တာမွေမြို့နယ် ပြည်သူ့ကျန်းမာရေးဦးစီးဌာနက ဝန်ထမ်း ၁ ယောက်မှာ ပိုးတွေ့ခဲ့ပြီးနောက် မြို့နယ်ကျန်းမာရေးမှူးအပါအဝင် ၉ ယောက် Quarantine ဝင်နေတယ်လို့ ကာယကံရှင်ကျန်းမာရေးမှူး ဒေါက်တာနှင်းလဲ့ရည်က ဒီဗွီဘီကို ပြောပါတယ်။
“ကျမတို့ရုံးမှာလည်း ကျန်ခဲ့တယ်ပေါ့နော်။ အိမ်ပြန်လို့ Home Quarantine နေဖို့ အဆင်မပြေတဲ့သူတွေ ကျန်ခဲ့တာ ဆရာမလေး ၂ ယောက်တော့ ရှိတယ်လေ။ အရမ်းအရေးကြီးတဲ့ဟာတွေတော့ လုပ်ပေးနေပါတယ်။ ဒါပေမဲ့ လူနာတွေ ဘာတွေတော့ မကြည့်ဘူးပေါ့နော်။ ရုံးမှာ ရုံးစောင့်ရော အပါအဝင်ဆိုရင် ၃ ယောက်ကျန်ခဲ့ပါတယ်။ အစားအသောက်တွေ စီစဉ်ပေးရင်တော့ ကောင်းတာပေါ့နော်။ သူတို့အထဲကနေ အပြင်ထွက်လို့မရဘူး။”
Quarantine ဝင်ရတဲ့ တာမွေမြို့နယ်ကျန်းမာရေးမှူးအပါအဝင် ၉ ယောက်ကို လှိုင် Quarantine စင်တာကို မနေ့က ပို့ဆောင်ထားတယ်လို့ တာမွေမြို့နယ် တိုင်းဒေသကြီးလွှတ်တော်ကိုယ်စားလှယ် ဦးသိန်းမြင့်က ပြောပါတယ်။
တကယ်လို့ သူတို့အကုန်လုံးပါသွားရင် ခရိုင်ကျန်းမာရေးကလာပြီး ဒေသန္တရကျန်းမာရေးလုပ်ငန်းမှာ အရေးကြီးတဲ့ သင်္ချိုင်းလက်မှတ်ကိစ္စကို ဆောင်ရွက်ပေးမယ်လို့ တာမွေမြို့နယ်အုပ်ချုပ်ရေးမှူး ဦးအောင်ကျော်အေးက ဒီဗွီဘီကိုပြောပါတယ်။
“ဒါကြီးက ရပ်ထားလို့မရဘူး။ သင်္ချိုင်းလက်မှတ်မပါရင် သင်္ဂြိုဟ်လို့မှမရတာ” လို့ သူက ပြောပါတယ်။
