ်ဆင်ထားတဲ့ နယ်စပ်မှာ ထိတွေ့ တိုက်ပွဲ ဖြစ်ပွားနိုင်ခြေ ပိုမိုမြင့်မားလာခဲ့ပါတယ်။
မြောက်ကိုရီးယားရဲ့ နည်းဗျူဟာတပ်ဖွဲ့တွေဟာ နေရာသစ်တွေမှာ တပ်စွဲထားပြီးပြီလို့ ကင်မ်ယိုးဂျုံ က ပြောဆိုခဲ့သလို နယ်စပ်အနီး နေရာအများအပြားမှာ တောင်ကိုရီးယားတပ်ဖွဲ့တွေက သတိပေး ထုတ်လွှင့်မှုတွေနဲ့ သတိပေးပစ်ခတ်မှုတွေ လုပ်ဆောင်ခဲ့တယ်လို့လည်း စွပ်စွဲခဲ့ပါတယ်။
တောင်ကိုရီးယားဘက်ကတော့ အဲဒီပစ်ခတ်မှုတွေဟာ “တရားဝင်ပြီး ခုခံကာကွယ်တဲ့ အစီအမံတွေ” သာ ဖြစ်တယ်လို့ တုံ့ပြန်ထားပါတယ်။
ကင်မ်ယိုးဂျုံဟာ အောက်တိုဘာ ၂၁ ရက် အစောပိုင်းက မြောက်ကိုရီးယားစစ်တပ် ဦးစီးချုပ် ဘတ်ဂျုံးချွန်းနဲ့အတူ နယ်စပ်ခံတပ် တည်ဆောက်ရေးနေရာတွေကို သွားရောက်ကြည့်ရှုခဲ့ပါတယ်။
လက်ရှိမှာ နယ်စပ်ဒေသကို ရှင်းရှင်းလင်းလင်း ပိတ်ဆို့ထားပြီး ခံတပ်အဆင့်မြှင့်တင်မှုတွေကို ပိုမိုလုပ်ဆောင်နေတယ်လို့လည်း ကင်မ်ယိုးဂျုံက ဆိုပါတယ်။
Source: Reuters
