ထိုင်းနိုင်ငံ စမွတ်စာခွန်ခရိုင်မှာ ဒီဇင်ဘာ ၁၉ ရက် တရက်တည်းအတွင်း ကိုရိုနာဗိုင်းရပ်စ် ကူးစက်ခံ အယောက် ၅၀၀ ကျော်ကို စစ်ဆေးတွေ့ရှိခဲ့လို့ ညတွင်းချင်းမှာပဲ စမွတ်စာခွန် တခရိုင်လုံး အသွားအလာကန့်သတ်ကြောင်း ခရိုင်အုပ်ချုပ်ရေးမှူးက ကြေညာလိုက်ပါတယ်။

 စတိုးဆိုင်တွေ အားလုံးကို ဇန်နဝါရီ ၃ ရက်နေ့အထိ ပိတ်ထားရမှာဖြစ်ပြီး ညလုံးပေါက် ကုန်စုံဆိုင် အားလုံးကတော့ ည ၁၀နာရီကနေ မနက် ငါးနာရီကြားမှာ ပိတ်ထားရမှာပါ။

 ရွှေ့ပြောင်းလုပ်သားအားလုံး မြို့ထဲက ထွက်ခွင့်ရမှာ မဟုတ်ပါဘူး။

 ထိုင်းနိုင်ငံသားတွေကတော့ နာမည်နဲ့ ခရီးသွားမယ့် နေရာတွေကို ထိုင်းအာဏာပိုင်တွေဆီ အကြောင်းကြားပြီးမှ သွားခွင့်ရမှာပါ။

 နောက်ထပ်တစုံတရာ မကြေညာမချင်း ည ၁၀ နာရီကနေ မနက် ၅ နာရီထိ အပြင်မထွက်ဘဲ အိမ်မှာနေရမယ့် ညမထွက်ရအမိန့်ကိုလည်း အာဏာပိုင်တွေက ထုတ်ပြန် လိုက်ပါတယ်။

 ကူးစက်မှု ပျံ့နှံ့ရာ တလာ့ကွန်းပုစွန်ဈေးနားမှာ နေထိုင်သူတွေအနေနဲ့ ဘေးကင်းရေး လမ်းညွှန်ချက်တွေကို လိုက်နာရမှာပါ။

 ဈေးကို ဒီဇင်ဘာ ၁ ရက်နေ့က စပြီး ခုထိ အချိန်ကြားသွားခဲ့သူ အားလုံး ရောဂါခြေချုပ်နဲ့ ၁၄ ရက် နေရမှာဖြစ်ပြီး တုပ်ကွေးလက္ခဏာတွေဖြစ်တဲ့ ဖျားတာ၊ လည်ချောင်းနာတာ အသက်ရှူ မဝတာ၊ အနံ့နဲ့ အရသာ ပျောက်သွားတာ၊ နှာခေါင်းပိတ်တာနဲ့ ခေါင်းကိုက်တာတွေ ဖြစ်ခဲ့ရင် ကျန်းမာရေးလုပ်သားတွေကို ချက်ချင်း အကြောင်းကြားဖို့ ညွှန်ကြားထားပါတယ်။

 ညွှန်ကြားချက်တွေကို ချိုးဖောက်သူတွေဟာ ဘတ်ငွေ ၂သောင်းနဲ့ ထောင်ဒဏ် ၂ နှစ်ထိ ပြစ်ဒဏ်ကို ရင်ဆိုင်ရ နိုင်တယ်လို့လည်း အမိန့် ထုတ်ပြန်ထားပါတယ်။