တနင်္သာရီတိုင်းဒေသကြီး၊ ကော့သောင်းခရိုင်၊ ဘုတ်ပြင်းမြို့နယ်ရှိ အဏ္ဏဝါအမျိုးသား ဥယျာဉ် လန်ပိကျွန်းအနီး ရေပြင်မှာ ကျောက်ငါးတွေ ရေပြင်ပေါ်မှာ သက်ရှင်လျ​က် မျောပါနေတာ တွေ့ရတယ်လို့  ဒေသခံတွေက ပြောပါတယ်။

ဒီလိုငါးတွေရေပေါ်ပြီးအသက်ရှင်လျက်မျောပါနေတာဟာ အောက်တိုဘာ ၂၀ ရက်လောက်ကတည်းကဖြစ်ပြီး  ကျွန်းတကျွန်းတည်းမှာဖြစ်တာမျိုး မဟုတ်ဘဲ အနီးဝန်းကျင် တခြားကျွန်းတွေမှာပါ အများအပြားထပ်မံတွေရှိလာတယ်လို့ မကြုံကလက်ကျေးရွာနေ ကိုထွန်းက ပြောပါတယ်။

ကော့သောင်းခရိုင် ငါးလုပ်ငန်းဦးစီးဌာန ဒုတိယညွှန်ကြားရေးမှူးဦးသန့်ဇင်က “ကျနော်တို့ ကွင်းဆင်းစစ်ဆေးတွေ့ရှိချက်အရနဲ့ ဒေသခံတွေပြောကြားချက်တွေအရ‌ စစ်ဆေးကြည့်တဲ့အခါမှာ ရေပေါ်ပေါ်နေတာ ကျောက်ငါးတစ်မျိုးတည်း အများဆုံးတွေ့ရတယ်၊ ဒဏ်ရာဒဏ်ချက် မရှိဘူး၊ မျောပါနေချိန်မှာအသက်ရှင်​​ပြီး အမြီးနဲ့ ရေယက်တွေ လှုပ်ရှားနိုင်နေတာ တွေ့ရတယ်။ အာခေါင်သည်အဝါရောင်သန်းလျက်ရှိပြီး ဆီဖေါင်းပြူထွက်နေမှု မရှိဘူး၊ မနက်ပိုင်းဆယ်ယူရရှိတဲ့ ၂ ကီလိုအရွယ်ကျောက်ငါးကို ပင်လယ်ရေထဲထည့်ထားရာမှာ ရှစ်နာရီခန့် အထိ ရှင်နေတယ်။ သေဆုံးချိန်မှာ ပဟတ်အရောင်ပြောင်းသွားတယ်။ အတွင်းကလီစာတွေမှာ အစာမတွေ့ရဘူး၊ လှောင်အိမ်နဲ့မွှေးတဲ့ ကျောက်ငါးတွေ သေဆုံးမှုမရှိဘူးဆိုတာ တွေ့ရတယ်။ ကျနော်တို့ဌာနက ဓာတ်ခွဲသုတေသနပြုဖို့အတွက် ငါးနမူနာ ၂ကောင်၊ ရေနမူနာ ၃ ဘူး (ရေအနက်မီတာအလိုက်)တွေကို ရန်ကုန်မြို့ရှိ အဏုစိတ်သရုပ်ခွဲခြင်းဆိုင်ရာ ဓာတ်ခွဲခန်းများဌာန၊ ငါးရောဂါဌာနကို နမူနာတွေပို့ထားတယ်။ အဖြေထွက်လာရင် ထုတ်ပြန်ပေးသွားမှာဖြစ်တယ်”လို့ ပြောပါတယ်။

ဒီလိုမျောပါနေတဲ့ကျောက်ငါးတွေကို ဒေသခံရွာသားတွေကဆယ်ယူပြီး ချက်ပြုတ်စားသောက်နေကြရာမှာ လက်ရှိအချိန်အထိတော့ ဘေးအန္တရာယ် ဖြစ်ပွားသူ မရှိသေးဘူးလို့လည်း သိရပါတယ်။

သန္တာကျောက်တန်းတွေမှာသာနေတဲ့ ငါး​​တွေရေပေါ် ပေါ်နေ​တာ ထူးခြားနေတဲ့အတွက် တတ်ကျွမ်းသည့် ပညာရှင်တွေကိုယ်တိုင် လာရောက်လေ့လာ စစ်ဆေးပေးဖို့ ဒေသခံတွေ လိုလားနေပါတယ်။

သတင်း- လတ်ကိုကိုဦး